• 12/12/2019 7:54 45

Ngororero: Min.Shyaka yasabye ko kubakira abasenyewe n’ibiza bitarenza Ukuboza 2019

Minisitiri w’Ubutegetsi bw’Igihugu Prof. Shyaka Anastse yasuye Ngororero agirana ibiganiro n’abayobozi mu nzego zose, iz’ibanze, umutekano, abahagarariye amadini n’amatorero, za Koperative n’amashyirahamwe, n’abandi bose bagera kuri 419, mu bibazo Akarere kagaragaje byihutirwa birimo icy’abantu basenyewe n’ibiza mu mwaka 2017/2018 n’ubu badafite aho bababa kimwe n’abandi bakennye, Minisitiri yasabye ko icyo kibazo kiragira bitarenze umwaka 2020, kandi ngo abazarangiza kubakira abo bantu mbere azabagenera igihembo.

Minisitiri w’Ubutegetsi bw’Igihugu Prof. Shyaka Anastase avuga ko Umurenge uzaba wubakiye bariya bantu bitarenze Ukuboza 2019 azawuha igihembo

Inama yabaye kuri uyu wa kabiri tariki 6 Kanama ku Karere ka Ngororero. Mu gihe cy’amasaha abiri inama yamaze, Prof Shyaka Anastase hari aho yahahagurukije abayobozi b’amashami (directors) mu Karere n’Abanyamabanga Nshingwabikorwa b’Imirenge, agenda ababaza ibigenda n’ibitagenda mu nshingano zabo.

Mu bibazo by’ingutu aka Karere ka Ngororero gafite byiganjemo ingaruka z’ibiza aho imvura yo mu 2017 na 2018 yasenyeye abaturage benshi; yangiza imihanda, ibiraro n’amateme. Akarere kihaye intego yo kubakira abaturage 652 muri bariya basenyewe n’ibiza mu 2017.

Ibindi bibazo bihari birimo iby’abana bata ishuri, n’ubucukuzi bw’amabuye y’agaciro bukorwa mu kajagari.

Minisitiri Shyaka avuga ko abayobozi mu Karere ka Ngororero rbakoze mu buryo budasanzwe bishobora gutanga umusaruro mu gukemura ibibazo.

Yagize ati “Uburyo budasanzwe nibwo gisubizo, nibwo butanga ibisubizo byihuse by’ibibazo dufite, ibibazo byose ntitukabirebere ku Karere, tujye tubimanura. Nk’ibibazo by’abana bata ishuri, isuku nke n’ibindi ni abayobozi b’Imidugudu n’Utugari babikemura.”

Shyaka avuga ko gukora muri buriya buryo budasanzwe iterambere ryagerwaho mu gihe gito, ubukene bugatsindwa, mu buhinzi umusaruro ukaboneka.

Minisitiri w’Ubutegetsi bw’Igihugu yasabye abashinzwe Uburezi mu Karere n’Imirenge gukorana n’Abayobozi b’Utugari n’Imidugudu bagasubiza mu ishuri abana 1 851 bataye ishuri, kandi bigakorwa bitarenze uku kwezi kwa Kanama 2019.

Ati “Biteye isoni kwitwa Imparirwakurusha ufite abana barenga 1851 bataye ishuri. Ikerekezo cy’u Rwanda ni uko abana b’Abanyarwanda bose biga.”

Akarere ka Ngororero gafite imiryango 288 iri mu yasenyewe n’ibiza mu 2017 itarubakirwa, n’indi itishoboye 364 idafite aho kuba, gateganya kububakira bose bitarenze tariki 30 Kamena 2020.

Umuyobozi w’Akarere, NDAYAMBAJE Godefroid avuga ko ibyangombwa by’ibanze babifite, ndetse n’ingengo y’imari y’amafaranga miliyoni 93 Frw azakoreshwa mu kugura amabati ngo irahari.

Yavuze ko bagiye gushyira imbaraga mu gukemura ibibazo byagaragajwe ku gihe cyatanzwe, kandi bigakorwa ku bufatanye bw’inzego n’abaturage.

Minisitiri Shyaka Anastase yavuze ko azatanga igihembo ku Murenge mu ifite ingo nyinshi uzatanga abandi gusoza kiriya gikorwa cyo kubakira abaturage badafite aho kuba, igihe bazaba batarengeje Ukuboza 2019.

Ngororero ni Akarere kegereye Rubavu ituranye n’umugi wa Goma wo muri RD.Congo wagaragayemo indwara ya Ebola, Minisitiri Shyaka yakanguriye abaturage kurushaho kubahiriza ingamba zo kwirinda no gukumira Ebola, zirimo kongera isuku.

Ati “Ebola ni umushyitsi uri mu baturanyi tudashaka, aho yageze yica benshi, abakerarugendo ntibagaruke, byinshi birangirika. Byaragaragaye ko twongereye isuku byakongera amahirwe menshi yo kuyirinda.”

Iyi nama yarimo abakorera muri Ngororero mu nzego zose iza Leta n’abikorera n’amadini, basabwa kongera ubukangurambaga bw’isuku kuko Ebola iri muri DR.Congo hafi yabo

UMUSEKE.RW

1 Igitekerezo

  • IBIZA N’IBYOREZO bikomeye cyane (Heavy Natural Disasters) birimo kuzahaza isi kurusha kera.Bimwe muli ibyo ni ibi: Indwara ziterwa na Virus,Heatwaves,Hurricanes (Imiyaga ikomeye cyane),Glaciers Melting,Tsunamis,Wildfires,Floodings),etc… Aho bitandukaniye n’ibya kera,nuko iby’ubu bifite ingufu zikabije cyane.Bihuje n’ibyo bible ivuga ko “mu minsi y’imperuka hazabaho ibihe biruhije”.Nubwo abantu nyamwinshi batabyemera,imana yashyizeho “umunsi w’imperuka” nkuko Ibyakozwe 17 umurongo wa 31 havuga.Kuli uwo munsi,izakura mu isi abantu bose bakora ibyo itubuza,isigaze gusa abantu bayumvira.Byisomere muli Imigani 2,imirongo ya 21 na 22.Izaha ubutegetsi bw’isi yose Yesu nkuko tubisoma mu Ibyahishuwe 11,umurongo wa 15.Hanyuma Yesu ahindure isi yose paradizo.Ibibazo byose biveho burundu,harimo ubukene,ubusaza,indwara n’urupfu.

Subiza

Your email address will not be published. Required fields are marked *