• 13/12/2019 10:14 09

Ku Rwanda singombwa politiki ikumira ibicuruzwa biva hanze – Min. Soraya

Kuri uyu wa gatatu tariki 27 Werurwe, Minisitiri w’Ubucuruzi n’inganda Soraya Hakuziyaremye yitabye Inteko Ishinga Amategeko umutwe w’Abadepite, abaha ibisobanuro byanditse ku bibazo 23 bijyanye n’inzitizi ziri mu bucuruzi bw’umusaruro w’ubuhinzi n’ubworozi, yababwiye ko bitari ngombwa ko u Rwanda rukumira ibicuruzwa biruzamo biturutse hanze kugira ngo bashakire isoko umusaruro w’imbere mu gihugu.

Minisitiri w’Ubucuruzi n’Inganda Soraya Hakuziyaremye avuga ko vuba hazashyirwa politiki ivuguruye y’inganda

Minisitiri w’Ubucuruzi n’Inganda yabajijwe gusubiza ibibazo birimo, inganda zidakora neza n’izitageza ku musaruro w’ubushobozi bwazo, umusaruro w’umuceri uba mwinshi ukamara igihe mu nganda utaguzwe, abahinzi babura ugura umusaruro bejeje w’ibinyampeke kubera kutuzuza ubuziranenge kubera ko urimo uruhumbu rutera indwara ya (Aflatoxin) n’ibindi by’imikoranire y’inganda n’abahinzi zigurira umusaruro n’uruhare bagira mu kugena ibiciro.

Ku kibazo k’inganda zidakora neza cyangwa zikabura umusaruro w’ibyo zitunganya bingana n’ubushobozi bwazo, Minisitiri Soraya yavuze ko igenzura ry’inganda bakoze basanze icyo kibazo giterwa n’uko zimwe zitabona umusaruro uhagije mu buhinzi, haba mu bwinshi no mu bwiza bwo gutunganywa, kutabasha guhangana ku isoko bitewe n’igishoro kiri hejuru kugira ngo inganda zibone umusaruro, igiciro cy’ubwikorezi kiri hejuru ku bikoresho biva hanze n’ikiguzi cy’amashanyarazi n’izindi mpamvu zishingwa ku kuba nta nyigo yimbitse y’uko inganda zizunguka mbere yo gushingwa.

Zimwe mu ngamba ziriho ngo ni uko iryo genzura ryakozwe ibyarivuyemo bizakorerwa isesengura kuva mu Ukwakira kugera mu Ukuboza uyu mwaka, hakazashyirwa mu bikorwa ingamba zizava mu bwumvikane na ba nyiri inganda zafunze cyangwa izikora nabi, kandi ngo iryo genzura rizagumaho.

Minisitiri w’Ubucuruzi n’Inganda yavuze ko hari gahunda yo kuvugurura politiki y’inganda yashyizweho muri 2011, kugira ngo ijyanishwe n’igihe ibe yasubiza ibibazo biri kugaragara ubu.

Ubwo twamubazaga ibishya bizaba biri muri iyi politiki, Minisitiri Soraya Hakuziyaremye yagize ati “Icyo twabanje gukora ni isesengura ry’ibibazo biri mu nganda kandi riracyakomeje, kuko politiki ya mbere turi kuvugurura ni iy’inganda igomba kuba yarangiye mu kwezi kwa kenda, ariko kubera ibibazo bigenda bigaragara mu bucuruzi ku isoko ry’imbere mu gihugu naho twasanze ari ngombwa ko tugenda tureba kuri politiki y’ubucuruzi tunareba n’ivugururwa ry’itegeko rireba isoko ry’imbere mu gihugu.”

Yavuze ko ubu bareba ibibazo bagaragarijwe mu igenzura, ibyo bari biyemeje mbere batakoze n’ibyo bagomba kongeramo bitewe n’aho ibihe bigeze harebwe uko u Rwanda na rwo rujyana n’isoko rya Africa ryagutse nk’uko ibihugu byiyemeje kugira umugabane wa Africa agace kamwe k’ubucuruzi.

