• 15/12/2019 5:46 24

Kibeho: Ishuri ryabonekerewemo byarisigiye umugisha udakama…Bubakiwe ‘dortoir’ za Miliyari 1,5

Ishuri ryitiriwe Urwunge rw’Amashuri Nyina wa Jambo (Groupe Scolaire Mere du Verbe) ryabereyemo amabonekerwa riherereye i Kibeho mu karere ka Nyaruguru batashye ku mugaragaro inyubako ebyiri z’amacumbi y’abanyeshuri [dortoirs] zuzuye zitwaye Miliyoni 1,7 USD angana na Miliyari 1,5 Frw habariwemo n’ibikoresho birimo.

Batashye izi nyubako

Umuyobozi w’iri shuri G.S Mere du Verbe, Sœur Marie Brigitte Uwizeramariya avuga ko ryashinzwe na Kiliziya Gaturika mu 1968, mu 1981 ryakira umubyeyi Bikiramariya watangiye kubonekera bamwe mu banyeshuri bahigaga.

Ati “Iri ni ryo shuri rya mbere ryasuwe na Bikiramariya, ntekereza ko ari mu Rwanda, ari muri Africa no ku Isi yose, nta handi Bikiramariya yasuye ishuri, agasura abana b’abanyeshuri biga.”

Avuga ko kuva icyo gihe Bikiramariya yagenderera iri shuri ryakomeje kwisukiranyamo imigisha ku buryo ari na cyo cyamanuye abaterankunga b’Abanyamerika babubakiye ariya macumbi y’abanyeshuri.

Ati “Kugira ngo dushobore kubona abaterankunga byaturutse ku mateka y’iri shuri kuko Bikiramariya iyaba ataradusuye ntabwo n’iki gikorwa kiba cyaragezweho, Bikiramariya ni we tubikesha by’umwiharko kuko abantu baza gusura iri shuri bakadufasha nk’uku ni ukubera ko yaje kudusura.”

Avuga ko amacumbi aba bana bari basanzwe babamo yari ashaje kuko yari amaze imyaka 50 kandi ko bari bacucitse kubera ubwinshi bw’abaza kuhavoma ubumenyi, avuga ko aya macumbi mashya azabafasha gukomeza kwitwara neza mu myigire.

Ati “Ubu bagiye kumererwa neza bagire ubuzima bwiza, baryame neza kandi uko bagenda babaho neza ni na ko n’ibindi byiza bigenda biza.”

Soeur Uwizeramariya avuga ko ubusanzwe umwana wese uje kwiga muri ririya shuri azanwa n’amateka yaryo ku buryo buri wese agendera mu murongo waryo.

Isaro Merissa wiga mu mwaka wa Gatandatu muri iri shuri mu bugenge, Ubutabire n’Ibinyabuzima avuga ko amateka y’iri shuri amuha umukoro wo kwitwara neza mu masomo no mu myitwarire y’ubuzima busanzwe.

Uyu mwangavu wize imyaka itandatu yose muri ririya shuri, avuga ko kwiga kwa Nyina wa Jambo yabigiriyemo umugisha udasanzwe kuko abubatse ririya shuri bamwemere amahirwe yo kujya gukomeza amasomo ye mu mashuri makuru muri Leta Zunze Ubumwe za America.

Ati “Njye Nyina wa Jambo yangendereye ari mu buzima bwanjye.”

Iribagiza Immaculee wazanye abaterankunga bubatse izi nyubako avuga ko mu buzima bwe asanzwe akunda abana na Bikiramariya

 

Urukundo akunda Bikiramariya n’abana byabyaye uyu mugisha uje mu yindi…

Umunyarwandakazi Ilibagiza Immaculée uba muri Leta Zunze Ubumwe za America washibutsemo igitekerezo cyabyaye iki gikorwa, avuga ko mu buzima bwe asanzwe akunda Bikiramariya n’abana ku buryo ari byo byamuteye guhamagarira bariya bagiraneza kubaka ziriya nyubako.

Ati “Mama yahoraga atubwira ati ‘nimwiga mukamenya ubwenge, ibibazo by’ubuzima byose muzabyishoboza, uzakora umwuga umwe nukunanira uge mu wundi ariko nibura mumenye ubwenge’, ese uzasoma bibiliya ute utazi gusoma.”

