• 08/12/2019 12:08 36

Nariye ingoma imwe izindi na njye zarandiye – Rucagu Boniface

Mu kiganiro Inararibonye Rucagu Boniface yagiranye n’Umuseke, yagarutse ku by’abantu benshi bakunze kuvuga ko yariye ingoma nyinshi, bashaka kuvuga ko yakoranye neza n’Ubutegetsi bwose bwakurikiye Ubwami bwavuyeho mu 1959, yavuze ko  ‘Ingoma yariye ari imwe, ariko ko na we izindi zaramuriye’.

Rucagu Boniface avuga ko Abanyarwanda bakwiye kwishimira ubutegetsi buriho ubu bwazanye ubumwe n’iterambere ridaheza

Umwaka ushize ni bwo Radio 10 yagiranye ikiganiro na Rucagu nk’inararibonye mu mateka y’u Rwanda yari umutumirwa kimwe n’umushakashatsi Nizeyimana Innocent, umwanditsi w’ibitabo.

Iki kiganiro cyongeye gutambuka kuri iriya radio mu ijoro ryo ku wa 9 Mata 2019. Rucagu yasabwe kugira icyo avuga kubakunze kuvuga ko yariye ingoma nyinshi. Yavuze ko bivugwa ariko ngo we ‘yariye ingoma imwe, na we izindi ziramurya’.

Umuseke kuri uyu wa kane tariki 11 Mata, waganiriye na Rucagu Boniface ku ngoma avuga yariye n’izindi zamuriye.

Yadutangarije ko ingoma yariye ari iyi ya Perezida Paul Kagame kuko yamukamiye, naho iya Kayibanda n’iya Habyarimana ngo zaramuriye kuko zatoje abantu amacakubiri.

Yagize ati “Ingoma zandiye ni Leta ya mbere ya Kayibanda kuko ni yo yadutoje amacakubiri twese kandi umuntu ugutoje amacakubiri n’ivangura, akakubuza kurererwa mu ndangagaciro na kirazira, akagutoza kwanga umuvandimwe ntacyo umuhora, iyo ngoma nta kindi iba ikumariye kuko iba igutereje isi, ikazakugira ruvumwa kubera iyo mico mibi yawe itagira ubumuntu.”

Igoma ya Habyarimana na yo ngo yaramuriye kuko itigeze inyuranya na gato n’iya Kayibanda, akavuga ko n’ikimenyimenyi mu gukora Manifesito ya MRND, banditse ko bashingiye kuri Revolusiyo ya 1959…

Ati “Urumva na none yongeye kunteza isi, uzakumva warahereye ku macakubiri ngo urakora manifesite, azavuga ati ‘uyu muntu nta bumuntu agira’, azakugira ruvumwa.”

Icya kabiri yemeza ko Ingoma ya Habyarimana yamuriye, ngo ni inzangano zikomoka ku matora, rucagu yararwanyijwe cyane ashaka kuba Depite.

Ati “Nararwanyijwe, cyane cyane cyane, nshaka kuba Depite mu 1988, bangira ruvumwa kubera amajwi narimfite mu baturage.”

Rucagu avuga ko yananditswe mu kinyamakuru Nyiramacibiri ko ‘Rucagu yitwikira uruhu rw’intama, imbere ari Ikirura’. Ngo bavuga ko Abanyaruhengeri bamwitondera kuko ari Umwuzukuru wa Rwabugiri wa Gahindiro ka Mibambwe, ngo nibatitonda buracya Ruhengeri yayihaye Abatutsi bo mu bwoko bw’Abanyiginya.

Icyo gihe hari mu ntambara yo kubohora igihugu, ngo bashakaga kumuteranya n’abaturage.

Nyuma Abapawa ba MRND na MDR banditse indi nyandiko ivuga urwango Rucagu yanga Abatutsi, ngo iyo nyandiko yanditswe bumvise ko Inkotanyi zasubije Rucagu imodoka nyuma y’igitero cyo ku wa 8 Gashyantare 1993, kuko yayisubijwe bamenye ko Rucagu atari umuntu mubi.

