• 11/12/2019 3:18 48

‘Kigali Car free days’ yahesheje u Rwanda igihembo

Umujyi wa Kigali watsindiye igihembo mu irushanwa ryitwa Wellbeing City Award mu bijyanye no kurengera ubuzima bw’abawutuye binyuze mu bikorwa bya Siporo no gusuzuma indwara ku buntu ‘Kigali Car Free Days’. Wellbeing City Award ni irushanwa ruhemba umugi wahize indi mu kwita ku mibereho myiza y’abayituye.

Perezida Paul Kagame ajya afata umwanya akitabira ibikorwa bya Car Free Day agakorana siporo na rubanda rusanzwe

Umuryango uharanira ko abatuye imigi bagira ubuzima bwiza witwa NewCities ufatanyije n’umuryango uharanira ubuzima bwiza mu batuye Africa yo munsi y’Ubutayu bwa Sahara no muri Asia witwa Novartis Foundation ukorera mu Busuwisi, na Novartis US Foundation, ndetse n’umugi wo muri Canada wa Montréal, byatangaje Kigali, nk’umugi ukwiye igihembo muri ririya rushanwa Wellbeing City Award2019.

Iri rushanwa ni rimwe mu ategurwa ku rwego mpuzamahanga agamije guhemba ibitekerezo byiza na politiki za Leta zigamije gufasha mu mibereho myiza y’abatuye imigi.

Umujyi wa Kigali watoranyijwe mu izahabwa igihembo kubera gahunda yitwa Kigali Car Free Day.

Muri iyi gahunda, buri cyumweru cya mbere n’icya gatatu abatuye Kigali bashishikarizwa kugenza amaguru bagakora siporo rusange kandi bakanisuzumisha indwara zitandukanye cyane cyane iz’itandura.

Iyi gahunda yatangijwe muri Kigali mu 2016 n’Ubuyobozi bw’Umujyi wa Kigali.

Ababarirwa mu bihumbi mu batuye i Kigali bitabira ibi bikorwa ndetse rimwe na rimwe Umukuru w’Igihugu, Paul Kagame cyangwa Jeannette Kagame bajya bitabira iyi gahunda, bagakorana siporo na rubanda rusanzwe.

Marie Chantal Rwakazina, Umuyobozi w’Umujyi wa Kigali, yagize ati “Twishimiye kuba Kigali yatoranyijwe mu bazashimirwa muri Wellbeing City Award2019 mu bijyanye no guteza imbere ubuzima rusange. Uku ni ukuduha ikizere kuri gahunda ya Kigali Car Free Day nk’igikorwa kigamije kuzamura ubuzima n’imibereho myiza mu mugi.”

Rwakazina ashimira abaturage bitabira igikorwa cya Car Free Days n’abatekereje kugishyiraho.

Ati “Tuzakomeza guteza imbere imibereho myiza ku baturage bacu, kandi tunagerageze kwagura ibikorwa bya Car Free Day.”

John Rossant washinze NewCities akanayiyobora avuga ko umuryango we wishimira gahunda zigamije kuzamura imibereho myiza y’abaturage, na politiki zishyira imbere imibereho myiza.

Ati “Impuguke zacu zishimiye intambwe Umujyi wa Kigali ugezeho. Tubona uko abantu barushaho kwitabira Car Free Days, ndetse Kigali yarushijeho gushishikariza abaturage kwitabira ibikorwa biteza imbere imibereho myiza. Ni byiza, kandi twishimiye ko bari mu bagenewe igihembo mu bijyanye no guteza imbere ubuzima, bari babikwiye.”

Imigi isaga 100 mu bihugu 27 ku Isi byari byitabiriye iri rushanwa. Ubusabe bwa nyuma bwakiriwe n’impuguke zirimo Arianna Huffington, Dr. Aisa Kirabo Kacyira, na Daniel Libeskind.

Umugi wa Milan mu gihugu cy’Ubutaliyani ni wo watoranyijwe nk’uteza imbere imibereho myiza y’abaturage (Wellbeing City2019) Santa Monica, wo muri America na wo wagenewe igihembo, Pune wo mu Buhinde watoranyijwe nk’utanga amahirwe mu iterambere ry’ubukungu no guhanga akazi, umugi wa Lisbon, muri Portugal uzahemberwa ko wita ku iterambere rirambye.

Mu bandi baterankunga b’iki gikorwa ni Toyota Mobility Foundation, Transdev, na gahunda igamije guteza imbere ibidukikije muri America (US Green Building Council).

Gutanga ibihembo ku babitsindiye bizabera mu nama izabera mu mugi wa Montréal tariki 19-20, Kamena 2019.

UMUSEKE.RW

1 Igitekerezo

  • Ariko bajye bafunga imihanda batekereza ko abajya gusenga bakeneye aho baca ngo bagere aho basengera. Uzi kubona parking ya Eglise irimo ubusa, abafite imodoka bose baje n’amaguru, abazizanye bari mu gihirahiro bafungiwe amayira, mwatangira gusenga ukumva induru y’abiruka mu mihanda bahazenguruka inshuro nyinshi? Jye mba numva binteye agahinda. Iyo gusenga Imana abantu babisimbuje kwikorera sport, hari imigisha baba badashobora kwitega kubona kuko baba bayiteye ishoti.

Subiza

Your email address will not be published. Required fields are marked *