• 14/12/2019 9:32 19

Muhanga: Ikusanyirizo ryakira Litiro 200 z’amata, izirenga 3000 ntawe uzi irengero

Aborozi bohereza amata mu ikusanyirizo ryo mu murenge wa Nyamabuye mu karere ka Muhanga bavuga ko amata agerayo ari litiro ziri hagati ya 200 na 600 kandi rishobora kwakira litiro 3 560 ku munsi. Andi mata ntibazi aho ajya. Bavuga ko ashobora kuba agurishwa ku ruhande n’abayobozi b’ikusanyirizo n’abandi babifitemo inyungu. Abadepite na bo babonye iki kibazo.

Ibicuba bimwe ntibiherukamo amata

Ni ukusanyirizo rya Koperative COEPREMU-ZIRAKAMWA. Umuyobozi wayo witwa Anastasie Uwimabera yabwiye Abadepite ko hari inyandiko nyinshi bandikiye ubuyobozi bw’Akarere ka Muhanga basaba ubufasha ngo bwo kumenya no gutangatanga abantu bacisha amata ku ruhande.

Abaturage bavuga ko kuva ririya kusanyirizo ryubakwa rigatahwa muri 2009  nta musaruro ushimishije ryigeze ritanga.

Mu rugendo itsinda ry’Abadepite rikorera mu Karere ka Muhanga ryasuye ikusanyirizo risanga ryakira litiro ziri hagati ya 200 na 600 ku munsi kandi ryakabaye ryakira izirenga 3000 ku munsi.

Ubusanzwe iriya Koperative icungwa ku bufatanye n’ubuyobozi bw’Akarere ka Muhanga.

Hon Jean Chrysostome  Ngabitsinze uyoboye Abadepite bari gusuzuma kiriya kibazo avuga ko hari ibyo Akarere kagombye kunoza byorohereza Koperative gukora neza.

Yongeraho ko  hari n’ibireba Koperative ubwayo birimo kongera umubare w’abanyamuryango n’aborozi bagemura amata.

Hon Ngabitsinze yavuze ko hari ibiganiro bazakorana n’Ubuyobozi bw’Akarere ku bibazo bitandukanye harimo n’ik’iri kusanyirizo.

Beatrice Uwamariya uyobora Akarere ka Muhanga yijeje ziriya ntumwa za rubanda ko bagiye gufatanya na Koperative mu bukangurambaga bwo kongera umubare w’aborozi bayigemurira amata kandi hagashyirwa ingufu mu kumenya igituma amata yagenewe ikusanyirizo atagera yo uko bikwiye.

Guverineri w’Intara y’Amajyepfo Emmanuel Gasana yanenze abikorera bo muri Muhanga ko badashyira ingufu mu guteza imbere ubworozi.

Yavuze ko bibabaje kuba Gicumbi irusha umukamo Muhanga kandi itayirusha inka nyinshi.

Mu Karere ka Muhanga habarurwa inka zirenga ibihumbi 50 habariwemo n’izatanzwe muri gahunda ya Girinka.

Umuseke ufite Kopi z’amabaruwa menshi ubuyobozi bwaza Koperative bwagiye bwandikira Akarere ka Muhanga bwifuza  gufashwa ngo hamenyekane igituma amata akenewe atagera ku ikusanyirizo.

Bamwe mu bagemurira amwe mu makusanyirizo yo muri Muhanga babwiye Umuseke ko iki kibazo kidashobora gukemuka kuko ngo abacuruza amata mu kajagari biganjemo abo mu miryango ya bamwe mu bakora  muri Njyanama y’Akarere.

Iri kusanyirizo rifite ubushobozi bwo kwakira litiro zirenga 3000 ariko ryakira izitarenga 600 ku munsi
Abadepite baganiriye n’abashinzwe iriya Koperative bavuga ko basabye ubufasha akarere ngo bamenye uburyo amata agurishwa ku ruhande ariko ntikabafasha
Hon Jean Chrysostome Ngabitsinze uyoboye Abadepite bari gusuzuma kiriya kibazo avuga ko hari ibyo Akarere kagombye koroherezamo Koperative gukora neza.

MUHIZI ELISEE
UM– USEKE.RW/Muhanga

1 Igitekerezo

  • Murigiza nkana. Ari ukugurisha amata ku ruhande ku giciro cyiza wifuza, ukanatahana cash yawe, ari no kugemurira koperative bakaguha make, kandi bakakuriha ukwezi kurangiye, rimwe na rimwe kukarenga, ibyoroshye ku mworozi cyangwa “umutunzi” ugemura amata ni ikihe? Ubwo murashaka guteza ikibazo nk’ikimaze iminsi mu birayi!!

Subiza

Your email address will not be published. Required fields are marked *