• 19/01/2020 3:31 31

Kirehe: Hatangijwe ibikorwa byo gutera umuti wica imibu itera Malaria

Mu karere ka Kirehe haraterwa umuti wica imibu mu nzu z’abaturage, abatuye umurenge wa Nyamugali bavuga ko bishimiye iki gikorwa ngo kuko umubare w’abarwara Malaria wagabanutse ugereranyije na mbere y’iyi gahunda.

Barimo gutera umuti mu nzu zose mu ngo zigize akarere ka Kirehe

Minisiteri y’Ubuzima ivuga ko mu rwego rwo kurushaho guhangana na Malaria irimo gushaka abandi baterankunga kugira ngo no mu tundi turere hagerweho mu gutera umuti.

Ni igikorwa cyatangirijwe mu kagali ka Bukora mu murenge wa Nyamugali umwe mu ituriye igishanaga cy’Akagera.

Ni umwaka wa gatanu iki gikorwa cyongeye gukorwa muri Kirehe. Ministeri y’Ubuzima ivuga ko bari  gukoresha undi muti ufite ubukana kurusha uwari usanzwe ukoreshwa.

Dr. Hakizimana Emmanuel umukozi w’ikigo cy’igihugu cy’ubuzima, RBC ushinzwe ibikorwa byo kurwanya Malaria agira ati “Twagiye duhindagura imiti, muri 2016 twazanye umuti ufite ubushobozi bwo kurwanya Malaria, ubu turi kuwukoresha muri Kirehe na Nyagatare.”

Avuga ko hakiri ikibazo cy’ubushobozi bwo kugirango igikorwa cyo gutera umuti kigere no mu tundi turere ariko ngo Leta y’u Rwanda na Ministeri y’Ubuzim barimo gukora ibishoboka byose bashaka abaterankunga, ku buryo mu kwezi kwa Gashyantare 2019 hazongerwa umubare w’uturere duterwamo umuti.

Bamwe mu baturage muri Kirehe by’umwihariko abo muri Nyamugali twaganiriye bavuga ko kuva mu mwaka wa 2010 iyi gahunda yatangizwa Malaria yagabanutse.

Habarurema Elias agira ati “Bitarabaho twakundaga kurwaragurika cyane ariko Malaria yaragabanutse aho batangiye kuduterera umuti kuko njye bamaze kunterera gatatu n’ubu bwa kane bongeye kunterera hari ikizere rwose ko Malaria izacika burundu.”

Umuyobozi w’akarere ka Kirehe Muzungu Gerard asaba abaturage kudakinga inzu igihe abatera umuti babagannye kandi bakaborohereza kugera no mu byumba byose kugira ngo igikorwa kizarangririre igihe.

Ati “Iyo twateye umuti imibu ntabwo yongera kugaragara, ndabasaba rero ko hatazagira usiga akinze inzu ngo yigendere kuko aho kugira ngo muzate umwanya mujya kwamuganga kwivuza uwo mwanya mwazawukoresha mwiteza imbere.”

Iki gikorwa cyo gutera umuti wica imibu itera Malaria kirimo gukorwa mu mirenge yose igize akarere ka Kirehe, kikaba kizamara iminsi 20 uhereye tariki 10 Nzeri.

Gutera umuti mu ngo z’abaturage hagamijw ekurwanya Malaria cyatangijwe mu Rwanda mu mwaka wa 2007, mu karere ka Kirehe gitangizwa mu mwaka wa 2010 aho kitabiriwe ku kigero cya 98%.

Mu mihigo y’uturere ya 2017-2018, aka karere ka Kirehe kari kahize ko ubu noneho iki gikorwa kizitabirwa 100% hagamijwe kurandura Malaria burundu dore ko ari kamwe mu turere yagaragayemo cyane mu myaka yashize.

Ubushakashatsi buheruka gukorwa ku isi yose bwaragaragaje ko umubare w’abahitanwa na Malaria mu bihugu bitandukanye uruta kure uw’abahitanwa n’intambara.

Ni ikipe nini izenguruka akarere ka Kirehe kose batera umuti mu nzu
Ubuyobozi bw’akarere ka Kirehe ngo burashaka kurandura burundu Malaria

Elia BYUK– USENGE
UM– USEKE.RW

Subiza

Your email address will not be published. Required fields are marked *