Rucagu avuga ko icyo gihe bashakaga ko atazajya mu Nteko rusange bagira ngo urwo rwango rwo kwanga Abatutsi ruzatume FPR itamwemera mu bajya mu Nteko.

Ku ngoma ya Habyarimana, Rucagu yashyizwe mu gatsiko k’abicanyi (Les escadrons de la mort), ariko nabwo ngo yahise yandika abyamagana kuko ngo hatari kubamo uwitwa Nzirorera ahahuriremo na Rucagu, bareke kwicana’.

Ati “Mpereye kuri ibyo, izo ngoma zarandiye.”

 

 

Leta y’Ubumwe bw’Abanyarwanda narayikoreye kandi yarankamiye

Avuga ko ibyo iyi Leta yamukoreye ari byinshi atabirondora, kandi ngo n’Abanyarwanda barabizi.

Ibintu bitanu avuga ashima, ni uko Leta y’Ubumwe yahuje ingabo zatsinzwe n’izatsinze, akavuga ko ari ikintu gikomeye cyubaka amahoro. Gucyura impunzi zahunze mu 1959 no mu 1994 na byo ngo ni ikintu gikomeye; Gufungura amarembo ku gihugu na byo ngo ni ikindi gikomeye. Icya kane ni Ubutabera bwunga hagendewe ku mateka u Rwanda rwanyuzemo.

Ashima kandi ko iyi leta yatoje Abanyarwanda indangagaciro z’umuco nyarwanda ibinyujije mu kugarura itorero, ikindi ngo ni gahunda ya ‘Ndi Umunyarwanda’ igamije kuba umuntu azashakira uwo ari wese amahoro “yiteye umwenda w’ubunyarwanda, yiteye ubunyarwanda, ingofero y’ubunyarwanda nta vangura abantu bose bakiyumvamo ko ari bene kanyarwanda.”

 

Amasomo Rucagu akura mu mateka y’u Rwanda

Muri kiriya kiganiro cyatambutse kuri radio 10, Rucagu Boniface yavuze ko ababazwa n’ubuyobozi bubi u Rwanda rwagize kuva ku gihe cy’Abakoloni bageze mu Rwanda kugera mu 1994.

Ati “Whamagaraga Abacyaba, hakaza Abahutu, Abatwa n’Abatutsi. Icyo kintu cyari gikomeye, ubutegetsi busenya ubumwe bw’Abanyarwanda, buzana amacakubiri n’ivangura, irondabwoko n’irondakarere. Icyo kintu Abanyarwanda aho turi hose tugomba kukizirikana kikatubabaza, kugira ngo dushobora gufata ingamba z’uko tutakongera gusubiza igihugu aho cyavuye.”

Rucagu avuga ko Abanyarwanda bakwiye kwishimira ubutegetsi bwiza bafite bwazanywe na RPF Inkotanyi aho abantu bose bumva ko ari Abanyarwanda, ubuyobozi budaheza buha buri wese ijambo, bukaba bwimakaje imbere amahoro n’ubunyarwanda.

Ati “Uwasohokana Ubututsi, Ubutwa cyangwa Ubuhutu mu mahanga hose bwamuhitana, ariko icyamubeshaho ku isi hose ni ukugenda yiyumvamo ubunyarwanda…”

Jean Paul NKUNDINEZA
UM– USEKE.RW

18 Ibitekerezo

  • hhhhhh uyu musaza ni kazitunga kweli. Ngo ingoma ya Kinani yaramuriye? Uwapfuye yarihuse kabisa! Ko wigereye muri pansiyo yawe iryoshye urarwana n’iki?

