• 08/12/2019 3:38 13

Menya impamvu zagutera kuva amaraso mu kanwa igihe uhakorera isuku, wakora iki?

Kuva amaraso mu kanwa bibaho akenshi mu gihe abantu bamwe boza amenyo yabo, gusa hari n’abandi biza rimwe na rimwe bitunguranye.

Koza amenyo neza bikwiye kumara hagati y’iminota itatu n’itanu kandi bigakorwa nibura kabiri ku munsi

Niba bitarakubaho na rimwe, ugomba kumenya ko bishobora kukubaho igihe icyo ari cyo cyose. Ishinya iyo nta kibazo ifite, ntabwo ijya iva amaraso mu buryo bworoshye. Rimwe na rimwe ushobora kubona ayo maraso uri kwoza mu kanwa ukabyirengagiza, ariko uko ugenda ubitinza, bishobora kuzarangira amenyo yawe agenda avamo utazi imvano yabyo.

Nubwo hari impamvu nyinshi zishobora gutera umuntu kuba yava amaraso mu gihe yoza amenyo, impamvu nyamukuru ishobora kuba isuku idakorwa, cyangwa ikorwa nabi.

Urubuga www.steptohealth.com, rugaragaza impamvu zishobora kugutera icyo kibazo cyo kuva amaraso igihe ukora isuku mu kanwa.

  1. Indwara z’ishinya (Ifumbi)

Kuba ishinya yabyimba, igatukura ndetse no kuva amaraso ni bimwe mu byakwereka ko yatangiye kurwara.

Izi ndwara zibasira ishinya ziterwa n’urubobi ruba rwarafashe ku menyo kuko ‘udukoko twitwa bagiteri’ (bacteria) tuba muri urwo rubobi dutuma ishinya icika intege ndetse igatangira kugaragaza biriya bimenyetso twavuze haruguru.

Ikintu wakora kikagufasha ni ukongera inshuro ndetse n’uburyo wozamo amenyo.

  1. Kunywa itabi

Kunywa itabi bituma amenyo yangirika ndetse bigatuma ubuvuzi ubwo ari bwo bwose butagenda neza nk’uko byagakwiriye. Iyo umuntu anywa itabi, akunda kuva amaraso mu gihe ariye ibintu bikomeye ndetse no mu gihe yoza mu kanwa.

  1. Kubura vitamine yo mu bwoko bwa K

Mu ubusanzwe, iyi vitamine ifasha mu gutuma amaraso avura neza. Kubura iyo vitamine K, na byo bituma ishinya iva amaraso.

  1. Diyabete (Diabete)

Mu gihe urwaye iyi ndwara ya Diyabete, biba byoroshye kuva amaraso mu gihe woza mu kanwa.

Ikindi ni igihe ushobora kuba ukoresha imbaraga nyinshi mu koza amenyo ndetse n’uburoso ukoresha bwarangiritse, bwarigonze cyangwa bukomeye, bityo bigatuma ishinya iva amaraso.

Ugomba kumenya ko koza amenyo yawe bidasaba kuba wakoresheje imbaraga nyinshi ndetse mu gihe waba ufite ikindi kibazo runaka, wakwegera Muganga w’amenyo akagufasha.

  1. Imyaka (ikigero ugezemo)

Iyo umuntu ari kugenda akura, kuva amaraso mu ishinya biba ari ibintu bisanzwe. Abasaza n’abakecuru baba bafite iki kibazo nta yindi mpamvu yabiteye ahubwo ari ukubera imyaka bagezemo.

  1. Imiti imwe n’imwe dufata

Imwe muri yo igabanya ivuburwa ry’amacandwe, bigatuma bagiteri zo mu kanwa zitangira kwikusanya kugira ngo zangize ibice byo mu kanwa nk’amenyo ndetse n’ishinya.

Mu gihe hari imiti urimo gufata, muri icyo gihe ukabona biraguteza ibibazo byo kuva amaraso, byaba byiza ubajije Muganga wayiguhaye, niba icyo kibazo cyatewe no gufata iyo miti. Ikindi gishoboka, ni ukubaza niba hari indi miti wahabwa, ikaba yakuvura ariko itaguteje ibyo bibazo.

  1. Imirire mibi

Kubura intungamubiri z’ingenzi mu mubiri nka za vitamine A, B na C bishobora gutuma ishinya ijya mu byago byo kwangirika, bikarangira iva amaraso mu gihe woza mu kanwa.

Ni byiza gufata indyo yuzuye kuko nibwo buryo bwagufasha kubona izo ntungamubiri. Inyinshi muri izo vitamine ziboneka mu mbuto no mu mboga.

  1. Umunaniro

Umunaniro watuma ishinya n’ibice byo mu kanwa bitakaza ubwirinzi bwabyo ku ndwara, bigashobora no kuguteza kuva amaraso mu kanwa. Mu gihe wumva unaniwe, ni byiza kuruhuka neza.

  1. Gutakaza ubwirinzi bw’umubiri

Indwara zibasira umubiri akenshi ziba zituruka ku kuba umubiri uba watakaje ubudahangarwa bwawo. Icyo gihe, bimwe muri ibyo bibazo biba byugarije umubiri bishobora kuba ari byo byatuma ishinya iva amaraso.

  1. Iki kibazo kandi gishobora kuba cyaturutse ku buvuzi bw’amenyo wahawe nabi

Ubuvuzi bw’amenyo butakozwe neza nko kuba warahomewe iryinyo nabi, ni kimwe mu byatuma utangira kuva amaraso mu kanwa. Icyo gihe biba byiza iyo usubiye kwa Muganga w’amenyo akabikosora. 

  1. Kuba warakutse amenyo

Mu gihe wakutse amenyo, guhuza amenyo biba bigoye mu gihe uri guhekenya. Ibi bituma amenyo yandi yikuba ku ishinya bigatuma iva amaraso kuko iba yakomeretse.

  1. Kuba umugore atwite

Gutwita ni kimwe mu bintu byatera ishinya y’umugore kuva amaraso, nubwo bishobora kuba ari ibintu bisanzwe. Muganga usanzwe asuzuma uwo mugore ni we umenya icyakorwa hagati aho.

  1. Kuba udakunda kwisuzumisha ku Muganga w’amenyo

Akanwa kadasuzumwe mu gihe runaka bituma bigorana kumenya ikibazo umuntu afite. Abahanga mu by’ubuvuzi bw’amenyo batugira inama yo kwoza amenyo nibura kabiri ku munsi, kandi koza amenyo bikamara igihe kiri hagati y’iminota itatu n’itanu.

Guhindura uburoso bw’amenyo butarangirika.

Ni byiza kwibuka kwisuzumisha kwa muganga w’amenyo nibura kabiri mu mwaka. Muri icyo gihe bagukuriraho urubobi ruba rwarafashe ku menyo yawe, kuko ni kimwe mu bintu byaguteza ibyago byo kurwara ibice bitandukanye byo mu kanwa.

NSHIMIYIMANA Dieudonné akora Stage /UMUSEKE.RW

Subiza

Your email address will not be published. Required fields are marked *