• 15/12/2019 9:14 24

Karongi: Umuco wa ‘ceceka’ utiza umurindi ihohoterwa mu ngo biyemeje kuwurandura

Abagize inama y’igihugu y’abagore mu karere ka Karongo biyemeje kurandura umuco wo guhishirana ukiri muri bamwe ukomeje gutiza umurindi ihohoterwa ryo mu ngo.

Abayobozi b’imidugugu, ab’utugari n’abo mu nama y’igihugu y’abagore biyemeje kurandura umuco wa ceceka

Mu biganiro bitangiza ukwezi kwahariwe ibikorwa bya Police bizibanda ku kurwanya ihohoterwa rishingiye ku gitsina n’iryo mu ngo, abagore bahagarariye abandi bibukijwe bimwe mu bikomeje gutera iri hohoterwa.

Umuvugizi wa Police y’u Rwanda CP John Bosco Kabera yagize ati “Harimo ubujiji, kutamenya  uburenganzira n’amategeko abarengera, umuco aho usanga abagore bavuga ngo ni ko zubakwa ndetse n’ ubukene.”

Bamwe mu bitabiriye ibi biganiro barimo abakuru b’imidugudu, ab’utugari n’abo nama y’igihugu y’abagore mu mirenge bavuze ko bagiye gusangiza abandi izi nyigisho ariko ko na bo bagiye guhangana n’ibyo bafitiye ubushobozi nko guca umuco wo guhishirana.

Nyiramisago Josiane  ukuriye inzego z’abagore mu murenge wa Rubengera avuga ko bagiye gushaka icyatuma imiryango ibana neza kuko bizima icyuho ihohoterwa ryo mu ngo.

Ati “Hari n’Ikibazo cy’Abana bahohoterwa ugasanga nk’umwana arasambanyijwe imiryango ikumvikana bakabirangiza hagati yabo.”

Avuga ko bazakomeza gukorana n’inzego z’umutekano kugira ngo amakuru y’ubu bwumvikane amenyekane kuko bituma abahohotera abana bakomeza kwidegembya banonona abana b’u Rwanda.

Muri ibi biganiro kandi umuyobozi wa RIB mu karere ka Karongi, Isac Rwema yagarutse ku icuruzwa ry’abantu na riri mu ihohoterwa rikorerwa umuntu.

Ati “Aho bitandukaniye n’ihohoterwa usanga  ugiye gucuruzwa abigiramo uruhare aho usanga n’imbuga nkoranyambaga zibigiramo uruhare.”

Avuga ko abenshi bajyanwa gucuruzwa muri Asia babizeza imirimo n’ubuzima byiza ariko bagerayo bagakoreshwa ibikorwa bibi birimo gukinishwa film z’urukozasoni, abandi bakabakuramo ingingo z’umubiri mu gihe hari n’abakoreshwa imirimo y’ingufu.

Uyu muyobozi wa RIB uvuga ko Leta y’u Rwanda yahagurikiye ibi bikorwa kuko hari n’abagiye bagarurwa baragejejwe muri ibyo bikorwa bibi, avuga ko Kuva   mu kwezi  kwa mbere 2017 kugeza mu kwa kenda  2018 ubugenzacyaha bwakiriye ibirego 34 by’abantu bacurujwe.

Uku kwezi kw’ibikorwa bya Polisi kwatangiye  ku wa 15 Nyakana kukazasozwa  ku wa 15 Kanama, mu cyumweru cya mbere bakoze ibikorwa byo kurwanya ibiyobyabwenge no kubitwikira mu ruhame, icya kabiri kibanda ku kurwanya ihohoterwa rishingiye ku gitsina no gusambanya abana, icya gatatu kikazibanda ku kwita ku bidukikije, naho icya nyuma kikaba icyo kurwanya impanuka zo mu muhanda.

Bahawe ibiganiro byabibukije ibibazo bitera ihohoterwa rishingiye ku gitsina

Sylvain  NGOBOKA
UMUSEKE.RW

4 Ibitekerezo

  • afande wavuze nabi abaturage ntago arinjiji ahubwo baba bakuiriye kuigishwa kandi barumva

  • Umuco waceceka se ko uli mugihugu hose kugirango bucye kabili niwanga uzimire ! Uzacika gute?

  • Baturage ba Karongi ntibakabashuke ngo mwemere,, mujye mwicecekera, igihe cyo kuvuga ntikiragera .

  • Nanjye ndunga buryabambanjirije. Murebe abantu bose buzuye muri gereza bazira kuvuga gusa. Muzaryumeho igihe kizagera muvuge. Ariko ubu byaba arukwikururira akaga.

Subiza

Your email address will not be published. Required fields are marked *