• 11/12/2019 11:33 47

Mutabazi uyobora Bugesera yatowe nka Chairman wa FPR-Inkotanyi mu kagari ke

Abanyamuryango ba FPR-Inkotanyi bakomeje gutora komite Nyobozi ku rwego rw’akagari kuko iyariho isoje manda, mu Mudugudu wa Rwangara, mu Kagali ka Kazanze mu Murenge wa Ntarama, batoye Mayor Richard Mutabazi ku mwanya wa Chairman.

Nyobozi y’Umuryango FPR-Inkotanyi mu Kagali ka Kanzenze mu Murenge wa Ntarama iyobowe na Richard Mutabazi usanzwe ari Mayor wa Bugesera

Richard Mutabazi yari yatowe ku rwego rw’Umudugudu wa Rwangara nka Chairman yanagiriwe ikizere mu Kagali ka Kanzenze.

Yavuze ko ashima ikizere yagiriwe ariko ngo kubera ko yongeye gutorwa ku nshuro ya kabiri kuko na mbere ari we wayoboraga FPR-Inkotanyi ku rwego rw’Akarere bimuha inshingano yo gukora cyane.

Bimwe mu bikorwa yavuze azashyira imbere n’abanyamuryango ba RPF Inkotanyi ngo ni ukubaka ibikorwa remezo haba mu gushyira imbaraga mu buhinzi n’ubworozi, kubaka imihanda, ibibuga by’imikino n’ikoranabuhanga kandi ngo bazita ku bikorwa bishyigikira imibereho y’abaturage nk’uko biri muri gahunda y’imyaka 7 ya Leta.

Ku kibazo cy’amazi cyabaye ingutu muri Bugesera, Richard Mutabazi ati “Turifuza ko muri uyu mwaka n’utaha dukemura ikibazo cy’amazi mu Karere ka Bugesera kuko ni ikibazo k’ingutu ariko kidakwiye gukomeza, dufite imigezi itatu ituzengurutse, dufite ibiyaga 9 nk’abanyamuryango ba RPF –Inkotanyi twiyemeje ko nibura mu mwaka utaha tuzaba twakemuye ikibazo ku gipimo cya 80%.”

Komite Nyobozi yatowe ku rwego rw’Akagali igizwe n’abantu barindwi barimo Chairman, Vice Chairman, Umunyamabanga, Komiseri w’Imiyoborere myiza, uw’Imibereho myiza, uw’Ubukungu na Komiseri w’ubutabera.

Umwe mu baturage batoye yavuze ko mu kagari kabo bifuza ko Mutabazi azabakorera neza imihanda yakozwe na VUP agashyiraho imiyoboro itwara amazi.

Ku wa Gatandatu utaha hateganyijwe amatora ya Komite Nyobozi y’Umuryango FPR-Inkotanyi ku rwego rwa buri Murenge, azitabirwa n’abatowe ku rwego rw’Akagali, abatowe bamara imyaka itanu.

Komite yatowe ku Kagali niyo izajya guhatana ku rwego rw’umurenge bikazazamuka kugera ku Karere
Abatoye Mutabazi Richard bavuze ko bifuza ko abakorera umuhanda wa VUP akawushyiraho imiyoboro y’amazi

UMUSEKE.RW

3 Ibitekerezo

  • Aliko mujye mureka kutubeshya ngo amatora! Turabizi ko ariwe uzatorwa nka chairman mu Karere ubwo rero ntimukirushye mutubeshya ngo yatowe!
    Muzabyite ukundi ariko apana amatora! Njye aya matora sinayajyamo kuko mbere y’uko aba uzatorwa kugera ku ntara aba azwi!

  • Tugikina agapira tukiri abajene, twajyaga dutera urwenya rw’ukuntu ukina adahereza abandi umupira abanza gucenga adversaire umwe, babiri cyangwa batatu bitewe n’ubuhanga bwe, byagera aho agacenga ibyatsi, bikarangira nawe yicenze. Abacenga kuva ku izamu kugera ku rindi bakanatsinda, bakabisubiramo bikongera bigakunda, ntabwo ari benshi. Ni nka ba Messi cyangwa ba Maradona. Kandi akenshi nabo bagwa mu bicamurundi bya ba myugariro baba bashinze ibirindiro imbere y’izamu ryabo. Ahaa!!

  • harya tuzihangire imiromo hari abafite imyanya igihumbi Muri reta Ngo akazi karabuze.

Subiza

Your email address will not be published. Required fields are marked *