Mu mvugo isa n’inyuranya n’iya Minisitiri w’Ubuhinzi n’Ubworozi, Dr Geraldine Mukeshimana uheruka kubwira Abadepite mu cyumweru gishize ko umuceri wa kigori (imbuto ngufi) ukunzwe cyane ku isoko kandi ukaba uhingwa n’abahinzi kuko utanga umusaruro mwinshi, Minisitiri Soraya yavuze ko mu ngano y’umuceri itindikiye mu bubiko bw’inganda harimo umwinshi wa kigori kuko udakunzwe ku isoko.

Ati “Kuba hakiri umusaruro ugaragara mu bubiko bw’inganda n’amakoperative, nko ku gihingwa cy’umuceri, biterwa ahanini n’ubwoko bw’umuceri wa kigori udakunzwe ku isoko hari inganda zifite T 4 831 zihunitse za kigori, na T 2 215 z’umucari muremure ariko Koperative zo nta musaruro w’igihembwe k’ihinga B zigihunitse mu bubiko bwazo.”

Umwe mu Badepite witwa Hon Mbonimana yabajije Minisitiri w’Ubucuruzi n’Inganda niba hadakwiye gushyirwaho politiki yo gukumira ibicuruzwa biva hanze byinjira mu Rwanda kugira ngo inganda z’imbere zibone isoko, Minisitiri amuhakanira avuga ko atari byaba bitandukanye n’amasezerano u Rwanda ruba rwarasinye yo korohereza abandi kurucuruzamo no kurushoramo imari.

Yagize ati “Hari ibyo abanyenganda badusaba, byo gushyiraho imisoro ihanitse ku bicuruzwa bitari ibyo mu muryango wa Africa y’Iburasirazuba (EAC) kuko amategeko yawo abitubuza, ariko tugendera ku mategeko y’Umuryango Mpuzamahanga w’Ubucuruzi (WTO) na bo bareba ko amategeko yacu ajyanye n’ibyo twiyemeje tujya muri uwo muryango, ugasanga politiki u Rwanda rwiyemeje yo gufungura imiryango y’isoko tutayireka kuko hari amasezerano mpuzamahanga twasinye ko tutazakumira ibiva hanze keretse igihe byaba bitujuje ubuziranenge cyangwa bifite ikibazo. Ibi ni byo biduhesha amanota muri raporo yo koroshya ishoramari (Doing Business Report).”

Ibisubizo bya Minisitiri w’Ubucuruzi n’Inganda byanyuze Abadepite bemera raporo yabahaye ku bwumvikane busesuye.

HATANGIMANA Ange Eric
UM– USEKE.RW

3 Ibitekerezo

  • Ibisubizo bya Minisitiri w’Ubucuruzi n’Inganda byanyuze Abadepite bemera raporo yabahaye ku bwumvikane busesuye. Njyewe ntabwo binyuze kuko nta kibazo bicyemuye nta n’icyizere cyo kuzabicyemura mfite.
    Ariko ibintu byose ko numva byazambye ra! Ibihombo mu bitaro kubera kuvura abakene badafite mutuelle ntibishyure, mu burezi, ubukene bwugarije rubanda, abambura ababakoreye, abayobozi barya ibya rubanda, imishinga minini yadindiye, abana bagwingiye abandi barya nabi, ububanyi n’abaturanyi, 77% by’abaturage badafitiye icyizere abayobozi mu z’ibanze…. njyewe ndareba imbere nkabona ntahabona pe!

    • Ariko kuki mukunda gutogota no gushyushya imitwe? Ngo imbere ntaho ubona? Ahubwo se aho uri ubungubu urahabona? Ibibazo biriho kandi nta gihe bitazabaho kandi hari n’ibihugu bimwe bifite ibibazo birenze iby’u Rwanda, ariko nta mpamvu ya byacitse.

  • Hari akantu njya nifuza ko Minister yazadyfasha; gukora ku buryo itegeko ryuko ibiciro by’ibicuruzwa bishyirwa ahagaragara mu maduka yose…
    Byatoza abacuruzi gukorera mu mucyo, kuvugisha ukuri, etc

Subiza

Your email address will not be published. Required fields are marked *