• 14/12/2019 8:47 37

Me Richard Mugisha yiyemeje kuburanira Abanyarwanda barega Leta ya Uganda

*Umuryango wa Muhawenimana Ezekiel na Dusabimana Esperance urasabirwa indishya ya 100 000$
*Hakorimana Venant Musoni we agasabirwa indishyi ya miliyoni imwe y’amadolari.

Me Richard Mugisha yaganiriye n’abanyamakuru ku Rubanza Abanyarwanda batatu bamwiyambajemo ngo abunganire, bararega Leta ya Uganda bavuga ko bakorewe iyicarubozo n’ibindi bikorwa bibi nyuma yo gufatwa n’abashinzwe umutekano ba Uganda bakabafunga ku mpamvu bavuga ko babwirwa ngo bariyo binyuranije n’amategeko.

Me Richard Mugisha avuga ko yiyemeje kunganira aba Banyarwanda ku buntu kubera ko ashyigikiye ko abatuye EAC bishyira bakizana aho ariho hose

Mu bigaragara ni Abanyarwanda badafite amikoro ahambaye, Me Mugisha avuga ko azabunganira ku buntu.

Yagize ati “Baranyegereye bambwira ko bakorewe ihohotera muri Uganda, babakoreye ibintu bibi, bansaba kubaburanira muri East African Court of Justice, uyu munsi twatanze ikirego.”

Abo aburanira ni batatu, umuryango wa Muhawenimana Ezekiel na Dusabimana Esperance bari mu kigero k’imyaka 35 na 37, n’uwitwa Hakorimana Venant Musoni w’imyaka 36 ariko ngo hari n’abandi Banyarwanda bari mu biganiro na we.

Uyu Musoni avuga ko yari umwarimu muri Ethiopia akaba asaba Leta ya Uganda indishyi ya miliyoni imwe y’amadolari ya America (1 000 000$) naho umuryango Muhawenimana Ezekiel na Dusabimana Esperance ugashaka indishyi igera ku bihumbi 100$.

Me Richard Mugisha avuga ko bariya bantu batatu atazabaca amafaranga kubera ko ngo ibyo baregera ni ibintu na we yumva ko abantu batuye mu Karere k’Umuryango wa Africa y’Iburasirazuba bakwiye kubana bari hamwe, havuka ikibazo Urukiko rukagikemura cyangwa kigakemuka mu bundi buryo.

Ati “Nizera ko abatuye muri EAC twakorera hamwe, tugashyira mu bikorwa ibyiyemejwe n’inzego zikorera uyu muryango.”

Uyu Munyamategeko yayoboye Urugaga rw’Abavoka bo mu muryango wa Africa y’Iburasirazuba.

Avuga ko abandi Banyarwanda bamwegereye ubu bari gutegura ibirego ku buryo bizashyikirizwa urukiko mu gihe kitari icya kure cyane.

Avuga ko ibihugu bigize EAC bifite amategeko abigenga, arimo guharanira kugendera ku mategeko, imiyoborere myiza no guharanira uburenganzira bwa muntu.

Muhawenimana na Esperance bafatiwe ahitwa Rubanda muri Uganda, babanje gufungwa nyuma bajyanwa mu Rukiko rubahamya icyaha cyo kwinjira muri Uganda mu buryo bunyuranyije n’amategeko bakatirwa gufungwa amezi 13 cyangwa gutanga ibihumbi 600 y’amashilingi ya Uganda, ariko kubera ko nta mafaranga bari bafite, ngo n’ayo bari bafite barayambuwe bafungiwe muri Gereza ya Ndorwa bamaramo amezi 9 bafungurwa muri Mata 2019.

Uyu muryango wanabyariye umwana muri gereza yo muri Uganda. Bafashwe bagiye gushyingura umuntu muri Uganda.

Me Mugisha ati “Ibyo bakorewe ni ukwamburwa uburenganzira bwabo, kwamburwa amafaranga, gukorerwa iyica rubozo no gukoreshwa imirimo y’agahato n’ibindi bitesha agaciro.”

Yavuze ko ruriya Rukiko arwizeye ari na yo mpamvu barutanzemo ikirego. Abarushyizeho ngo bari bazi ko hazavuka ibibazo rukajya rubikemura.

Aba bantu ngo banyuze mu Rugaga rw’Abavoka rwo mu Rwanda, na rwo rubagira inama ko Me Richard Mugisha abunganira, akaba yemeza ko iki kirego kitakwitwa icya politiki kuko ibyakozwe bihari, Urukiko ngo ruzaca urubanza rukurikije ibimenyetso rwabonye, kuko ngo mu manza nk’izi ntabwo umuntu arega urwego rwamuhohoteye ahubwo arega Leta.

Me Mugisha yamenyekanye cyane mu Rwanda ubwo yaregaga Leta ku ngingo zimwe na zimwe zirimo n’iyo gutuka Umukuru w’Igihugu, n’izijyanye no guhana abacanye inyuma kandi bafitanye isezerano, yasabaga ko zimwe zivanwa mu gitabo cy’Amategeko ahana ibyaha mu Rwanda, cyangwa zigashyirwa mu gitabo cy’amategeko mbonezamubano, ndetse mu rubanza rwasomye tariki 24 Mata 2019 hamwe yaratsinze.

Jean Paul NKUNDINEZA
UMUSEKE.RW

3 Ibitekerezo

  • Uru rukiko nyafrika rukorera Arusha u Rwanda rwarwivanyemo igihe Ingabire yaruregeraga, aranatsinda bamugenera indishyishyi ya miliyoni 66 z’amanyarwanda. Harya yaba yarayahawe? Niba ntayo yabonye, icyizere ko aba bashaka kurega Uganda bo bazahabwa indishyi baramutse batsinze ni ikihe? Jye ndabona ari nk’ikirego cyo gukomeza politiki ku bundi buryo, ariko twigusha mu mutego. Ni gute abanyarwanda twaregera urukiko guverinoma yacu itemera? Si uburyo bwo kuyipinga? Jye mbona urebye amabanga abayobozi b’u Rwanda na Uganda baziranyeho, aya makimbirane azatuma amaherezo bombi bishyira ku karubanda. Bashatse bayahagarika amazi atararenga inkombe, naho ubundi bombi bazahasiga amababa. Impamvu iyi saga itoroshye, nuko abaganda baziranye bihagije n’abanyarwanda. Haru benshi babanye mu gisikare kimwe, kandi abanyarwanda bagarutse muri 1994 bagasubira Uganda nyuma gushaskisha imibereho cyangwa bongeye guhunga ni benshi cyane, ku buryo umuntu wajyayo bamukeka amababa yo kujya mu bikorwa by’iperereza bitabagora cyane kumutahura. Buriya bariya banyarwanda basubiyeyo ku bwende bwabo cyangwa bahunga sibo babatanga?

    • Uvuze ukuli rwose. Mbese abanyarwanda bakorerwa iyicarubozo hano mugihugu ,bo bazarega hehe?
      Ntawuherutse kuza kuburana arashobora kugenda? Mtabaherutse kutubwira ko bafungiye mukumba ka metero imwe.

  • Inkiko zitubangamiye tuzivamo, abandi batubangamira tukaziregera! Amacenga aragwira!

Subiza

Your email address will not be published. Required fields are marked *