• 11/12/2019 10:33 57

Muhanga: Gushyingura mu kajagari biratuma amarimbi asatira inzu z’abaturage n’ibikorwaremezo

Mu Mugi wa Muhanga hagaragara amarimbi menshi amaze kuzura, abahatuye bashinja ubuyobozi ko  nta buryo bunoze bwo gushyingura bwashyizeho bikaba biri gutuma abantu bashyingura mu kajagari none amarimbi akaba ari gusatira inzu z’abaturage n’ibindi bikorwaremezo.

Hari abarara bikanga kubera kwegerana n’irimbi ryabasatiriye

Ibi byavuzwe n’abaturiye irimbi ry’i Munyinya mu Kagari ka Ruli, Umurenge wa Shyogwe mu Karere ka Muhanga, agace gaherereyemo Irimbi rishyingurwamo abitabye Imana benshi bo mu mugi wa Muhanga.

Bavuga ko hashize igihe gito iri rimbi ritangiye gushyingurwamo ariko ko rigiye kuzura.

Ngo  biterwa no kuba nta  murongo uhamye ubuyobozi bw’Akarere bwashyizeho butuma ubutaka bwagenewe gushyingurwamo bukoreshwa neza.

Viateur Habimana umwe muri aba baturage avuga ko Akarere kari gakwiriye kwegurira ba rwiyemezamirimo ibikorwa by’imicungire y’amarimbi aho gukorwa mu buryo bw’akajagari.

Ati “Irimbi ry’i Munyinya rimaze imyaka mike ritangiye gushyingurwamo,  none dore imva zirasatira inyubako z’abaturage n’Umuhanda Nyabagendwa mu gace gashyashya batangiye guturamo.”

Umutesi Laetita uturiye iri rimbi ry’i  Munyinya avuga ko nta gatotsi atora kubera ubwoba bwo guturana n’irimbi.

Umunyamabanga Nshingwabikorwa w’Umurenge wa Shyogwe, Habisnhuti Vedaste avuga ko hari ibaruwa baherutse kwandikira Ubuyobozi bw’Akarere basaba ko bafunga iri rimbi.

Ati “Dutegereje igisubizo kandi turizera ko vuba aha bagiye kuryimurira i Mbare.”

Umuyobozi w’Akarere ka Muhanga, Uwamariya Beatrice avuga ko hari ubutaka bwa hariya i Mbare bwateganyirijwe kwimurirwamo irimbi ndetse ko imirimo yo kuricunga izegurirwa abikorera.

Avuga ko abikorera bazacunga ririya rimbi, hari ibyo bagiye bumvikanaho bigamije kunoza ibikorwa byo gushyingura birimo kuba bazaba bafite imodoka itwara imirambo (Corbial).

Usibye Irimbi ry’Abihayimana rya Kabgayi, mu mugi wa Muhanga haboneka Irimbi rya Gihuma mu Murenge wa Nyamabuye n’iri ry’i Munyinya rigiye guhagarikwa.

Ibikorwaremezo biri gusatirwa
Abaturage bavuga ko bafitiye ubwoba kuba begereye irimbi

MUHIZI ELISEE
UMUSEKE.RW/Muhanga

1 Igitekerezo

  • Ahubwo aba batuye muri iyi nzu baragowe rwose. Kubyuka ubona ziriya mva uziko harimo imirambo, nawe wahorana ubwoba bw’urupfu pe. Nta rindi terambere.
    Bazashyireho cloture.

Subiza

Your email address will not be published. Required fields are marked *