• 12/12/2019 3:33 13

Mayor wa Kigali yagizwe Ambasaderi mu Busuwisi asimbura Amb.Ngarambe

Mu itangazo ryaturutse mu Biro bya Minisitiri w’Intebe, rivuga ko Umukuru w’Igihugu yakoze impinduka kuri zimwe muri za Ambasade z’u Rwanda, ndetse ashyiraho ba Ambasaderi bashya barimo na Mme Marie Chantal Rwakazina wari Mayor w’Umujyi wa Kigali, yasimbuye Amb. Dr. Francois Xavier Ngarambe wari umaze igihe ahagarariye u Rwanda mu Busuwisi akaba yimuriwe mu Bufaransa.

Mme Rwakazina Marie Chantal wari Mayor w’Umujyi wa Kigali kuva muri Gicurasi 2018

Gasamagera Wellars na we yari Komiseri mu Muryango RPF-Inkotanyi, akaba n’Umuyobozi Mukuru wa Rwanda Management Institute (RMI) yagizwe Ambasaderi w’u Rwanda muri Angola.

Amb. Kimonyo James yari ahagariye u Rwanda muri Kenya ubu azaruhagarira mu Bushinwa azahasimbura Lt Gen Charles Kayonga.

Marie Chantal Rwakazina wari Umuyobozi w’Umujyi wa Kigali yagizwe Ambasaderi w’u Rwanda mu Busuwisi, asimbuyeyo Ambasaderi Dr. Francois Xavier Ngarambe wagiye guhagararira u Rwanda mu Bufaransa.

Amb. Higiro Prosper yagizwe High Commissioner muri Canada. Vincent Karega azahagararira u Rwanda muri DR Congo yari asanzwe aruhagarariye muri Afrika y’Epfo, yahise asimbuzwa Eugene Segore Kayihura wagizwe High Commissioner, uyu ni we wari usanzwe ahagarariye u Rwanda muri Tanzania.

Maj. Gen Karamba yagizwe High Commissioner muri Tanzania ahasimbuye Amb. Eugene Segore Kayihura na ho Eng. Uwihanganye Jean de Dieu wari Umunyamabanga wa Leta muri Minisiteri y’Ibikorwa Remezo ushinzwe ubwikorezi azahagararira u Rwanda nka High Commissioner muri Singapore.

Emmanuel Hategeka wari Umuyobozi Mukuru wungirije wa RDB yagizwe Ambasaderi mu bihugu byiyunze by’Abarabu (EAU).

Dr Aissa Kirabo Kacyira yagizwe High Commissioner muri Ghana. Amb. Sheikh  Habimana Saleh azahagararira u Rwanda muri Maroc akaba yari asanzwe aruhagarariye mu Misiri.

Yasmin Amri Sued na we yagizwe Ambasaderi muri Korea. Uyu akaba yari Umujyanama muri Ambasade y’u Rwanda mu Buhinde.

Muri Leta ya Qatar hoherejwe François NKULIKIYIMFURA.

Amb. Francois Xavier Ngarambe yari ahagarariye u Rwanda mu Busuwisi yimuriwe mu Bufaransa

 

Marie Chantal Rwakazina

Marie Chantal Rwakazina yatorewe kandi atsindira kuyobora Umujyi wa Kigali taliki 25, Gicurasi, 2018. Icyo gihe yari asimbuye Pascal Nyamurinda weguye muri Mata, 2018.

Rwakazina yatsinze ariya matora afite amanota 146 kuri 32 y’uwo bari bahanganye.

Marie Chantal Rwakazina yigeze gukora mu ihuriro ry’inzego z’ibanze, Rwanda Association of Local Government (RALGA) guhera mu 2008 kugeza 2013.

Pascal Nyamurinda yasimbuye ku mwanya wo kuyobora Umujyi wa Kigali na we yari yawugiyeho asimbuye Monique Mukaruliza wagiye guhagararira u Rwanda muri Zambia.

Rwakazina ni impuguke mu by’iterambere, akaba yarakoranye igihe kinini n’ishami ry’Umuryango w’Abibumbye rishinzwe iterambere Mpuzamahanga (UNDP) akaba yarigeze gushingwa ibikorwa byawo mu Rwanda.

Yigeze no kwigisha ubukungu muri Kaminuza y’u Rwanda.

Dr Francois Xavier Ngarambe:

Uyu mugabo yari ahagarariye  u Rwanda muri UN, ari intumwa yarwo ihoraho mu ishami ryayo rikorera i Geneve mu Busuwisi.

Yakoze kandi mu Muryango Mpuzamahanga w’ubucuruzi, ahagarariye Africa.

Major General Charles Karamba:

Yari asanzwe ari Umugaba w’ingabo z’u Rwanda zirwanira mu kirere.  Yarahiriye gusohoza inshingano ze kuri uyu mwanya taliki 29 Werurwe, 2016.

Dr Aissa Kirabo Kacyira

Dr. Aisa Kirabo Kacyira yari asanzwe ari Umuyobozi Nshingwabikorwa wungirje akaba n’Umunyamabanga wungirije mu buyobozi bukuru bw’Ishami ry’Umuryango w’Abibumbye rishinzwe imiturire (UN-Habitat).  Aka kazi akaba yari akarimo kuva muri 2011.

Yayoboye kandi Intara y’Iburasirazuba mu Rwanda guhera muri Gashyantare, 2011 kugeza mu Ukwakira, 2011. Mbere yaho akaba yaranabaye Mayor w’Umujyi wa Kigali.

Yize muri Kaminuza yitwa James Cook University muri Australia aho yavanye impamyabumenyi ihanitse mu buvuzi bw’amatungo no mu bukungu.

Yize no mu zindi Kaminuza harimo iya Makerere muri Uganda no mu Buholandi, mu yitwa Maastricht aho yigaga iby’amabanki n’icungamutungo.

UMUSEKE.RW

4 Ibitekerezo

  • Murakoze kurayo makuru, muzadusobanurire amabassador na high commissioner aho bitaniye

    • Ambasaderi ni umuntu wese uhagarariye igihugu cye mu mahanga. Iyo agihagarariye mu gihugu cy’umunyamuryango wa Commonwealth, yitwa “High Commissionner”.

      • Ubwo noneho nanjye ndasobanukiwe. Abo muri comon..bitana hagati yabo abahigh commissionner ariko abandi bakabita ba ambassaderi.Ubwo ntibazongere kwandika ambassaderi uhagarariye u Rwanda muri Uganda.Bajye bandika High commissioner.

  • Chantal buriya basanze affaire ya Bannyahe yaramunaniye, baribaza bati: N’izindi zimeze nkayo cyangwa ziyirusha ubukana ntazazishobora reka dushake umuntu uvana mu nzira ibyari by’inyoni, ukora nka Mutsindashyaka mbese. Nashimire Imana amarira y’abaturage ba Bannyahe ntiyari kuzayavanamo umugisha iyo bimurirwa mu Busanza ariwe ukuriye icyo gikorwa. Kaboneka niwe wigeze kuvuga ngo amarira y’abaturage atera umuvumo abayobozi bayirengangiza. Uriya rwose nafate agasabune keza, maze akarabe nka Pilato avuga ati: amarira y’abaturage ba Bannyahe ntankurikire mu Busuwisi, ndi umwere wayo. Ko njya numva ngo bariya baturage mu nkiko baratsinze byaba ari byo ra? Cyangwa ni impuha zo muri quartier? Ariko bimaze igihe bicwekereye ubanza bitaragenze uko abanyabubasha babyifuzaga.

Subiza

Your email address will not be published. Required fields are marked *