• 18/01/2020 6:48 28

Muhanga: Basabiye ibihano bikomeye abangiza ibitembo by’amazi 

Abatuye mu Mujyi wa Muhanga basabye ko ibihano bishyirwaho ku bangiza ibitembo by’amazi bishyirwa mu bikorwa nk’uko biri ku bantu baba bagonze inkingi z’amashanyarazi n’imikindo.

Sibomana Joseph Umwe mu bagize Inama ishinzwe Isuku n’ Isukura avuga ko abangiza Impombo z’amazi bakwiye ibihano

Ibi babivuze bashingiye kuri kampani y’abanyamahanga iherutse kwangiza uruhombo runini rukwirakwiza amazi mu Mujyi wa Muhanga, abaturage bakamara umunsi batavomye.

Mu nama yahuje inzego zitandukanye zifite aho zihurira n’imicungire y’amazi, zirimo na Minisiteri y’Ibikorwa Remezo, abayitabiriye bavuga ko  hari abantu batangiye kwangiza imiyoboro y’amazi, n’ibitembo bakabikora batitaye ku ngaruka ibura ry’amazi rishobora guteza.

Sibomana Joseph umwe mu bagize Inama ishinzwe Isuku n’Isukura mu Karere ka Muhanga (Wash Board) avuga ko hari abangiza ibitembo by’amazi ku bushake bidaturutse ku mpanuka, ahubwo bashaka gushora amatungo yabo ndetse no kuhira imirima.

Sibomana yabwiye Umuseke ko hagombye kujyaho itegeko rihana abo bantu kugira ngo bazajye bitwararika kimwe n’uko ibihano bikora ku bangije inkingi z’amashanyarazi cyangwa imikindo iteye hafi n’umuhanda.

Yagize ati: “Hakwiye kubaho itegeko rifatika rihana abo bantu by’umwihariko abangiza ibitembo by’amazi, bakunze kubikora mu mpeshyi igihe amazi yabaye make.”

Umuyobozi w’Ikigo gishinzwe Isuku n’Isukura mu Karere ka Muhanga, Kamonyi na Ngororero, Sematabaro Joseph avuga ko nubwo nta tegeko rihari kugeza ubu, hari ubwo WASAC isaba ko uwangije umuyoboro w’amazi yishyura ku bwumvikane ibyangijwe bitiriwe bijya mu Nkiko.

Ati: “Kampani y’abanyamahanga iherutse kwangiza igitembo kinini mu Mujyi twasabye ko yishyura ingano y’amazi yamenetse n’ibikoresho byose kandi yaremeye irabikora.”

Asaba abantu bose gucunga neza amazi kuko ari umutungo kamere abaturage bagomba gusaranganya.

Umukozi muri Minisiteri y’Ibikorwa Remezo akaba ashinzwe Ishami ry’amazi, Isuku n’Isukura no kugenzura ibikorwa remezo na Serivisi z’amazi, Kagaga Monique avuga ko ingufu u Rwanda rwashyize mu bikorwa byo kwegereza amazi meza abaturage bishimishije.

Avuga ko mu gihe hatari hajyaho itegeko rihana abangiza ibitembo, abantu bakwiye kwitondera hose biri kugira ngo bidakomeza kwangirika.

Yagize ati: “Imicungire y’amazi ntigomba gutandukana n’ibikorwa by’Isuku n’Isukura kuko byose byuzuzanya kandi bikwiye kwitabwaho mu buryo bungana.”

Abashinzwe Imicungire y’amazi mu Karere ka Muhanga bavuga ko ikibazo cy’abangiza ibitembo by’amazi kiganje cyane mu Murenge wa Rongi uherereye mu bice by’icyaro.

Kimwe mu Bitembo by’amazi Kampani y’abanyamahanga iherutse kwangiza mu Mujyi wa Muhanga
Sematabaro Joseph Umuyobozi w’Ikigo gishinzwe Isuku n’Isukura mu Karere ka Muhanga, Kamonyi na Ngororero avuga ko abantu bakwiye kwitwararika bakirinda kwangiza Impombo z’amazi

MUHIZI ELISEE
UMUSEKE.RW/Muhanga.

Subiza

Your email address will not be published. Required fields are marked *