• 28/01/2020 9:16 02

Muvara w’imyaka 78 n’umukecuru we, bararana ku mashara

Iburasirazuba – Muvara afite ubumuga bw’ingingo kubera izabukuru, we n’umukecuru we nta sambu bafite, nta bana, nta n’imbaraga zo gukorera ubuzima. Baba mu nzu nto batekeramo, bakariramo bakaranamo n’ingurube, nta bwiherero, baryama ku mashara, nta epfo nta ruguru. Ubuzima bubi barimo ngo babuterwa n’uko bari mu kiciro cya kabiri cy’Ubudehe.

Aho wakwita muri 'salon' niho batekera, niho barira ni naho harara ibibwana by'ingurube bafite
Aho wakwita muri ‘salon’ niho batekera, niho barira ni naho harara ibibwana by’ingurube bafite

Ugirashebuja Muvara Elias w’imyaka 78 n’umukecuru we baba mu kagari ka Gituza mu murenge wa Rukumberi mu karere ka Ngoma, ntibagishoboye guhingira amafaranga kandi nta n’aho guhinga habo bafite.

Mu nzu y’icyumba kimwe bararamo ku rutara ruriho amashara yorosheho umusambi, nta cyo biyorosa. Ikindi (cyakwitwa uruganiriro) kiraramo ibibwana bitandatu by’ingurube biba biziritse hafi y’iziko batekeraho ari naho batereka ibyo batekamo n’ibyo bariraho iyo babonye ifunguro.

Muvara ati “ntunzwe n’abaturanyi, ndasaba nkabona barampaye nkabona burakeye, umukecuru wanjye nawe yagira icyo abona n’uko tukarya nta sambu mfite n’abana barashize ntabo mfite, banshyize mu kiciro cya kabiri niyo mpamvu mpfuye nabi.  Abandi bajya gufata amafaranga ngo yoherejwe n’umukuru w’igihugu njyewe ndeba. Mbayeho nabi rwose”.

Mukeshimana Eugenie uturanye n’uyu musaza n’umukecuru we yabwiye Umuseke ko aba baturanyi be bariho nabi kuko ahanini batungwa n’ibyo abaturanyi babahaye. Agasaba ko ubuyobozi bwagira uruhare mu kubitaho.

Niyonsaba Patricia uyobora Akagari ka Gituza avuga ko uyu muryango bagerageza kuwufasha binyuze mu isibo.

Ariko ubu ngo barasaba uyu musaza kujya ku biro by’Akagari bakamuhindurira ikiciro kugira ngo atangire agerweho n’inkunga za Leta ku bakennye kurusha abandi.

Uyu muyobozi w’Akagari avuga ko n’inzu arimo ari iyo bamusaniye iyo yari arimo igiye kumugwaho. Ngo nahindurirwa ikiciro azafashwa ku buryo buhoraho.

Rukumberi ni umurenge ukigaragaramo ibibazo bikomeye by’imibereho myiza y’abaturage.

Ibibwana by'ingurube birara hirya mu inguni inyuma y'amasafuriya
Ibibwana by’ingurube birara hirya mu inguni inyuma y’amasafuriya
Bo bakarara kuri uru rutara rushasheho amashara arengejeho umusambi
Bo bakarara kuri uru rutara rushasheho amashara arengejeho umusambi
Muvara ku myaka afite ngo ashaje nabi aryama ku mashara
Muvara ku myaka afite ngo ashaje nabi aryama ku mashara
Bamwubakiye inzu bibagirwa ubwiherero!
Bamwubakiye inzu bibagirwa ubwiherero!
Niyonsaba uyobora Akagari ka Gituza ngo uyu musaza nibamuhindurira ikiciro cy'Ubudehe bizakemuka
Niyonsaba uyobora Akagari ka Gituza ngo uyu musaza nibamuhindurira ikiciro cy’Ubudehe bizakemuka
Mukeshimana uturanye n'uyu muryangoa avuga ko ubayeho nabi cyane
Mukeshimana uturanye n’uyu muryangoa avuga ko ubayeho nabi cyane
Muvara imbere y'inzu ubuyobozi bw'Akagari buvuga ko bwamusaniye
Muvara imbere y’inzu ubuyobozi bw’Akagari buvuga ko bwamusaniye

Elia BYUK– USENGE
UM– USEKE.RW/Ngoma

0 Igitekerezo

  • Aha se ni mu Rwanda?