    • Have sigaho RUCAGU wibeshya abanyarwanda.Benshi turakuzi.Ngo wariye ingoma imwe gusa?Ahubwo wariye ingoma 6: Mbonyumutwa,Kayibanda,Habyarimana,Sindikubwabo,Bizimungu na Kagame.Umenya n’iya Rudahigwa na Ndahindurwa waraziriye.Aka kanya wihakanye Habyarimana wakugize Depite w’ishyaka rye MRND??? Uko urimo usingiza iyi ngoma,ni nako wasingizaga Habyarimana.Uko wambara “ifoto” ya Kagame umubiri wose,ni nako wambaraga ifoto ya KINANI.Urahakana se ko buri gihe utambaraga “Medal/Medaille ya Habyarimana” mu gatuza?? Niba dushaka ko u Rwanda rumera neza,tujye twirinda “kubeshya”,kubera gushaka umugati.Imana itubuza kubeshya n’andi manyanga yose.Isi ifite ibibazo kubera millions and millions z’abantu babeshya cyangwa bakora amanyanga kubera inda (le ventre/stomach).Rwose saba imana imbabazi zo kubeshya abantu kandi tukuzi.

      • Umufaransa witwaga Voltaire yaravuze ngo:”La politique c’est l’art de mentir” (Politics is an art of lying).Bisobanura ngo Politique ni ubuhanga bwo kubeshya.Uyu urimo kurata iyi ngoma itegeka,icyababwira ukuntu yahoraga arata Habyarimana amwita “umubyeyi w’igihugu”.Nta kabuza na Kagame navaho azamuvuga nabi.Uretse ko mbona ashaje azaba yarapfuye.Nyamara yitwa umukristu “Boniface Rucagu”.Abakristu baragwira.Usanga muli Politike benshi bahitamo amanyanga,kubeshya,corruption,gusingiza ibukuru,etc…bishakira umugati (national bread).Imana ntacyo ibabwiye.Ariko bajye bibuka ko izabibabaza kuli wa munsi dutegereje w’urubanza.Rucagu arashaje,narekeraho “amaco y’inda”,yirire imitungo myinshi yavanye ku ngoma 6 yariye nkuko umwanditsi yavuze.

  • Hahahahahahaaaaa…!!!

  • Bwana Rucagu Boniface isazire neza rwose wagize igihe cyawe ; turagushimira umusanzu watanze wo kwubaka u Rwanda. Icyo abato twakwigiyeho ni ukumenya guhindura indimi bitewe n’igihe ndetse n’aho ugeze kugirango ubuzima bukomeze.

  • Hhhhh! Aliko Rucagu azasiga umugani kabisa! Buriya no kwa Habyarimana niko yamubwiraga! Njye narumiwe koko!
    KAZITUNGA.rw

  • hahahah ubu na kagame avuyeho wamuvuga nabi
    Genda uzi kwihahira

  • Ikibazo dufite gikomeye muri afurika ni abantu nk’aba bitwa “Nkeje uwimye” Niyo mpamvu kandi abantu nk’aba aribo batuma ba president benshi bamera nka ba Bashir kuko iyo bavuyeho nabi babajyana babo nka ba Rucagu baba barabagiriye inama mbi cyangwa ntibayibagire.

  • Haaahaaa!Abigaga Janja mu Ruhengeri muri 1992 mukwa kabiri ku italiki ngirango ya 17 yaduhaye ikimasa ngo amashyaka naza tuzamutorere umubyeyi MRND. Icyo kigo cyayoborwaga na Padiri Patrice kumunsi wa St Patrice. Politique ni umukino mwiza. Rucagu is mature politician.

  • hhhhh ,uratubeshye ariko ,urasetsa gusa ngo izindi ngoma zarakuriye hhhhhh, yewe jya ushima Imana wisaziye neza politique itaguhitanye dore ko nayo yica kurusha wa mubu utera marariya menya irusha na sida. abo mwatangiranye bamwe imva zarasibye abandi bagiye guhera ishyanga , isazire neza mzee politique nubwo tutayibamo ariko turayizi ni umukino wa macenga y’ikinyoma gusa gusa gusa ntigira umwanzi uhoraho nta n’umukunzi uhoraho muri politique

  • Umva ko ari ukurya nyine!!