Umuherwe David Stirling wubatse izi nyubako, avuga ko abana ari bo musingi w’Isi y’ejo akavuga ko nubwo bamwe mu bana biga muri ririya shuri bahura n’ibibazo bishingiye ku mibereho yabo n’imiryango yabo ariko bagomba guhora bazirikana ko bafite mu biganza byabo ubuzima bwabo n’ubw’igihugu cyabo mu bihe biri imbere.

Mu butumwa bwuzuye ihumure, yagize ati “Ntimuzagire ubwoba bwo kuba mwagwa ahubwo kubyuka ni cyo cya mbere, mwibuke ko guta ikizere no kwiheba bidaturuka ku mana, muzirikane ko ibyemezo muzagenda mufata ari byo bizagena uko muzabaho.”

Umuyobozi w’Akarere ka Nyaruguru, Habitegeko Francois avuga ko inyubako bariya bana baraamo zimaze imyaka 50 zari ziteye impungenge kuko zashoboraga gushyira mu kaga ubuzima bw’abana bazirararamo.

Habitegeko uvuga ko uyu mushinga ukiza habanje kuzamo impaka niba amafaranga wagenewe yakoreshwa mu bikorwa byo gukora umuhanda cyangwa kubaka aya amacumbi.

Avuga ko ubuyobozi bw’akarere bwafashe ikemezo ko ariya mafaranga akoreshwa mu kubakira ririya shuri amacumbi kuko biri mu kererekezo cyo kwimakaza ireme ry’uburezi rifatwa nk’ipfundo ryo kubaka igihugu gishikamye k’ejo hazaza.

Ati “Ni yo mpamvu twawuhaye inda ya bukuru ariko n’umuhanda uzubakwa.”

Habitegeko uvuga ko ariya mahirwe azanye ifumba mu ireme ry’uburezi muri aka karere ayoboye, avuga ko ziriya nyubako z’amacumbi ya ririya shuri ari iza mbere mu Rwanda,

Ati “Ndatekereza ko muri iki gihugu nta hantu hari dortoire [amacumbi y’abanyeshuri] nka ziriya , ni umwihariko ariko ibyiza birushijeho biri imbere.”

Umushinga wa biriya bikorwa uzagenda ushyirwa mu bikorwa mu byiciro bibimburiwe n’uyu w’amacumbi y’abanyeshuri, ukazarangira utwaye miliyoni 4 USD.

Ni inyubako zigeretse kabiri
N’ibikoresho byose byashyizwemo
Ni inyubako idasanzwe
Irimo ikoranabuhanga rifasha abana kuzamuka no kumanuka
David Stirling n’umufasha we basabye abana biga muri iri shuri guhorana ikizere
Abanyeshuri biga muri iri shuri bagiye kujya barara mu macumbi meza
Meya Habitegeko avuga ko aya ari amahirwe adasanzwe yo kugira ubutaka butagatifu
Igihozo ati Nyina wa jambo namutuje mu buzima bwanjye
Bafite Choral iririmbana ubuhanga
Bafite Choral iririmbana ubuhanga
Abanyeshuri biga muri ririya shuri babahaye impano birabashimisha

Photos ©FOCUSiCON

Martin NIYONKURU
UMUSEKE.RW

4 Ibitekerezo

  • Imana ibahe umugisha Babyeyi beza, ari abatanze inkunga, Ilibagiza wabibashishikarije n’abandi beza. Abana nabo Imana ibakuze m’ubwenge. Bikiramaliya Umubyeyi akomeze abiteho, numubnyeyi w’impuhwe utwingingira iyo bibaye ngombwa

  • Buretse na Basilica izamuke mu myaka mike iri imbere, maze dukomeze turyoherwe n’ibitangaza Imana idukorera inyuze ku ntore yihitiyemo, zirangajwe imbere na Bikira Mariya.

  • Leta nirebere ku gikorwa nk’iki, yikubite agashyi ivugurure nibura Groupe Scolaire Officiel y’i Butare.

  • Be Blessed
    (ndaharebye numva najya kwigayo neza neza)

Subiza

Your email address will not be published. Required fields are marked *