• 24/01/2020 1:00 40

Ngoma: Hari abaturage binubira igiciro k’imbuto y’ibigori ko kiri hejuru

Mu Karere ka Ngoma mu Ntara y’Iburasirazuba hari abahinzi batakambira ubuyobozi basaba ko bubakemurira ikibazo k’ibiciro by’imbuto y’ibigori gihanitse, kikarenga ubushobozi bwabo.

Ibi babishingira ku kuba igiciro cyarikubye kabiri ugereranyije n’uko bari basanzwe bagura imbuto.

Ubuyobozi bw’Ikigo k’Igihugu gishinzwe Ubuhinzi n’Ubworozi (RAB) buvuga ko abaguze imbuto zihenze bashobora guhindura bagatumiza izihendutse ngo kuko zirahari.

Abahinzi mu Karere ka Ngoma bashishikarijwe kujya mu matsinda yitwa Smart Nkunganire, kugira ngo bashobore kubona imbuto z’indobanure ku gihe.

Iyi gahunda bakaba barayishimye kuko ubushize byabafashije kubona umusaruro mwiza.

Muri iki gihembwe k’ihinga 2020 A, abahinzi bavuga ko batunguwe cyane no kubona igiciro k’imbuto y’ibigori cyarikubye hafi kabiri ugereranyije n’uko bayiguze ubushize.

Mutarambirwa Vincent utuye mu Murenge wa Rurenge ati “Twafashe imbuto muri Tubura twumva ko ikilo ari Frw 1000, mu by’ukuri ntabwo twasobanukiwe impamvu baduhaye ibigori bihenze kandi turi no muri Smart Nkunganire twarunganiwe.”

Uwanyirigira Vestine ati “Baduha imbuto ihagaze ku Frw 1000 twebwe iyo twejeje ntabwo bijya birenga Frw 150 ku kilo ubwo se twaba twunguka cyanga turahomba.”

Umuyobozi wungirije ushinzwe ubushakashatsi n’iyamamazabuhinzi mu Kigo RAB, Bucagu Charles avuga ko iki kibazo bakizi ndetse ko hari inama zitandukanye zakozwe bemeza ko abaguze imbuto ihenze bashobora guhindura bagatumiza ihendutse.

Ati “Ibyo biciro ubundi bisohoka mu mabwiriza ya Minisitiri w’Ubuhinzi n’Ubworozi mbere y’Igihembwe k’Ihinga,  umuturage ashobora gukoresha telephone ye agatanga izina ry’imbuto ashaka kuzakoresha, iyo asanze ihenze ashobora kuyireka agahindura.”

Bucagu Charles asaba abahinzi gukangukira guhinga imbuto ituburirwa mu Rwanda kuko nayo ngo yizewe.

Ati “Ubu politiki ihari ni ukugabanya imbuto ziva hanze kuko ziduhenda, ubu hari izo twakoze za Hybrid zifite umusaruro ungana n’uw’iziva hanze, icyo tubwira abahinzi ni uko bagerageza gukoresha amoko y’imbuto ziva hafi y’aho bakorera.”

Imbuto y’ibigori iturutse hanze iragura Frw 1000 no kuzamura mu gihe ituburirwa mu Rwanda igurwa hagati ya Frw 500 na Frw 650 ku kilo.

Igihembwe cya mbere k’ihinga cya 2020A cyamaze gutangira ndetse hamwe na hamwe batangiye gutera, ahandi ntibaratangira bitewe n’ikirere cyaho.

Minisiteri y’Ubuhinzi n’Ubworozi akenshi isaba abahinzi kutazajya bihutira gutera batabanje kumenya amakuru y’iteganyagiye ry’ikirere kuko igihe imvura igwira kigenda gihindagurika.

Elia BYUKUSENGE
UMUSEKE.RW/I Burasirazuba

Subiza

Your email address will not be published. Required fields are marked *