• 08/12/2019 10:58 48

Muhanga: Akarere karishyuzwa Miliyoni 70Frw gafitiye Ibitaro bya Kabgayi

Mu nteko y’abaturage yabereye mu Kagari ka Remera, Umurenge wa Nyamabuye mu Karere ka Muhanga, Dr Nteziryayo Philippe yabwiye Ubuyobozi bw’Akarere ko bugomba kwishyura ibitaro Miliyoni 78Frw, umwenda w’abarwayi bivuje batagira Mituweli.

Dr Nteziryayo Philippe Umuyobozi Mukuru w’Ibitaro bya Kabgayi avuga ko hari Umwenda wa Miliyoni zirenga 70 Akarere ka Muhanga kabereyemo Ibitaro bya Kabgayi.

Ni mu kiganiro kirebana n’ubuzima yahaye Inteko y’abaturage ndetse n’ingaruka bigira iyo batishyuye imisanzu y’ubwisungane mu kwivuza.

Dr Nteziryayo Philippe umuyobozi Mukuru w’ibitaro bya Kabgayi avuga ko hari abaturage ibitaro byavuye baroroherwa barataha, basezeranya ko bazishyura umwenda.

Yagize ati: “Akarere niko kagomba kwishyura uyu mwenda wa Miliyoni 78Frw, tunibutsa abaturage ko bakwiye kujya bazirikana ko  kwishyura Mutuweli bibareba.”

Umuyobozi wungirije ushinzwe Iterambere ry’ubukungu mu Karere ka Muhanga, Kayiranga Innocent avuga ko umubare munini w’abarwayi bivurije muri ibi bitaro badafite umusanzu wa Mituweli ugizwe n’abakobwa babyariye iwabo n’abatewe inda zitateguwe.

Akavuga ko hari abafite ubushobozi bwo gukora imirimo y’amaboko bazaheraho bishyuza kugira ngo babone uko bishyura ibitaro.

Yagize ati: “Twatangiye kwishyuza abafite ubushobozi abo tuzasanga batabufite nibo tuzishyurira nk’Akarere.”

Kayiranga yabwiye abaturage ko mu makayi y’imihigo bagomba kujya bashyiramo n’uwa Mituweli buri gihe.

Muri iyi Nteko, Uwimana Scholastica yabwiye Ubuyobozi ko ikibazo afite kimuhangayikishije ari icy’umukobwa we umaze kubyarira mu rugo inshuro eshatu kandi nta mugabo afite.

Akavuga ko nta bushobozi afite bwo kwishyurira ubwisungane mu kwivuza abo buzukuru badafite ba Se bazwi.

Yasabye ubuyobozi bw’Akarere ko bwamufasha kwigisha uwo mukobwa, yita ko ‘yataye umuco’ gutuza akareka kuzerera ari naho akura ubwo burere bubi kuko atubaha ababyeyi.

Umwenda wa Miliyoni zirenga 70  Akarere ka Muhanga gafitiye ibitaro bya Kabgayi uhera mu mwaka wa 2015 kugera uyu mwaka wa 2019.

Umuyobozi wungirije ushinzwe Iterambere ry’Ubukungu mu Karere ka Muhanga Kayiranga Innocent, Dr Philippe Nteziryayo n’abakozi b’Akagari ka Remera.
Uwimana Scholastica umwe muri aba baturage avuga ko afite Umukobwa umaze kubyarira mu rugo inshuro eshatu.

MUHIZI ELISEE
UMUSEKE.RW/Muhanga.

3 Ibitekerezo

  • Ariko Leta ijyamo amavuriro yigenga imyenda ingana kuriya ikumva ko azajya akora gute? Ko ari yo ibona imisoro y’abaturage, iba igira ngo ibitaro by’amadini bivure abaturage bitishyurwa hanyuma bikomeze gukora neza gute?

  • Amavuriro ajye yihangana, hari ibindi biba byihutirwa kurushaho mu gihugu: kubaka imiturirwa, za Rwandair, ingendo z’abayobozi bakuru, kubaka ibiro bigezweho, kugura intwaro zo guhangana n’ibihugu by’abanzi bidukikije, kugura imodoka z’abayobozi, n’ibindi n’ibindi… Abafite ibitaro n’ibigo nderabuzima nibizirike umukanda bashake n’imfashanyo bakomeze bavure abaturage.

  • Ni ibintu bibabaje ko uturere tutishyura amavuriro n’ibitaro kubufasha byatanze kubaturage bibavura batishyuye. Amafaranga atakarira murugendo rumwe gusa rwa Rwandair ijya cyangwa iva mu bwongereza yakeishyura iyo myenda n’ibirarane byose uturere tw’u Rwanda dufitiye amavuriro n’,ibitaro. Birazwi ko ruriya rugendo nta bagenzi bahagije Rwandair itubonamo mugihe yo iba yanyoye ibihumbi by’ibiro bya Peterori itwara indege bitwikwa bitunguka

Subiza

Your email address will not be published. Required fields are marked *