• 19/01/2020 4:29 57

Karubura na Gakara bashakanye kera ntibabyara, mu zabukuru bakeneye ubitaho

*Babanye igihe kirekire ntibabyara ariko ntihagira usiga undi,
*Ubu bageze mu zabukuru imibereho yabo ngo iragoye kuko nta we bagira ubitaho,
*Ubuyobozi bw’aho batuye ikibazo cyabo barakizi ariko kukibonera igisubizo biragoye.

Umusaza witwa Gakara n’umukecuru we Ephrasie Karubura barasazanye ariko nta mahirwe bagize yo kubyara umwana, aho batuye Kagari ka Nyarurama mu Murenge wa Gatenga, bavuga ko bakeneye umuntu wo kubitaho akabashajisha byaba ngombwa akajya abihemberwa n’ubuyobozi.

Gakara n’umugore we bashaje batibarutse ariko ntawigeze asiga undi

Inzu y’aba bantu babaye intangarugero mu rukundo ruzira uburyarya isa n’ikomeye uyirebeye inyuma, ariko mo imbere nta bintu byinshi birimo byafasha abantu kubaho.

Mu cyumba bararagamo hari haratutumbyemo umugina munini w’imiswa, ariko ubwo Umuseke wasuraga uriya muryango kuri uyu wa kane tariki 30 Gicurasi twasanze abaturanyi bafatanyije n’ubuyobozi bw’Akagari ka Nyarurama baraye bawusenye.

Aho uyu mugina wari wameze hafi y’urukuta, ubuyobozi bwahateye umuti ubuza imiswa kuzamuka.

Karubura Ephrasie avuga ko yatuye muri Kigali avuye i Byumba (aho yaturutse ubu hahindutse muri Rulindo). Ubu bageze mu zabukuru ikintu k’ingenzi bakeneye ngo ni umuntu ubafasha gusaza neza ubuyobozi bukaba bwajya bumuhemba.

Mu mvugo irimo ubuhanga no gutebya, Karubura avuga ko we n’umugabo we (yatakaje ku rugero runini ubushobozi bwo kumva) babeshejweho n’inkunga ya VUP bahabwa na Leta, ikabafasha guhaha iby’ibanze no guhingisha isambu yabo batuyemo.

Ati: “Kagame ni we uduha icyo twishyura abaduhingira. Turabimushimira.”

Inzu babamo ifite ibyuma bitatu bito n’uruganiriro. Kubera ko umugina wo mu cyuma babaragamo bawusenye bakahasuka umuti witwa Vidanje, Umuseke wasanze bashashe mu ruganiniro kubera guhunga uwo muti.

Uyu muryango ubayeho mu buzima bugoye cyane, nta bwiherero bagira. Mu gikari aho igikoni giherereye hari gucukurwa ubwiherero, bigaragara ko byakozwe vuba cyane kandi bikiri mu ntangiriro. Hagati y’aho igikoni kiri n’aho hacukurwa ubwiherero nta metero eshatu zirimo.

Umuyobozi w’Akagari ka Nyakarama Venuste Tuyisenge avuga ko kubera ko ubutaka bwa hariya hantu bukomeye, ari urubuye, ngo ntibajya bacukura ngo barenze metero ebyiri bajya hasi.

Nubwo muri rusange ubuzima butoroshye Karubura ni we ubasha kumva akanavuga, asanga ikintu gikomeye ari ukubona uwo batuma amazi, cyangwa inkwi.

Karubura ati: “Urumva ko tubonye umwana akaza mu rugo imyaka yaba yeze akayisarura, agashyira inkono ku ziko… mbese urugo rukaba urwe, yabura umunyu akambwira,… Uwo mwana wamwanga koko? Ubundi se uwo mwana wamunganya iki?”

Umuyobozi w’Akagari ka Nyakarama Tuyisenge Venuste yabwiye Umuseke ko ikifuzo cy’umuryango wa Gakara gifite ishingiro kuko bakuze kandi batigeze babyara, bityo bakeneye uwabitaho mu myaka yabo y’izabukuru.

Ariko ngo kubona umuntu wemera kubana na bo mu gihe bakiri ku Isi ngo ni ikintu kigomba kwigwaho n’inzego zitandukanye harimo izo ku rwego rwo hejuru y’Akagari, nk’Umurenge wa Gatenga cyangwa Akarere ka Kicukiro.

Yemeza ko kuzana umuntu ngo afashe abantu ariko nyuma ukazasanga utagifite ubushobozi bwo kumwishyura neza byaba ari ukutareba kure.

Ati:“Ni ikintu tuzaganiraho n’abandi tukagira uko tubifataho umwanzuro.”

Ku biro by’Akagari ka Nyarurama
Iyi ni isambu Gakara n’umugore we bajya batangamo ikiraka abantu bakabahingira bakishyura ayo bahawe y’Ingoboka
Uyu niwo mugina wari warabateye mu nzu bananirwa kuwukuraho kubera izabukuru
Vidanje basutse aho bishenye umugina kuri uyu wa Gatatu
Aho hasa n’ahari uruziga ni aho umugina wari warageze
Twasanze iki gitanda na matelas yacyo bisa n’aho byashyizwemo mu masaha make yashize
Aha niho batangiye gucukura umusarane. Ngo ntibarenza metero ebyiri ujya hasi. Uri muri metero nke cyane hafi y’igikoni
Inzu batuyemo uyirebeye ku irembo
Ephrasie Karubura yari avuye guhaha yasize umugabo we w’ibihe byose ku rugo

Jean Pierre NIZEYIMANA
UMUSEKE.RW

3 Ibitekerezo

  • Kutabyara ni intimba 💔bari bishoboye none gusaza biri kubakoroga
    Mukomere bakambwe beza mwujuje inshingano zu urukundo ntimuzabura uza kubariraho nawe akiboneraho ubuzima ibintu ni magirirane❤️❤️❤️ Nkunze urukundo rwanyu rudahemuka💕💕💕💕

  • Nibarebe umuntu w’inyangamugayo bagirana amasezerano yo kubaraga ibyabo,ubundi urebe ko atabasazisha neza.
    Monde ya benefice!

  • ndemeranya n’uwatanze igitekerezo cyo gufashwa gushaka umuragwa,kdi Leta ibigizemo uruhare byakwemera kuko hari imfubyi zidafite shinge na rugero zabafasha zikaba abaragwa Inzego z’ubiyobozi zibyemeye

Subiza

Your email address will not be published. Required fields are marked *