  • Ariko uyu musaza aravuga ukuri pee natwee ingoma ya Habyarimana ntacyo yatumariye pee natwe yaraturiye pee ariko iya Kagame nikimwe kimwe ntawe iheza nutabibona direct bimugeraho muburyo bwa indirect ariko pee Kagame niwe twe tubara duhereyoho mubayoboye u Rwanda

  • hhaahhhaa, sans blague!?, mbega umusaza, uwagushyira ahantu ntuzongere kuvuga kuko urimo kuyobya abato bazumva ibinyoma byawe

  • Ibi bwana Rucagu avuze Biramutse ar byo nta kindi gisobanuro abamuzi kuva kera babibonera usibye ko yaba yaratinze kumenya kurya. Kugaburirwa na ziriya ngoma zose ariko ntarye cyangwa ngo ahage. Abapfuye barihuse!!! Tumusengere ingoma y’ubutaha izamusange i musozi. Ab’icyo gihe barahishiwe. Uwamenya amateka ye mu buyobozi mbere yo kuba intore yatwibutsa. Icyiza muri byose ni uko ingoma zigenda akiyakira ubuzima bugakomeza kandi akaba ativurunga mu mabi y’izo ngoma zose. Ibyo bibere urugero abandi bayobozi bigira inkozi z’ikibi. Abo iyo ubutegetsi buhindutse usanga bigize ibitambambuga ngo barohejwe. Baba mu buhungiro cyangwa mu gihugu. Wasobanura ute ukuntu waba warabaye mu bushorishori bw’ubutegetsi wabazwa ibyo wakoze bigaragara uti ni Perezida. Iyo ni indwara ikomeye cyane muri iki gihe. Bayobozi mujye mukora ibyo muzabazwa ibindi mubireke. Murakoze.

  • Ubwo buhezanguni nibwo bituma tudatera imbere.

  • Uyu musaza ndamwemera, azi gucagagura amagambo, akayacurika akayacuranura maze abaswa ntibarabukwe. Rucagu kubamenyereye imvugo ze uhera inyuma ukajya imbere, buriya aba ashatse kubabwira ko yabaye mu ngoma 4 imwe ikaba ariyo atakamishije neza, iyo atabashije gutamiraho ni iya cyami gusa naho guhera kuri Kayibanda, Habyarimana, no kuyo turimo ubu hose yarakamiwe, nubwo gukamira umuhanya ari ukurigusha yigira hirya akayagaya akayita uduta.
    Nubu haje abandi nabwo yavugako aribo bantu naho abamubanjirije bari utuntu, ngiyo politiki y’uruvu imwe tujya tunita ventriotism kuko uyishyize imbere areba aho bakamye cyangwa benze akahatura igisingizo.
    Kubwa Habyarimana, Rucagu yari umurwanashyaka ukomeye wa muvoma, imidari n’imyenda iriho ishusho ya Habyara ntiyamuvagaho, nubu mubonako yahinduye umuvuno agahindura ushushanyije ku myambaro gusa, ese koko ubu yizerako yaduheza? Turakuze mushumba winda, ubu nuko twavugako upfobeje ubundi wakaniyise umucikacumu wa genocide yakorewe abatutsi, mbabajwe n’urubyaro rukwigiraho.

  • RUCAGU MUMUREKE AZI IBYO ARIMO! GUSA RWABUGILI NI MWENE RWOGERA SI GAHINDIRO. UYU IYO ABAHO KU NGOMA YA RWABUGILI, YARI GUTANGWA KUKO RWABUGILI NTIYAKUNDAGA AMACABIRANYA NO GUCA KU RUHANDE!

  • Mutagatifu Cyprien Rugamba ati: “inda nini Muzo me amayira… nimuzine amayira!”
    Ubu disi iyi ihirimye yazavuga ko pension arimo Arya ari iy’igezweho ko izindi zamuriye! Abantu nk’aba ndabatinya

Subiza

Your email address will not be published. Required fields are marked *