• 11/12/2019 1:42 49

Kenya: Minisitiri w’imari yigemuye kuri Polisi nyuma yo kuvugwaho ruswa

UPDATE: Minisitiri w’Imari muri Kenya yijyanye ubwe kuri Polisi nyuma yo kuregwa n’Umushinjacyaha Mukuru avuga ko akurikiranyweho ruswa.

Henry Rotich ashinjwa imigenzereze idahwitse mu gutanga isoko rya miliyoni 450 z’amadolari rijyanye no kubaka ingomero ebyiri bikozwe na sosiyete yo mu Butaliyani yitwa CMC de Ravenna.

Minisitiri Rotich ahakana ko ntacyo yakoze kinyuranyije n’itegeko mu byo aregwa.

 

Inkuru ya kare: Ubushinjacyaha bukuru bwa Repubulika ya Kenya bwatangaje ko buri busabe Polisi ya Kenya guta muri yombi Minisitiri w’imari Henry Rotish kubera ruswa no kunyereza umutungo wa Leta. Ni ikintu kidasanzwe ko Minisitiri uri mu kazi atabwa muri yombi.

Minisitiri w’imari wa Kenya ngo agiye gufungwa akurikiranyweho ruswa no gupfusha ubusa umutungo wa Leta

Polisi yari imaze igihe ikora iperereza ku mikoreshereze mibi y’umutungo wa Leta mu kubaka urugomero mu mushinga Kenya yari yatewemo inkunga n’Ubutaliyani.

Rotish n’ikigo cy’Abataliyani kitwa CMC Di Ravenna byahakanye uruhare mu byo Polisi ibashinja.

Umuvugizi w’ubushinjacyaha bwa Repubulika ya Kenya, Noordin Haji avuga ko Rotish n’abo bareganwa bakurikiranyweho ibyaha umunani.

Abashinjacyaha bo muri Kenya basabye bagenzi babo bo mu Bwongereza no mu Butaliyani kubafasha mu kwegeranya ibimenyetso simusiga bishinja Minisitiri Rotish n’abo mu kigo CMC Di Ravenna.

Minisitiri Rotish kandi azafungwa aburane ari kumwe n’abandi bayobozi mu nzego nkuru za Kenya na kiriya kigo  cy’Abataliyani barimo umuyobozi wa kabiri muri Minisiteri ayoboye n’Uyobora CMC Di Ravenna witwa Kamau Thugge.

Ubushinjacyaha buvuga ko amafaranga menshi mu yagenewe kubaka ingomero ebyiri yanyerejwe.

Amafaranga yose hamwe yari yarateganyijwe yanganaga na miliyoni $446.

Gufungwa kwa Minisitiri Rotish bishobora kuzana umwuka mubi hagati ya Perezida Uhuru Kenyatta na Visi Perezida we William Ruto.

Uyu mwuka mubi ushingiye ku ngingo y’uko Rotish yagizwe Minisitiri w’Imari ku busabe bwa Ruto, uyu Ruto akaba aherutse gutangaza ko aziyamamariza kuyobora Kenya mu matora y’Umukuru w’Igihugu azaba muri 2022.

The Reuters

Jean Pierre NIZEYIMANA
UMUSEKE.RW

Subiza

Your email address will not be published. Required fields are marked *