• 11/12/2019 10:53 48

Abagore bafungiye i Ngoma barifuza ko kurekurwa by’agateganyo bihabwa benshi

Muri gereza y’abagore ya Ngoma mu karere ka Ngoma mu Burasirazuba bw’u Rwanda kuri uyu wa gatatu hatangiwe ibiganiro byahariwe icyumwweru cy’ubutabera aho abagororerwa muri iyi gereza bavuze ko bashima uburyo bahabwamo ubutabera ndetse ngo banahabwa umwanya uhagije wo gusoma dosiye zabo.

Nirere Madeline Perezida wa Komisiyo y’Igihugu y’Uburenganzira bwa muntu, avuga ko ashimira inzego z’ubutabera n’urw’Abagororwa (RCS) uburyo bafasha imfungwa n’abagororwa

Bavuga ko ikibazo bafite ari uko umubare w’abasaba gufungurwa by’agateganyo (Liberation Conditionnelle) abenshi batabyemererwa kandi baba bujuje ibisabwa.

Imfungwa n’abagororwa bagera ku 1 390 bagororerwa muri Gereza y’abagore ya Ngoma, bahawe ibiganiro ku butabera binyuze muri gahunda y’icyumweru cy’ubutabera.

Umuyobozi wa Gereza y’Abagore ya Ngoma SSP Marie Grace Ndwanyi yavuze ko bakora ibishoboka byose ngo ubutabera bw’abafungiye hano bwubahirizwe haba mu gukurikina dosiye zabo n’ibindi.

Ati “Ubutabera nyabwo ni umusingi udufasha muri gahunda yo kugorora, abagororwa bose bamenyeshwa dosiye zabo kuko dufite icyumba kirimo ibyangombwa byose bibafasha gusoma dosiye zabo kugira ngo mu gihe bagiye kuburana babe barasobanukiwe neza ibyo baregwa.”

Musemayire Layisa, mu izina ry’abafungiye muri Gereza y’abagore ya Ngoma yavuze ko bishimiye ubutabera bahabwa gusa agaragaza ko babangamiwe no kuba umubare munini w’abasaba gufungurwa by’agateganyo ku uwakatiwe (Liberation Cinditionnelle) benshi batabihabwa.

Ati “Tubona ubutabera bwuzuye, dusoma dosiye zacu dukoresheje ikoranabuhanga, dusurwa n’inzego z’Ubushinjacyaha buri mezi atatu, abafite ikibazo mu madosiye bagasubizwa.

Ikifuzo dufite ni uko imibare y’abahabwa “liberation conditionnelle” imibare yabo yiyongera,  ni bakeya ugereranyije n’umubare w’ababa basabye.”

Ubundi uhawe gufungurwa mu buryo bwa Liberation Conditionnelle mu Rwanda asabwa guhora yitaba Ubushinjacyaha, ku Rukiko rw’ibanze rumwegereye inshuro imwe mu kwezi kugeza igihe igihano yahawe kirangiye.

Nirere Madeline Perezida wa Komisiyo y’igihugu y’Uburenganzira bwa Muntu yavuze ko hari ibisabwa kugira ngo ube wafungurwa utarangije igihano, akaba ashimira inzego z’ubutabera n’urwego rw’amagereza mu Rwanda uburyo bita ku mfungwa n’abagororwa.

Ati “Hari ibiteganywa n’amategeko kugira ngo ubone ‘liberation conditionnelle’ birimo imyitwirire myiza n’igihe bisaba ugomba kuba urangije. Inzego zirakora zizabirebaho, ndashimira RCS n’inzego z’ubutabera.”

Mu basaga 1390 bafungiye muri Gereza y’abagore ya Ngoma, abafungiwe Jenoside ni 651 barimo abagabo n’abagore, abashinjwa ibyaha bisanzwe ni 731, abafunzwe barangije kuburana bari mu kiciro cy’abo bita abagororwa ni 1205, abasigaye bari mu kiciro cy’abakiburana bagera ku 113.

Insanganyamatsiko y’icyumweru cy’ubutabera iragira iti “Sobanukirwa kandi ukumire ibyaha by’inzaduka mu muryango nyarwanda.”  Iki cyumweru cyatangiye tariki ya 18 Werurwe kizarangira tariki 22 Werurwe 2019.

Abayobozi n’abafatanyabikorwa batandukanye bari muri iki gikorwa

Elia BYUK– USENGE
UM– USEKE.RW

Subiza

Your email address will not be published. Required fields are marked *