• 29/01/2020 1:20 35

Karongi – Yiba ibyuma by’umushinga wo kuhira utanga inyungu ya miliyoni amagana

Iburengerazuba– Umusore w’imyaka 22 y’amavuko yaraye afatiwe mu kagari ka Gacaca Umurenge wa Rubengera mu karere ka Karongi amaze kwiba ibyuma by’umushinga wo kuhira ubuhinzi bw’imboga imusozi mu gihe cy’impeshyi, aje kubigurisha n’abagura ibyuma. Uyu mushinga uha muri rusange abaturage b’aka gace inyungu ibarirwa muri miliyoni amagana.

François yafatanywe ibyuma birimo n'insinga z'amashanyarazi
François yafatanywe ibyuma birimo n’insinga z’amashanyarazi

Uyu musore yemera ko ari ubwa kane yiba ibi byuma akaza kubigurisha muri ibi byumba bya ‘scrap’ bamwe bita ‘injyamani’. Ubucuruzi ubu bukorwa henshi mu gihugu n’abagura ibyuma bishaje bagurisha n’inganda zitunganya ibyuma.

Uyu musore witwa François yafatanywe ibyuma yaciye ku miyoboro yuhira amaterasi ari ku misozi muri aka gace byose byakozwe na MINAGRI mu mushinga “Land Husbandry, Water Harvesting and Hillside Irrigation Project/ Rural Sector Support Program” (LWH/RSSP).

Ibi byuma, François avuga ko abyiba kuri ‘site’ ya Karongi ifatira amazi ku mugezi wa Ntaruko wo muri aka gace. Ibi byuma bifasha kugeza aya mazi ku materasi ya Gitwa na Gacaca muri Rubengera cyane mu gihe cy’impeshyi.

Yafashwe mu gicuku aje kubigurisha

Mu cyumweru gishize muri akagace habaye umukwabo mu bagura ibyuma, bafungiye abagera kuri batanu bashinjwa kugura ibyuma birimo ibivanwa ku bikorwa remezo, ndetse n’abarezwe gukoresha abana iyi mirimo yo gutoragura ibyuma bakabazanira.

Aba bagura ibyuma mu cyaro nabo babigurirwa n’abavuye i Kigali iyo bimaze kugwira, aba nabo bakabigurisha inganda zitunganya ibyuma mu Rwanda no hanze.

Ni ubucuruzi buhererekanye bushobora kuba bugurishwamo ibyuma bya bimwe mu bikorwa remezo byubakwa ahanyuranye mu gihugu.

Mu bice binyuranye hajya habura ibyapa ku mihanda, za ‘tuyaux galvanisés’ z’amazi, ibyuma byo ku mihanda, ibyuma by’amashanyarazi n’ibindi.

Ibyo yafatanywe ni ibyuma binyuranye by'ibikorwa remezo
Ibyo yafatanywe ni ibyuma binyuranye by’ibikorwa remezo

Bikorimana Manasse umuyobozi w’Umudugudu wa Nyaburuye yari yaraye irondo kuri iki cyumweru, maze bafata François mu gicuku yikoreye umufuka bafunguye basanga urimo ibi byuma bimaze iminsi byibwa kuri uyu mushinga wo kuhira imusozi.

Uyu musore wafashwe yavuze abasanzwe bakorana nawe, aho babigurisha n’abandi biba bene ibi bikoresho.

François avuga ko ari ubwa kane yari azanye ibi byuma, kandi ari ubwa kabiri yari afashwe abyiba ariko ubwa mbere yarekuwe atanze ruswa ku bamufashe kuko ngo batari banamenye neza agaciro k’ibi byuma yiba.

Uwabibaguriraga witwa Ntaganda na we yahise atabwa muri yombi.

Abaturage baje kureba uyu wabahombyaga
Abaturage baje kureba uyu wabahombyaga

Yahombyaga abaturage bikomeye

Agronome w’Umurenge wa Rubengera Havugimana Martin avuga ko ibi byuma biba byuhiraga kuri hegitari 252 bigafasha abaturage bahinga imboga kubona umusaruro ufite agaciro ka miliyoni magana abiri no mu gihe cy’izuba.

Ubu bibazaga uko bazabasha guhinga mu gihe cy’izuba.

Ibikoresho byo kuri uyu mushinga bamaze kwiba ngo bifite agaciro ka miliyoni esheshatu hatarimo agaciro ko kubitunda.

Uwabiguraga nawe yafunzwe. Ubu ni ubucuruzi burebure burangirira ku nganda butuma bamwe banangiza ibikorwa remezo
Uwabiguraga nawe yafunzwe. Ubu ni ubucuruzi burebure burangirira ku nganda butuma bamwe banangiza ibikorwa remezo

Sylvain NGOBOKA
UM– USEKE.RW

2 Ibitekerezo

  • Hakwiye guhagarika vuba vuba ziriya ngand azabahinde zikora fer a beton mu byuma bishaje, zigatangira gutumiza ubutare bwo gushongesha. Ntaho Fer a beton zumugese zubatse inzu, biriya ntibyabaho mu burayi cg ahandi biyubaha

    • Ejobundi nashyize cloture ku kibanza cyanjye nsubiyeyo nsanga tube carré en acier zose bazimazemo. Menye aho byagiye noneho. Leta aho gufata aba nirebe matière première abo bahinde bakoresha aho bazivana. Uje kugulisha bamwandike kandi avuge aho yabivanye. Ni kimwe nimiti ya magendu.

Subiza

Your email address will not be published. Required fields are marked *