• 24/01/2020 7:31 22

Minispoc yemeza ko ubufatanye bwa Arsenal n’u Rwanda bwatanze umusaruro no muri Siporo

Gahunda y’imyaka itatu y’ubufatanye mu masezerano agamije kwamamaza Vist Rwanda, Ikigo k’igihugu k’Iterambere (RDB) cyasinyanye na Arsenal yo mu Bwongereza, Minisiteri y’Umuco na Siporo ivuga ko afasha abana b’Abanyarwanda bakina umupira w’amaguru, ubu Simon MCMANUS utoza abana muri Arsenal amaze iminsi ine atoza abo mu  Isonga.

Minisiteri y’Umuco na Siporo yemeza ko amasezerano hagati ya Arsenal n’u Rwanda yagiriye akamaro umupira w’amaguru

Aya masezerano ngo ntajyanye no guteza imbere ibijyanye n’ubukerarugendo n’ishoramari gusa.

Umutoza usanzwe ukurikirana abana mu ikipe ya Arsenal ari mu Rwanda aho ari guha amahugurwa abana ku mupira w’amaguru mu rwego rwo kubakarishya no kubaremamo ikizere cyo kubyaza umusaruro impano bafite.

Aba bana bari munsi y’imyaka 17 basanzwe bakurikiranwa bari mu ishuri rya Isonga risanzwe ryigisha abana umupira w’amaguru, iri rikaba ryarashinzwe n’Ishyirahamwe ry’umupira w’amaguru mu Rwanda (FERWAFA) hagamijwe kuwuteza imbere.

Umuyobozi wa Siporo muri MINISPOC, Rurangayire Guy Didier avuga ko binyuze muri buriya bufatanye ikipe ya Arsenal ifitanye n’u Rwanda, urwego rw’umupira w’amaguru mu rushobora kuzamuka kandi bigatanga umusaruro no ku ikipe y’Igihugu, Amavubi.

Ati “Ubufatanye n’ikipe ya Arsenal bw’imyaka itatu (umwaka wa mbere uri kurangira) twagiye dukora amahugurwa atandukanye y’abatoza n’abana, bitanga ikizere ko mu myaka iri imbere dushobora kuzagera ku musaruro w’igihe kirambye tukaba twabona Abanyarwanda bakina mu makipe akomeye.”

Rurangayire yemeza ko umwana hari aho yagera mu mupira w’amaguru igihe akurikiranywe akiri muto agahabwa umurongo ngenderwaho ndetse akabona n’umwanya wo kugaragaza impano imurimo.

Mucyo Ndoli Kevin umwe muri bariya bana bamaze iminsi ine bakurikiranwa n’umutoza usanzwe atoza abana muri Arsenal avuga ko aya ari amahirwe bishimira kandi ko hari byinshi bigiramo byatuma bagera ku nzozi zo kuba bakina ku ruhando mpuzamahanga.

Ati “Birashimishije guhura n’umutoza nk’uyu usanzwe amenyereye kuzamura impano, tugerageza kumva ibyo atwigisha birimo gukina ushyizemo ubwenge. Bituma numva ko byose bishoboka kuko imyitozo dukora ni na yo hanze bakora.”

Ubu bufatanye bwashimangiye amahirwe akomeye ku mupira w’amaguru w’u Rwanda n’iterambere ryawo muri rusange harimo kwakira ikipe ya Arsenal mu bikorwa binyuranye bitegurwa na RDB.

Bwitezweho kandi kuzamura no kumenyekanisha u Rwanda nk’igicumbi gihamye cy’ubukerarugendo binyuze muri gahunda ya VISIT RWANDA.

Iyi gahunda y’ubufatanye bw’imyaka itatu n’ikipe ya  Arsenal imaze umwaka itangiye. Kugeza hatanzwe amahugurwa ku bana 75 n’abatoza 50 bigisha abana bari munsi y’imyaka 15 na 17 mu Ntara zose z’igihugu.

NSHIMIYIMANA Dieudonne
UMUSEKE.RW

Subiza

Your email address will not be published. Required fields are marked *