• 13/12/2019 10:42 00

Karongi: Ishuri ryisumbuye hari uvuga ko ari irye, Leta ikavuga ko ari iryayo

Harindintwari Jean de la Croix aravuga ko ishuri ryisumbuye rya Urumuli riherereye mu Murenge wa Gashali mu karere ka Karongi ari rye kuko abo barishinganye ari we wenyine uhari. Ubuyobozi bw’akarere bwo bukavuga ko iri shuri ari irya Leta.

Ishuri ES Urumuli Hari uvuga ko ari irye, ubyobozi na bwo bukavuga ko ari irya Leta

Harindintwari Jean de la Croix avuga ko iri shuri ryashinzwe n’Ishyirahamwe ry’ababyeyi ryitwaga Urumuri mu 1987, bamwe bakaza kwicwa muri Jenoside yakorewe Abatutsi abandi bagahunga agasigara ari wenyine.

Ati “Ni nge  wasigaye, ndi représentant légal [urihagarariye mu mategeko] nkaba na promoteur [urishakira inkunga].”

Uyu mugabo ugaragara nk’ukuze avuga ko Leta ntacyo imufasha mu mikorere n’imibereho by’iri shuri avuga ko ari irye.

Umunyamakuru wamubajije ikibazo cy’amatsiko niba ryarashinzwe n’ishyirahamwe akaba ari we usigaye wenyine niba ari we wenyine ugize ririya shyirahamwe, avuga ko ashaka gushyiramo abandi banyamuryango.

Ati “Twatinze gushaka abandi ariko tuzabashaka.”

Abarezi bakorera muri iri shuri batashatse ko amazina yabo atangazwa bavuga ko uyu musaza muri iyi minsi abahoza ku nkeke ababwira ko kiriya kigo k’ishuri ari ike kandi ko uwacunga nabi yamwirukana.

Umwe yagize ati “Hari igihe yigeze kwandikira bamwe muri twe (abarimu) amabaruwa  atwirukana kandi turi abakozi  ba leta ntaho ari nk’umukoresha…”

Akomeza agira ati “Hari igihe amasomo aba arimbanyije tukumva ngo hari inama ya representer, ako kavuyo kose bituma ireme ry’uburezi ritagenda neza ndetse natwe  bikatwica mu bitekerezo.”

Mukankunsi Chrisitine ufite umwana wiga muri ririya shuri uriya musaza bamufata nk’umubyeyi nk’abandi ariko ko iyo habaye inama y’ababyeyi ababwira ko ari we nyiri ikigo kandi ko ariwe ufata imyanzuro yose .

Umukozi w’akarere ushinzwe amashuli y’isumbuye n’ay’imyuga Mulindankiko Michelle avuga ko ririya shuri ari irya leta yarifashe nyuma ya Jenoside kuko ishyirahamwe ryarishinze ryari rimaze gusenyuka.

Uyu mukozi w’akarere uvuga ko nta muntu ufite uburenganzira bwo kubangamira uburezi.

Ati “Association yaba iriho yaba itariho ntawe ufite uburenganzira bwo kubangamira uburezi ngo turebere uwo musaza tumufata nk’umubyeyi ugifite ishyaka…

Iyo association ntayikibaho, ntacyo ifatanya na leta ibyo kuvuga ko ari representer ntabwo ari  ibyo, iyo  association  ikorere hehe se?  mu yahe mategeko se?  mu by’ukuri nta bikorwa byayo tuzi.”

Avuga ko ririya shuri rifashwa na Leta 100%. Ati “Ni twe duhemba abarimu ni twe twubaka amashuri, ni natwe dutanga buri kimwe.”

Sylvain NGOBOKA
UMUSEKE.RW/Karongi

6 Ibitekerezo

  • Ariko wenda yaba yararangaye, ntashake abandi, gusa birumvikana ko ariwe wasigaye, nkunze ko n’abo barezi n’uhagarariye amashuri abyivugiye, ryari iry’ababyeyi, babuze LETA irarifata. Ariko si LETA yaryubatse, yarabohoje; Ubwo byazakiranurwa n’inkiko.

  • Ntimwiyibagze ko hali amashuli menshi yubatswe n’amashyirahamwe y’ababyeyi birumvikana ko n’iryo lirimo,amashuli ya Leta mbere ya 1994 yose arazwi andi yose hali ayashoboye kugumanwa na beneyo andi arabohohorwa nk’ibitagira nyirabyo kandi niyo menshi.Hali n’abatinye kuvugira ibyabo kubera ubukana bw’ababibohoje.None nta buzukuru b’abahunze muli 1959 ubu balimo kuburena amasambu yasizwe na ba sekuru??

  • Ikigaragara gishoboka ni uko Leta yafashe ishuri ritari iryayo iraryubaka, ihemba abarimu,… Bazabanze barebe uwatangije kuhubaka niba ari Leta koko!! Naho ubundi uriya mubyeyi ararengana, gusa na we nanyure mu nzira zemewe n’amategeko niba afite ibimenyetso atari ukuvuga mu cyuka gusa nk’uwari umunyamuryango

    • Nk’uko umunyamakuru asoza avuga niba ishuri rifashwa na Leta ubwo si iryayo!

  • Hano leta biragaragarako yabohoje rino shuli.uyu musaza yitabaje inkiko yatsinda leta rwose.

  • Aho kugirango leta irengere ubusugire bwibikorwa byabantu bagize igitekerezo cyiza ngo ahubwo inabatere inkunga yaje ibohoza gusa. Ese uyu musaza ntashobora kubona inyandiko zagejejejwe muri leta kugirango iri shuli libone ubuzima gatozi dore ko leta ihoraho? Azibonye sinzi icyo abandi baba bari kugenderaho. Ahubwo niba afite abana nabuzukuru azabarage izo mpapuro muziyumvira ikizavamo nyuma.Ahubwo njyewe nsanga bigayitse ibisubizo abo bantu bamuha ntabanamuhe icyubahiro ko ari mubagize icyo gitekerezo bakanagishyira mu bikorwa.

Subiza

Your email address will not be published. Required fields are marked *