• 15/12/2019 8:33 57

Muhanga: Mayor yasigiwe umukoro w’ibibazo agomba gukemura mu minsi ya vuba

Mu gihe cy’iminsi itanu itsinda ry’Abadepite rimaze  rizenguruka mu Mirenge igize Akarere ka Muhanga, ryasanze hari ibibazo byinshi  birimo n’umwanda ukabije Mayor n’abo bafatanya bagomba kwitaho.

Bamwe mu Banyamabanga Nshwingwabikorwa b’Imirenge 12 ya Muhanga bakurikiranye ibiganiro byabaye nijoro

Hon Ngabitsinze Jean Chrysostome Umuyobozi w’iyi Komisiyo yasomye inyandiko ndende ifite Paji umunani zerekana ibyo Komite Nyobozi n’abo bafatanyije bakwiye gukemura.

Hon Ngabitsinze Jean Chrysostome avuga ko hari umuturage witwa Nyambera Donata wo mu Murenge wa Rugendabali  Umuyobozi w’Akarere yemereye inka y’ibihumbi 500 kubera ibikorwa by’indashyikirwa yakoze akaba kugeza n’ubu atarayihabwa.

Hakaba n’ibibazo by’abaturage benshi mu Mirenge itandukanye bangirijwe n’imirimo yo kubaka urugomero rwa Nyabarongo ndetse n’abo amasambu yabo yanyujijwemo ibikorwa remezo ntibahabwe ingurane.

Ngabitsinze yavuze ko hari ikibazo cy’ubuharike mu Murenge wa Nyabinoni, aho abagore bato bambura imitungo abakuru basanze mu ngo.

Ikibazo gikomeye iyi ntumwa ya rubanda yatinzeho ni umwanda ukabije ugaragara muri za Resitora ziherereye mu Murenge wa Shyogwe.

Yagize ati: “Muri uyu Murenge twanahasanze umugabo ufite ibagiro iwe mu rugo, twasabye ko rifungwa.”

Aba Badepite bavuga ko hari n’undi muturage mu Murenge wa Nyarusange witwa Uwimana Donata wahawe ibihumbi 80Frw ku ngurane kandi yagombye guhabwa ibihumbi 800Frw.

Banavuze umwenda urenga miliyari RSSB, icyahoze ari RAMA bifitiye ibitaro bya Kabgayi na bimwe mu bigo nderabuzima umaze imyaka myinshi utishyurwa.

Cyakora bavuze ko hari inzu zubatswe mu Mudugudu wa Munyinya zifite ishusho nziza n’abandi bagomba gufatiraho urugero.

Beatrice Uwamariya Umuyobozi w’Akarere ka Muhanga avuga ko hari ibibazo bireba Akarere n’ibindi bireba abafatanyabikorwa bakoze imihanda ariko akavuga ko bagiye gukemura ibiri mu bushobozi bwabo ibindi bigakorerwa ubuvugizi.

Umuyobozi w’ingabo mu Karere ka Kamonyi, Muhanga, Ruhango na Nyanza Col. Joseph Gishayija avuga ko bamaze igihe basaba inzego z’ibanze gukemura ibibazo bikarangira bidakemutse.

Gusa akavuga ko amahirwe bahawe ari yo ya nyuma ko hazakurira ibihano ku bazaba batabikoze.

Ikibazo kivugwa mu ikusanyirizo bongeye kukivugaho basaba Akarere ko bafasha abagize Koperative kuzamura abanyamuryango n’ingano y’amata ahagemurwa.

Hon Ngabitsinze Jean Chrysostome n’abari muri Komisiyo basabye Mayor kwita kuri ibyo bibazo.

MUHIZI ELISEE
UM– USEKE.RW/Muhanga.

2 Ibitekerezo

  • Izo ntumwa za rubanda ntako zitagize. Ariko ibibazo biri muri kariya karere ntabwo bishobora kurangira. Hari nibyakarengane igitugu kwikanyiza kunyereza umutungo wa Leta, amashyamba yarashize ntiwareba ariko byose igisubizo ntabwo cyahita kiboneka kubera kwigwizaho kwabayobozi binzego zibanze zaka karere kacu kuzuye ikimenyane guhohotera abantu, kdi kubera gushaka inyungu zabo. ubwo se bigeze bagera my birombe ngo barebe aho abayobozi bose bakarere bibera utibagiwe umuyobozi Waka karere, ntabwo byashoboka tuzahora muri urwo pe. Muhanga Muhanga ikwiye amasomo nyayo nubufasha

  • hhhhhh!!Bafite akanya bakareba imikorere y’akarere bakumirwa.kwitana bamwana,gucungana,Kubeshyerana
    no kurogana ahhh!Byagera mu gutanga akazi n’amasoko ho ni akarengane gusa.Muhanga we genda warakubititse

Subiza

Your email address will not be published. Required fields are marked *