• 11/12/2019 8:47 40

Muhanga: Bibukiye aho umututsi wa mbere yiciwe

Ubwo hasozwaga icyumweru cy’icyunamo Depite Kalinijabo Barthelemy, yabwiye abaturage ko mu Mudugudu wa Mugwato, Akagari ka Nyamirambo mu Murenge wa Rongi ari ho umututsi wa mbere yiciwe muri¬† Jenoside yakorewe Abatutsi.

Depite Kalinijabo Barthelemy atanga ikiganiro

Depite Kalinijabo uvuka muri ako gace, avuga ko ari na ho uwari Minisitiri w’Urubyiruko ku butegetsi bwa Habyarimana, Nzabonimana Callixte akomoka.

Avuga ko ari we washishikarije abahutu kwica bagenzi babo b’abatutsi bica umututsi witwa Kalisa Vedaste ku ikubitiro.

Ati ”Umututsi wa mbere yiciwe muri aka gace mu birometero bike uvuye aha turi, abaturage babibwiye Burugumesitiri wa Nyabikenke aho kumuhana aramuhemba.”

Avuga ko guhera uwo munsi ari bwo abatutsi bameneshejwe abacitse ku icumu bahungira mu bindi bice. Anavuga ko uwatinyuye uwo muturage wishe umututsi bwa mbere muri Muhanga ari Minisitiri Nzabonimana Callixte akoresheje Burugumesitiri Anatole Karuganda wayoboraga Komini Nyabikenke icyo gihe.

Kankwanzi Mariana mu buhamya bwe avuga ko Minisiteri Nzabonimana¬† na Burugumesitiri Anatole Karuganda ari bo bategetse interahamwe ko zimwicira abana 6 n’umugabo.

Ngo yifuza ko muri gahunda yo kwibuka Abanyarwanda bakora buri mwaka, abakoze Jenoside bajya bahaguruka bagatanga ubuhamya babwira abato cyane uko byagenze kugira ngo bice inzirakarengane.

Yagize ati ”Byaba byiza umunsi nk’uyu abantu bumvise ubuhamya bw’abakoze Jenoside bakavuga impamvu yabibateye.”

Musenyeri Mbonyintege Smaragde n’izindi nzego bitabiriye uyu muhango¬†

Umuyobozi w’Akarere, Uwamariya Beatrice yasabye ababyeyi ko baha abana uburere bwiza batozwa n’ubuyobozi Abanyarwanda bafite kuri ubu budashyigikiye amacakubiri nkuko byakozwe n’ingoma yasaritswe n’ingengabitekerezo ya jenoside.

Ati ”Abari gukiza abaturage nibo batanze itegeko ryo kwica, mwigishe abana mubyara urukundo n’uburere bwiza babukurane.”

Inzego zitandukanye zitabiriye gahunda y’isozwa ry’icyunamo n’imiryango yabuze ababo, babanje kunamira abatutsi barenga 700 biciwe i Rongi.

Abatuye i Rongi bavuga ko Min Callixte Nzabonimana na Burugumesitiri Anatole Karuganda bavuka muri aka gace
Kankwanzi Mariana wiciwe abana 6 n’Umugabo avuga ko Min Callixte Nzabonimana na Burugumesitiri Anatole Karuganda aribo bashishikarije interahamwe kwica abatutsi
Depite Kalinijabo Barthelemy yunamira abatutsi bazize Jenoside

MUHIZI ELISEE
UM– USEKE.RW/Muhanga.

Subiza

Your email address will not be published. Required fields are marked *