• 19/01/2020 9:23 41

Muhanga: Ba Midugudu bose basinyanye imihigo 53 na ba Gitifu b’Utugari 

Ni ubwa mbere  ba Midugudu  basinyanye amaseserano y’imihigo n’Abanyamabanga Nshingwabikorwa b’Utugari kuko bakurikiranaga imihigo y’ingo. Abarenga 300 ku mugoroba w’uyu wa Gatanu  bashyize umukono  ku masezerano  y’imihigo y’umwaka wa 2018-2019, baravuga ko  bagiye kwifashisha amasibo mu kuyishyira mu bikorwa.

Igitabo gikubiyemo imihigo 53 irebana n’imibereho myiza y’abaturage

Kamuhanda Florien Umukuru w’Umudugudu wa Kondo mu Kagari ka Ruhango, Umurenge wa Rongi avuga ko hari imihigo myinshi bashyiragamo ingufu nkeya ahubwo bakumva ko ireba inzego za Leta zibihemberwa ku kwezi.

Yagize ati: “Gukurikirana no gushyira mu bikorwa iyi mihigo dusinyanye n’abayobozi b’Utugari bizatworohera kubera ko tugiye kuyifatanya n’amasibo yo mu Midugudu.”

Umuyobozi w’Akarere ka Muhanga, Uwamariya Beatrice yabwiye Umuseke ko hari imihigo y’ibanze ireba abaturage buri munsi bifuza ko  ariyo bagonba gushyiramo imbaraga cyane uruhare rw’Akarere rukaba ari ukugenzura ko yakozwe neza kandi ko abaturage bamaze kuyigira iyabo.

Yagize ati: “Imihigo myinshi basinyanye irebana n’ubuzima bwa buri munsi bw’abaturage twifuza ko bita ku isuku, kuvugurura ubuhinzi, kurwanya imirire mibi, inda zitateguwe  ku rubyiruko rutarashaka, kwita ku bikorwa by’umuganda no gufata neza ibikorwa remezo by’imihanda.”

Cyakora bamwe muri ba Midugudu bavuga ko bafite impungenge ko batazabigeraho mu gihe ababihemberwa bibagora kubigeraho.

Bakavuga ko ibyananiye abashinzwe Imibereho myiza ku nzego zitandukanye na bo bizabarushya kuko babifatanya no  gushaka imibereho y’imiryango yabo.

Ku rundi ruhande hari abavuga ko  Ubuyobozi bubashije kugenzura buri cyumweru uko  imihigo ishyirwa mu bikorwa bishobora korohera ba Midugudu kuyesa.

Inama mpuzabikorwa yabaye  uyu munsi  yahuje  ubuyobozi bwAkarere,  abagize Ihuriro ry’abafatanyabikorwa (JADF) ndetse n’Abanyamabanga Nshingwabikorwa b’Imirenge 12.

Iyi mihigo bayisinyiye imbere ya Mayor wa Muhanga Mme Uwamariya Beatrice
Kamuhanda Florien Umukuru w’Umudugudu wa Kondo, Akagari ka Ruhango Umurenge wa Rongi
Inama mpuzabikorwa y’Akarere iterana kabiri mu mwaka
Meya Uwamariya Beatrice avuga ko hari byinshi ba Midugudu bafashamo Akarere mu kwesa imihigo

MUHIZI ELISEE
UM– USEKE.RW/Muhanga.

Subiza

Your email address will not be published. Required fields are marked *