Moussa Camara utegerejwe muri Rayon bamusanzemo COVID-19 | UMUSEKE
  • 20/01/2021 10:32 51

Moussa Camara utegerejwe muri Rayon bamusanzemo COVID-19

Rutahizamu Umunya-Mali Mousaa Camara utegerejwe muri Rayon Sports, bamusanzemo ubwandu bwa COVID-19 bituma igihe yagombaga kugerera mu Rwanda gihinduka.

Camara bamusanzemo COVID-19

B&B FM Umwezi dukesha aya makuru, iratangaza ko uyu mukinnyi wagombaga kugera mu Rwanda mu mpera z’iki cyumweru, yasanganywe COVID-19 nyuma y’ibipimo yafashwe ku wa Kane.

Uwayezu Jean Fidèle uherutse gutorerwa kuyobora Rayon, mu cyumweru gishize yabwiye Itangazamakuru ko “Rutahizamu w’Umunya-Mali, Mousaa Camara aragera mu Rwanda bitarenze kuri uyu wa Gatandatu (mu mpera z’icyumweru gishize).”

Moussa Camara yakiniye Rayon Sports hagati ya 2016 na 2017, ayivamo ajya muri Ismaily Sporting Club yo mu Misiri.

Muri 2018, Camara yerekeje muri MO Béjaïa yo muri Algérie, ayimaramo umwaka umwe mu gihe mu 2020 yasinyiye Sohar SC yo muri Oman ari na yo yari agikinira.

Nagera muri Rayon Sports, Moussa Camara azaba yiyongereye ku bandi bakinnyi bashya barimo myugariro Niyigena Clément waguzwe muri APR FC n’umunyezamu Bashunga Abouba wakinaga muri FC Buildcon yo muri Zambia.

Hari kandi Sugira Ernest wongeye gutirwa muri APR FC n’Umunya-Côte d’Ivoire Jean Vital Ourega watiwe muri TP Mazembe yo muri Repubulika Iharanira Demokarasi ya Congo.

Rayon Sports yatangiye imyitozo kuri uyu wa Mbere mu Nzove yitegura umwaka w’imikino na shampiyona izatangira tariki 4 Ukuboza 2021.

Jean Paul MUGABE
UMUSEKE.RW

Subiza

Your email address will not be published. Required fields are marked *