• 20/01/2020 4:37 56

Musanze: Hari abana birirwa bashakisha ibyuma mu kimoteri

Bamwe mu babyeyi bo mu murenge wa Cyuve, ahari ikimoteri kijyanwamo imyanda yose yo mu mujyi wa Musanze ndetse no mu nkengero zawo, bavuga ko bahangayikishijwe cyane n’abana babonamo birirwa muri iyo myanda bakuramo bimwe mu byajugunywe bashaka kubigurisha.

Hirirwa abana bashaka ibkoresho byashaje

Abo bana ngo iyo babajijwe icyo baba bashakisha muri iyo myanda, ngo basubiza ko baba bashakamo ibikoresho byaba byaratawe bikiri bizima [ibyo bita ngo ni Bolo] ndetse n’ibyuma bishaje [ngo bita Injyamani] kugira ngo babigurishe.

Umuturage witwa Mukantwali Vestine; yabwiye Umuseke ko akunze kunyura mu nzira iri hafi y’icyo kimoteri buri gihe agiye cyangwa se ava mu mujyi wa Musanze aho aba yagiye gushakira imibereho, ngo nta gihe na kimwe atabonamo abana batarera imyanda imwe ku ruhande ngo bigaragara ko hari ibyo bari guhigamo.

Yagize ati: “Nyura muri iyi nzira kenshi, ariko buri gihe hano haba harimo abana ubona bafite ibiti cyangwa se ibyuma bagenda baterera amasashi n’ibintu by’ibicupa hejuru, ukibaza icyo baje gushaka muri ibi bishingwe bikakuyobera, gusa ariko nyuma naje kumenya ko ngo baba bashakamo za bolo (imari) kuko ngo hari abagura bimwe mu byo bakuyemo.”

Undi witwa Karekezi na we avuga ko kuva icyo kimoteri cyahashyirwa, hadasiba kugaragara abana bashakisha bimwe mu bikoresho, kuri we abona ko kuba hajyamo abana akenshi biterwa n’uko cyuzuye ndetse kikaba kitazitiye mu rwego rwo gukumira ko bajyamo, ikindi ngo ntabwo imzibi zacyo zigaragara neza kubera ko usanga hose mu mpande bisandaguje.

Aragira ati: “Ntabwo abana bigeze basiba kuza hano ubona basandaguza imyanda basa n’abafite icyo bashaka. Gusa njye mbona biterwa n’uko abagishyize hano batibutse kuhazitira kugeza ubu urabibona ko cyuzuye”

Bakomeza basaba ko hakorwa ibishoboka hakazitirwa kugira ngo abo bana bajyamo hatazagira abahandurira indwara kubera ko kiba cyarazanywemo imyanda myinshi kandi yubwoko butandukanye.

Ku kibazo cy’iki kimoteri, umyobozi w’akarere ka Musanze, Habyarimana Jean Damascène avuga ko hari gahunda iri vuba bafitanye n’ikigo WASAC ndetse binitezwe ko izakemura izi mpungenge zose.

Yagize ati: “Ikimoteri cya Cyuve ntabwo cyubakiye, ariko hari gahunda ya vuba n’umufatanyabikorwa wacu WASAC, twamaze kumvikana byose kugira ngo abe ari bo bazubaka ikimoteri cyiza kandi kitazabangamira abantu. Ingengo y’imari yacyo yarateguwe ndetse no ku wa 30 z’ukwezi gushize (Ukwakira) twabahaye imbanzirizamushinga y’aho kizubakwa kugira ngo ba nyiri ubwo butaka bw’aho kizubakwaa bazabone ingurane.”

Akomeza avuga ko bitarenze mu Ukuboza k’uyu mwaka kizaba cyabonetse, ndetse ngo kizaba cyubatse mu buryo bwiza aho ngo hazajya batandukanywa imyanda ibora n’itabora hanyuma ibora ikaba yakuwamo ibindi nk’ifumbire cyangwa ibicanwa.

Mayor wa Musanze, asaba ababyeyi kwita cyane ku burere bw’abana babo bwa buri munsi, kugira ngo na bo (ababyeyi) bagire uruhare runini mu kubabuza kujya muri iyo myanda; banababwira ingaruka mbi bashobora gukuramo, ndetse ngo bajye banakurikirana imyigire yabo kugira ngo bajye bajya ku ishuri haveho ko ahandi ndetse no kuri icyo kimoteri hagaragara abana.

Ababyeyi bafite impungenge ko hari uburwayi aba bana bashobora gukura muri iyi myanda

Emile D– USENGE
UM– USEKE.RW

Subiza

Your email address will not be published. Required fields are marked *