• 20/01/2020 8:12 51

Nigeria: Pasiteri- Mwarimu wa Kaminuza wasabye “igitsina” umunyamakuru wa BBC yahagaritswe ku kazi

Kaminuza ya Lagos yahagaritse Umwarimu wayo, wari na Pasiteri nyuma yo gufatwa amashusho mu nkuru icukumbuye ya BBC yari igamije kumenya ukuri kw’ibivugwa ku kuba abarimu ba Kaminuza mu bihugu bya Africa y’Iburengerazuba basaba ruswa ishingiye ku gitsina abakobwa, bakabaha amanota cyangwa bakabafasha kugera ku yandi mahirwe y’akazi cyangwa kwemererwa kwiga aho bakora.

Dr-Boniface Igbeneghu yahagaritswe ku kazi na Kaminuza ya Lagos yigishagamo, aho abereye Paisteri na bo bamaganye ibikorwa bye

Inkuru ya BBC ifite umutwe ‘sex-for-grades’ yatambukijwe mu kiganiro Africa Eye, igaragaza Abarimu ba Kaminuza mu gihugu cya Nigeria na Ghana basaba umunyamakuru wa BBC, ibisa n’ ‘igitsina’ mu gihe ari we wabakoragaho inkuru yiyise umunyeshuri ushaka kwiga aho bigisha.

Kaminuza ya Lagos muri Nigeria yahagaritse Umwarimu ugaragara mu mashusho agerageza gusaba uriya munyamakuru “imibonano mpuzabitsina”, ndetse hari aho agera ukabona ko ashaka kumufata ku mbaraga bari mu biro bye.

Uyu Mwarimu muri Kaminuza, yitwa Dr. Boniface Igbeneghu, ndetse ni Umuvugabutumwa (Pasitori), ibikorwa bye byamaganwe cyane n’Itorero rye.

Yamaze igihe gikabakaba umwaka akorwaho iperereza na BBC binyuze mu kiganiro k’inkuru zicukumbuye “BBC Africa Eye”.

Video yakwirakwiye ku mbuga nkoranyambaga ku wa mbere w’iki cyumweru ubwo inkuru yasohokaga, ndetse iteza impaka mu batuye Africa y’Iburengerazuba ku bijyanye n’ikibazo cyo guhohotera abagore (abakobwa) basabwa imibonano mpuzabitsina n’Abarimu kugira ngo bahabwe amanota cyangwa bakorerwe izindi serivise.

Mu nkuru ya BBC abakobwa bahishe amasura bavuga inkuru z’ibyababayeho ubwo abarimu babigisha babasaga kuryamana na bo.

Dr Igbeneghu Boniface ntacyo yigeze atangaza ku kemezo cyamufatiwe.

 

Ibye byamenyekanye gute?

Yafashwe amashusho abaza ibibazo biterekeranye, ndetse asaba akomeje umunyamakuru wa BBC wari wiyoberanyije akiyita umukobwa w’imyaka 17 ushaka kwiga muri Kaminuza.

Mu guhura kw’uyu Munyamakuru wari wigize umukobwa muto, n’uyu Mwarimu wa Kaminuza yari amaze igihe asaba serivise, Umwarimu agaragara mu mashusho ashaka kumusambanya ku gahato, ndetse akamusaba “kumusoma” nyuma yo gufunga ibiro bye.

Uyu Mwarimu bigera aho abwira Umunyamakuru wa BBC aba azi ko ari umukobwa muto w’imyaka 17, ko nadakora ibyo amusaba abibwira “umubyeyi” we ko atubaha.

Hari umwe mu bakobwa uriya Dr Igbeneghu yigishije wabwiye BBC ko yamaze igihe kirekire agerageza kwiyahura kubera ipfunwe yatewe na we.

Abandi bakozweho iperereza ni Abarimu bigisha muri Kaminuza ya Ghana.

Prof Ransford Gyampo na Dr Paul Kwame Butakor, bahakana ko bavuga ko batigeze basaba igitsina abakobwa ngo babahe amanota.

Prof Gyampo we yabwiye ibinyamakuru byo muri Ghana ko azajyana BBC mu nkiko.

Kaminuza ya Ghana bigishamo ivuga ko igiye kwikorera igenzura mu bakobwa bashinja bariya barimu, ikazafata ikemezo kandi nta we ikingira ikibaba.

Umunyamakuru witwa Kiki Mordi, yatekereje gukora iriya nkuru bitewe n’ibyamubayeho yiga muri Kaminuza bigatuma ava mu ishuri, ndetse akareka umwuga w’Ubuvuzi yari yahisemo kwiga.

BBC

UMUSEKE.RW

1 Igitekerezo

  • Millions and millions z’abagore n’abakobwa ku isi hose basambana n’abagabo ntibimenyekane.Bamwe baba bashaka akazi,amafaranga,promotion,amanota,etc…Abandi bafatwa ku ngufu bagaceceka kubera ko bibatera isoni kuvuga ko basambanye.Muli South Africa,40% by’abagore bafatwa ku ngufu buri mwaka.Naho muli France,Abagore 30% bavuga ko baciye inyuma abagabo babo.Biteye ubwoba.Ubusambanyi burakabije muli iyi minsi y’imperuka.Kimwe mu bintu byatumwe Imana irimbura abantu bose bali batuye isi ku gihe cya Nowa,ni ubusambanyi na Violence.Hashize imyaka 4300 ibyo bibaye,according to bible chronology.Harokotse abantu 8 gusa bumviraga Imana.Yesu wavuze iyo nkuru,yongeyeho ko ariko bizagenda ku munsi w’imperuka.Hazarokoka abantu bake,kubera ko aho gushaka Imana,abantu barimo kwishakira gusa amafaranga,ibinezeza,intambara,etc…Nta kintu na kimwe bible ivuga kitaba.Niyo cyatinda kigeraho kikaba nta kabuza.It is a matter of time kandi ntabwo bizatinda.Twibuke ko n’abo ku gihe cya Nowa bapingaga ibyo Nowa yababwiraga ko Imana igiye kurimbura abantu babi.Baramusekaga.Bible ivuga ko ku munsi wa nyuma,abantu b’iki gihe Yesu nagaruka azabicisha Umuriro.Byisomere muli Abatesaloniki ba kabiri,igice cya mbere,imirongo ya 7-9.Tureke kwibera mu gushaka ibyisi gusa,ahubwo tubifatanye no gushaka Imana.

Subiza

Your email address will not be published. Required fields are marked *