• 14/12/2019 10:35 26

Muhammadu Buhari yongeye gutorerwa kuyobora Nigeria

Perezida Muhammadu Buhari yongeye gutorerwa kuyobora Nigeria muri manda ya kabiri atsinze uwo bari bahanganye wahoze ari Visi Perezida Atiku Abubakar.

Buhari yongeye gutorerwa kuyobora Nigeria

Nk’uko Komisiyo y’amatora yabitangaje kuri uyu wa Kabiri, Buhari w’imyaka 76 yarushije Atika hafi amajwi miliyoni enye nyuma yo gutorwa na miliyoni 15.2 mu gihe Atiku yatowe na 11.3.

BBC itangaza ko Atiku uhagarariye Ishyaka ry’Abaharanira Demokarasi yamaganiye kure ibyavuye mu matora ndetse avuga ko abayitabiriye ari bake kuko ngo ari 35.6%.

N’ubwo Buhari yatsinze muri Leta 19, Atiku agatsinda muri 17 kuri 36 zigize Nigeria, Atiku niwe watsinze mu Murwa Mukuru w’iki gihugu Abuja.

Buhari yishimira insinzi yijeje Abanyanigeria ubu basaga miliyoni 190 ko agiye guhindura byinshi harimo no guhashya ruswa yabaye imungu ikomeye muri iki gihugu cya mbere mu bukungu muri Afurika.

Ati: “Ubuyobozi bushya buzongera imbaraga mu kwimakaza amahoro n’umutekano, iterambere rirambye ndetse no kurwanya ruswa.”

Bivugwa ko aya matora yabaye kuri iki Cyumweru yaranzwe n’akavuyo n’ihohoterwa ariko kugeza ubu nta ndererezi yigenga iratangaza ko habayemo kwiba amajwi.

 Buhari ni muntu ki?

Perezida Muhammadu Buhari ni umusirikare  ufite ipeti rya Jenerali Majoro ndetse yayoboye Nigeria amezi 20 guhera mu Gushyingo 1983 nyuma ya ‘coup d’état’ yarangije Repubulika ya kabiri gusa nawe yaje guhirikwa na Generali Ibrahim Babangida muri Kanama 1985.

Buhari yongeye gutorerwa kuyobora Nigeria muri 2015. Abamushyigikiye bemeza ko muri manda ye ya mbere yagerageje kurwanya ruswa n’umutwe w’iterabwoba wa Boko Haram.

UM– USEKE.RW

Subiza

Your email address will not be published. Required fields are marked *