Musanze FC yabimburiye izindi kipe gukingiza COVID-19 abakinnyi n’abayobozi | UMUSEKE

Musanze FC yabimburiye izindi kipe gukingiza COVID-19 abakinnyi n’abayobozi

Uyu munsi ku Bitaro Bikuru bya Ruhengeri mu Karere ka Musanze, habereye igikorwa cyo gukingira abakinnyi ndetse n’abayobozi b’ikipe ya Musanze Football Club ni urukingo rwa mbere rwa Covid-19 bahawe.

Musanze FC yabimburiye izindi kipe gukingiza abakinnyi bayo bose

Iki gikorwa cyatangiye ku munsi w’ejo aho, umuyobozi w’ikipe ya Musanze FC Tuyishimire Placide  ndetse n’umuvugizi w’ikipe Ibrahim bakingiwe urukingo rwa mbere rwa Covid-19, bahita batangaza ko abakinnyi ndetse n’abatoza n’abandi bayobozi b’iyi kipe bakingirwa uyu munsi tariki 6 Werurwe.

Kuri Twitter, Ubuyobozi bw’ikipe ya Musanze FC bwatangaje ko abakinnyi ndetse n’abatoza bahawe urukingo rwa mbere rwa Covid-19.

Banditse ngo: “Mu gitondo cyo kuri uyu munsi abakinnyi ndetse na ‘staff’ y’ikipe ya Musanze FC bahawe urukingo rwa mbere rwa Covid-19.”

Musanze FC ibaye ikipe ya mbere hano mu Rwanda ikingije abakinnyi bayo ndetse n’abayobozi nyuma y’uko inkingo za  Covid-19 zigeze mu Rwanda hagati muri iki Cyumweru.

Nkuko bigenwa n’amabwiriza ya RBC ndetse n’abatanga inkingo ku isi, abakinnyi ndetse n’abayobozi ba Musanze Fc bamaze gufata urukingo rwa mbere rwa Covid-19, bazongera gufata urwa kabiri iminsi 28 ishize.

U Rwanda rwabonye inkingo 347,000 zatanzwe binyuze muri gahunda ya Covax, zirimo inkingo 102,960 zo mu bwoko bwa PfizerBioNTech, zageze i Kigali ku mugoroba wo ku wa Kabiri, n’izindi inkingo 240,000 zo mu bwoko bwa AstraZeneca zaje kuri uwo munsi, hari n’izindi 50, 000 zatanzwe n’Ubuhinde.

ISHEMA Christian / UMUSEKE.RW

Subiza

Your email address will not be published. Required fields are marked *