• 11/12/2019 5:22 46

Kayonza: Impanuka ya coaster itwara abagenzi yishe 3 barimo uruhinja

Kuri uyu wa Kabiri taliki 16 Nyakanga mu Karere ka Kayonza habereye impanuka ikomeye yaguyemo abantu batatu, barimo umugore n’umwana we w’uruhinja.

Iyi modoka yari ivuye i Kabarondo iri mu muhanda w’igitaka wa Rwinkwavu

Impanuka yabereye mu muhanda w’igitaka Mudugudu wa Bwantama,  Akagari ka Rubumba, Umurenge wa Kabare ahagana saa 16h50.

Imodoka yo mu bwoko bwa coaster ifite plaque RAB 424C yari itwawe na Simon Hagenimana w’imyaka 32, yavaga i Kbarondo igana i Nasho muri Kirehe,  amakuru avuga ko yikanze Fusso yari ije iyisatira shoferi wa coaster ayisubiza inyuma ahantu haterera cyane miko kugwa mu mukingo.

Mu bagenzi yari itwaye hapfuye abantu batatu barimo umugabo umwe, hamwe n’umugore wari ufite umwana w’umwaka umwe nk’uko amakuru Umuseke ufite abyemeza.

Umwe mu bakora mu rwego rw’ubuzima yabwiye Umuseke ko batatu bitabye Imana (umugabo, umugore, n’umwana), naho abandi bakomeretse bakaba bari gukorerwa ubutabazi bw’ibanze ku Kigo Nderabuzima cya Murindi, hafi y’aho impanuka yabereye.

Abarembye ambulance zigiye kubajyana ku Bitaro, ikaba yoherejwe n’Ibitaro bya Rwinkwavu. Ibitaro bya Gahini, Kibungo, n’ibya Kirehe na byo ngo biriteguye kuba byafasha abarembye.

Umunyamabanga Nshingwabikorwa w’Umurenge wa Kabare, Mbare Semugisha Theogene yabwiye Umuseke ko abakomeretse cyane ari babiri bajyanywe ku Bitaro bya Kibungo biri mu Karere Ngoma.

Iyi mpanuka ibaye nyuma y’indi ikomeye yabereye mu Karere ka Karongi na bwo imodoka ya coaster yarenze umuhanda mu gitondo cyo kuri uyu wa kabiri tariki 16 Nyakanga, ihitana abantu 11, barimo barindwi bapfuye impanuka ikimara kuba.

Umuseke wagerageje kuvugisha Umuvugizi wa Polisi ishami ryo mu muhanda ntibiradukundira.

Umushoferi wa coaster ngo yikanze imodoka ya Fuso asubira inyuma ahantu hafite ubuhaname imodoka igwa munsi y’umusozi
Abantu batatu bahise bitaba Imana abandi bari kwitabwaho

Amafoto@ Social Media

Jean Pierre NIZEYIMANA
UMUSEKE.RW

Subiza

Your email address will not be published. Required fields are marked *