  • Inzu bamusaniye? Cyokora ndumiwe uretse n’ubujiji uyu muyobozi ntakwiye no kuyobora,buriya yabyumva neza ariwe uyirayemo n’umuryango we,uziko burya ngo uwaraye yijuse agirango n’abandi ni uko,maze kubona ko nubwo u Rwanda ruri kwiyubaka ariko igihe kigeze ngo ya migi yunganira Kigali abariyo ishyirwamo imbaraga bityo ibikorwa remezo byegere abaturage wenda ibi byaro nabyo byaboneraho

  • uwo gitifu wakagali kimwe nuwumurenge bagakuiriye kubibazwa kuko ntago begera abaturage ,bakabaye baragezz aho uwo muryango uba bakaba baranagikemuye batiriwe bategereza abazaza kubibabuira !!!!ese bamusanira ntibaribaziko arimikiciro kitamugenewe koko !!!nibyabindi bita itekinika kabsa gusa turabirambiwe kuko byanzz bikunze rapport yamugeragaho abona arimukiciro titamukwiriye ,nimukurikirane kimwe nabandi bashobora kuba bahari mubakemurire ibibazo mubashyire mubyiciro bibakuiye ,kandi yivugango azegere ibiro byakagali bamuhindurire ikiciro !!!ahubwo wowe jyayo umwegere ubimukorere kuko ashobora kuba adafite imbaraga zokuhagera .

  • Bamwe mubayobozi binzego zibanze barakabije mugutanga ibyiciro bidakwiye ababihabwa. Amafranga yubudehe afasha abatishoboye ntabwo ari ayaba se cg basekuru na aya leta nayo ivana mumisoro yabaturage. Rero nibatange ibyiciro biberanye nababihabwa. Kd turashima cyane itangazamakuru kuko rikora akazi kenshi kd rimo kuvugira ababikwiye.

  • Uyu musaza ashake umunyamategeko arege aba banyamakuru nikinyamakuru byamwandagaje bigeze hano. Aravanamo impanba yo kumushajisha neza. Naho abihaye abayobozi mubareke ntabwo agashahara kabo kagenewe kubaka inzu zabakene. Uretse ko muzi kuvuga kubera itangazamakuru biriya birabatangaje? Hari nabari inyuma yuriya musaza ahubwo musabe hahindurwe politik zimwe na zimwe zituma bamwe barushaho gukira mu gihe abandi barushaho gukena. Ubusumbane mu mishahara, ikimenyane no kwiharira mu itangwa ryakazi namasoko, etc. Ibyo nibikemuka nibyaro bizazamuka nihere no kuri uriya musaza nabandi. None c bariya bamutangira ubuhamya bo ngo abayeho nabi bo murabona basa bâté? Tekerereza noneho niba aribo babayeho neza!

  • Ariko se uyu muyobozi w’akagari ntashobora guca bugufi agasangas uyu musaza aho atuye agafata imyirondoro ye bakamuhindirira icyiciro cy’Ubudehe kurusha kuvuga ngo aze gutonda kukagali?

  • Amashala n’ijambo riva muri kivu mu bahavu. Bafite urutara kuki batahira cg ngo bashake mu rutoki ngo bashyireho ikirago, umusambi bajye gushaka ikiringiti cya 1000frw maze ngo baryame? Hari abanyarwanda basigaye basigaye batega intoki gusa ese twe twakuze turyama kuri Matolas? Iyo miteto bajye bayituvanaho.Buriya bashobora kuba bari muri Farg. Wubaka urutara, ugashyiraho ibijangara, ugasasa,umusambi ukarenzaho uburingiti ubundi ukabyuka ujya guhinga kuko umulimo ari uguhinga ibindi bikaba amahirwe.

  • Hari abantu benshi mu Rwanda babayeho nabi kurusha uyu ariko bagira imana bagaca incuro ku munsi bagateraranya bagahumeka. Ese nabo babahindurire ibyiciro kuko nabo nibasaza bazisanga kilwe n’uyu musaza.

  • Mbega inkuru!
    Ndumiwe.
    Umuseke murakoze gutabariza uyu musaza.

  • Umuseke Murakoze . Mugira neza kumvikanisha ibibazo byugalije abaturage nkaba batishoboye batagira ubavuganira. Bituma ubutegetsi byo hejuru bumenya ibibera mu bwibanze. Kandi koko ngo umwana apha mwiterura.

  • Nyamara ngo atunze ibibwana by’ingurube 6 ubwo na nyina ya 7 abasha kugaburira ariko ngo atunzwe n’abaturanyi , yamugaye ingingo,n ibindi ! ikibwana kimwe cy ‘amezi 2-3 ni 30-50K abamufasha barebe niba ntacyo byakunganira,sinanze ko abantu bafashwa ariko ibi ababyiruka biradutera kwibaza ngo nzasaza nsaba leta kumfasha harya igihe nari nshoboye nakoze iki cyazamfasha gusaza ntandavuye? ayo masibo amufasha yigishe n’abandi ibi si indagagaciro za gitore!

  • Ariko abantu barateta koko. Umuntu yagira ibibanza b’ingurube 6 na nyina maze akarya ariko asabye ! Ubwo se izo ngurube nazo arazisabira? Yaryama atiyoroshe se atanze ikibwana kimwe yabura ibiringiti 2? Cyangwa iyi nkuru ni impimbano!

Subiza

Your email address will not be published. Required fields are marked *