• 24/01/2020 1:49 03

Mwendo: Babonye Ivuliro ariko rifite abavuzi babiri gusa

Abatuye mu Kagari ka Kigarama, Umurenge wa Mwendo mu Karere ka Ruhango bavuga ko bafatanyije na Leta bubatse Ivuliro ariko bakaba bakeneye ko rihabwa abakozi kuko ubu rifite abavuzi babiri gusa rikanegerezwa amazi meza. Habarurema Valens Umuyobozi w’aka Karere avuga ko bagiye gukemura iki kibazo vuba.

Umuyobozi w'Ikigo nderabuzima cya Gishwero kireberera iyi Poste de santé arereka abashyitsi ububiko bw'imiti.
Umuyobozi w’Ikigo nderabuzima cya Gishwero kireberera iyi Poste de santé arereka abashyitsi ububiko bw’imiti.

Aba baturage babwiye Umuseke ko bamaze igihe kinini batagira Ivuliro kuko babanje kwifashisha inzu y’umuturage bakodeshaga ibihumbi 20 by’u Rwanda buri kwezi.

Bavuze ko kuba noneho bafite Poste de Santé izajya ituma badatanga amafaranga menshi bajya cyangwa bava mu kigo nderabuzima kiri kure yabo.

Nyuma y’uko iri vuriro ryuzuye babigizemo uruhare rutaziguye ubu icyo bifuza ni uko rihabwa abaganga babifitiye ubushobozi nk’uko bivugwa na Mutimukeye Anita umuturage wa hano hafi yaryo.

Ati “Ntidukeneye abatuvura babishoboye gusa tunakeneye amazi kuri iri vuriro.”

Nyirarukye Adeline  Umuyobozi w’Ikigo nderabuzima cya Gishwero, avuga ko kuri iyi poste de sante nshya hari abakozi babiri gusa barimo uvura abarwayi n’usuzuma ibizamini.

Ngo iyo abarwayi babaye benshi bohereza umukozi umwe uturutse ku kigo nderabuzima kugira ngo abatere ingabo mu bitugu.

Ivuliro rya Kigarama muri Mwendo ni igisubizo gikomeye ku baturage ariko rifite abakozi babiri gusa
Ivuliro rya Kigarama muri Mwendo ni igisubizo gikomeye ku baturage ariko rifite abakozi babiri gusa

Umuyobozi w’akarere ka Ruhango Habarurema Valens avuga ko bagiye gushaka uko bakemura ibi bibazo byombi.

Ati “Tugiye gukwirakwiza amazi meza mu bice bitandukanye byo muri aka Karere, tuzanongera imiyoboro y’amazi.”

Ko mu bihe bya vuba bagiye kongeramo abakozi ndetse n’ibikoresho by’ibanze mu Ivuliro kugira ngo abarwayi bahabwe serivisi zinoze.

Utugari 59 tugize Imirenge 9 y’Akarere ka Ruhango, 14 muri two ntidufite Amavuliro aciriritse(Poste de Santé), Ubuyobozi bw’Akarere buvuga ko amavuliro 4 ariyo ateganyijwe kubakwa umwaka utaha wa 2020.

MUHIZI Elisée
UM– USEKE.RW/Ruhango.

1 Igitekerezo

  • Nibuka uwitwaga BARIHUTA Aimé wari mayor afata ijambo akavuga ngo ni inyuma y’igihugu kubera imisozi ya za kanyarira idukikije. Batangiye kuvuga amazi muri 1999, ubwo twajyaga kuvoma kuri primaire de Mwendo tuvuye ku Gitwa! Ubu se nibwo babonye ko byihutirwa? Gukora ibirometero ufite ijerekani ku mutwe? Maze bijya gupfa bubaka ivuriro, ibiro by’umurenge na sacco abaturuka I Mwendo tugirango tuzabana imirimo, ntitwanamenye igihe akazi katangiwe ngo hari n’abavuraga batarize ubuganga barashyizwemo na bene wabo. Nta kintu kizima mbona ino, uretse kubona baza mu kazi saa Sita, bakurira za moto bagataha saa Saba. Ni inyuma y’igihugu koko!

Subiza

Your email address will not be published. Required fields are marked *