• 11/12/2019 6:03 16

Ndayishimiye afite inama ku banyamideri bo mu Rwanda akurikije ibyo azi kuri Ghana 

Umunyarwanda Ndayishimiye Danny akomeje kugirirwa ikizere mu bijyanye no gutegura ibitaramo  byo kumurika imideri muri Ghana. Igitaramo kitwa MBFW Global Fashion Week yateguye cyabaye mu cyumweru gishize kitabiriwe n’ibihumbi by’abakunda imideri muri Ghana.

Ndayishimiye Danny akomeje kugirirwa ikizere mu gutegura ibitaramo by’imideri muri Ghana

Iki gitaramo cyahoze kitwa Mercede Benz Fashion Week Accra nyuma kikaza guhindurirwa izina bitewe n’uko cyaguye amarembo kiba mpuzamahanga.

Ni kimwe mu bitaramo byo kumurika imideri bikomeye muri Africa kikaba gisanzwe giterwa inkunga n’ikompanyi ya Mercede Benz imenyerewe mu gukora ibinyabiziga.

Muri 2019 iki gitaramo cyatangiye kuba ku wa 2-4 Kanama kitabiriwe n’abahanga imideri 40 baturutse mu bihugu bitandukanye birimo Ghana, Nigeria, u Burundi, Africa y’Epfo na Leta zunze ubumwe za America.

Kuva mu 2017 nibwo byatangiye kumenyekana ko Ndayishimiye ategura ibitaramo byo kumurika imideri muri Ghana nyuma na we aza kubyemerera Umuseke.

Yaduhishuriye ko ari we wafashije umuhanzi w’imideri Niyitanga Olivier kujya kumurika imideri muri Ghana mu 2017.

Ndayishimiye aganira n’Umuseke, yavuze ko yishimira uko mu 2019 iki gitaramo cya MBFW Global Fashion Week cyagenze ndetse ngo abategura ibitaramo byo kumurika imideri mu Rwanda hari byinshi bari bakwiye kukigiraho.

Yagize ati “Uyu mwaka iki gitaramo cyageze ku ntego twari twihaye. ‘Fashion’ muri Ghana  yateye imbere ugereranyije n’ibindi bihugu byo muri Africa. Uyu mwaka  twakoranye n’abahanga imideri  40 bose b’abahanga ku buryo utarambirwa kureba imyenda bakoze.”

Yakomeje agira ati “Biracyagoye ko abari  muri ‘fashion industry’ mu Rwanda dukorera hamwe ngo tuzamurane. Iki ni cyo cyazamuye ‘fashion’ muri Ghana  ndetse n’iki gitaramo muri rusange. Guhozaho no  kudasubira inyuma biri mu bizamura cyane ibitaramo by’imideri muri Ghana.”

Uburyo ibirori byo kwerekana imideri bitegurwa mu Rwanda, Ndayishimiye avuga ko hakirimo imbogamizi nyinshi zishingiye ku kuba abahanga imideri ari bo bitegurira ibitaramo byo kumurika imideri kandi hari kompanyi zibishoboye.

Ati “Igihe cyose aba designers bakoranye n’abashoboye gutegura ari na byo bakora biroroha ko ibirori biba byiza ndetse abahanga imideri bakabona umwanya uhagije wo gutegura imyenda bazamurika muri ibyo bitaramo.”

Kuba uyu mwaka nta Munyarwanda n’umwe witabiriye iki gitaramo cyateguwe na Ndayishimiye muri Ghana ngo ni uko cyafunguye ishami mu Rwanda.

Mu mafoto wareba uko iki gitaramo cya MBFW Global Fashion Week 2019 cyagenze.

Robert KAYIHURA
UMUSEKE.RW

Subiza

Your email address will not be published. Required fields are marked *