• 13/12/2019 9:18 52

Kirehe: Abantu 142 269 bivuje indwara z’ubuhumekero mu mwaka ushize

Ubwo hagaragazwaga uko imihigo yeshejwe mu bijyanye n’ubuvuzi mu karere ka Kirehe, Umuyobozi w’Ibitaro bya Kirehe yagaragaje ko hagati ya Mutarama 2018 na Gashyantare 2019 abantu 142 269 baje kwivuza indwara z’ubuhumekero ari nabo benshi bivuzaga indwara zimwe. Muri aka karere kandi abana 8 bapfa buri kwezi batarageza imyaka itanu.

Umuyobozi w'ibitaro bya Kirehe (ufite microphone) avuga bimwe mu bibazo bahura nabyo
Umuyobozi w’ibitaro bya Kirehe (ufite microphone) avuga bimwe mu bibazo bahura nabyo

Mu ndwara zivujwe na benshi, nyuma y’izu’ubuhumekero hakurikiraho indwara z’inzoka zo mu nda aho abazivuje bagera ku 28 575, ku mwanya wa gatatu hari indwara zo mu nda (27 876) naho ku mwanya wa kane abagera kuri 22 854 bivuje impiswi aba ngo biganjemo abana batoya.

Intwara ya Malaria yivujwe n’abagera ku 18 690, ukwezi kwa Kamena kukaba ariko kwiganjemo benshi mu bivuje iyi ndwara bagera ku 5 000 naho ukwezi k’Ukwakira Malaria yivujwe n’abari munsi ya 1500 ari bo bake bivuje.

Kirehe ibangamiwe cyane n’umubare w’abagore babyara abana bafite ibilo bike n’abagira ibise mbere y’igihe bigatuma umubare w’ababye n’abana bapfa mu gihe cyo kubyarwa no kubyara biyongera.

Dr Ngamije  Patien Umuyobozi w’Ibitaro bya Kirehe avuga ko hagati ya Mutarama 2018 na Gashyantare 2019 habyajwe abagore 8068 muri bo icyenda (9) bapfuye babyara aho benshi (90 ku ijana) bishwe no kuva babyara.

Abana umunani (8) bari munsi y’imyaka itanu nibura muri uyu mwaka (Mutarama 2018 kugera muri Gashyantare 2019) barapfa buri kwezi muri aka karere ka Kirehe.

Iyi ni ishusho y’imibare y’abana bapfa mu gihembwe bakiri impinja muri Kirehe; 

Uyu muganga ati “Abaganga baba bagerageje bikanga kuko abenshi mu bana bavukana ibiro bike. Ni ikibazo kidukomereye hakwiye ubushakashatsi.”

Ku kibazo cy’abagore bagira ibise mbere y’igihe, n’abakuramo inda na bo ngo ni benshi (hagati ya 5-10 buri kwezi) mu bagannye kwa muganga. Kuri aba biyongeraho abagera kwa muganga abana babapfiriye mu nda.

Uyu muganga agasaba ko haba ubushakashatsi kuko ngo bo bakeka ibi bibazo biterwa n’amazi abaturage banywa, ibindi binyobwa se cyangwa imiti baba bakoresha.

Nubwo bihagaze uko abajyanama b’Ubuzima 2 508 bari muri aka karere bashimirwa uruhare bagira mu buvuzi kuko bavuye 1/2 cy’abarwaye Malaria batageze kwa muganga banifashishwa kugeza abagore batwite  kwa muganga.

Abari muri iyi nama barashakisha umuti ku bibazo byagaragajwe, cyane cyane ibigituma abagore bakuramo inda cyangwa abana bavutse bagapfa batagejeje imyaka itanu.

Abayobozi n'abafatanyabikorwa ba Kirehe barashakira hamwe ibisubizo kuri ibi bibazo
Abayobozi n’abafatanyabikorwa ba Kirehe barashakira hamwe ibisubizo kuri ibi bibazo

HATANGIMANA Ange Eric
UM– USEKE.RW

1 Igitekerezo

  • Ariko mana, njye iyo nsomye inkuru nkiyi agahinda karanyica nkamara nkicyumweru cyose numva ntameze neza cyanr cyane iyo ndebye uburyo abayobzi bacu babayeho, uburyo basesagura…. Ubu koko twananiwe no guha abaturage amazi asukuye kweli !

Subiza

Your email address will not be published. Required fields are marked *