• 15/12/2019 9:44 11

Kamonyi: Umugabo yatemye abantu batatu umwe arapfa

Ku mugoroba wo kuri uyu wa Gatanu umugabo yatemye abantu batatu mu Murenge wa Runda, umwe yahise yitaba Imana. Byabereye mu Mudugudu wa Rukaragata mu Kagari ka Gihara muri Kamonyi. Uyu mugabo ngo akomoka mu Karere ka Muhanga akaba yari amaze igihe akorera i Kigali mu murenge wa Kimironko.

Muri abo bantu batemwe harimo umusaza w’imyaka 66 wapfiriye CHUK, mu gihe abandi bari kwitabwaho kwa Muganga.

Abakomerekejwe n’uriya mugabo witwa Jean Marie Vianney, barimo umugore w’imyaka 55  watemwe ukuboko, n’umugabo waje kubasha guhunga.

Abaturage babonye ibyo biba batangarije Umuseke ko bishoboka kuba hari uwihishe inyuma y’icyo gikorwa kuko uwo mugabo yaje abaza amazina y’umwe mu batemwe.

Umwe mu batuye mu Murenge wa Runda witwa Nizeyimana Eduard ati “Uyu mugabo yaje abaza izina rya Kamana (ni nyakwigendera wari ufite imyaka 60), bigaragara ko hari umuntu wari wamwohereje usanzwe umuzi neza.”

Umuvugizi wa Polisi mu Ntara y’Amajyepfo CIP Karekezi yatangarije Umuseke ko ayo makuru bayamenye ndetso ko uwabikoze Polisi yamaze kumufata.

Umuvugizi w’Urwego rw’Igihugu rw’Ubugenzacyaha, Mbabazi Modeste yadutangarije ko hatangiye iperereza ngo hamenyekane uwihishe inyuma ya kiriya gikorwa.

Umunyamabanga Nshingwabikorwa w’Umurenge wa Runda yadutangarije ko bariya babiri bamaze gusezererwa n’Ibitaro ngo bazajya bajya kwipfukisha.

NSHIMIYIMANA Dieudonné akora Stage /UMUSEKE.RW

2 Ibitekerezo

  • Abicanyi bose bible ibita ba Gahini.Nkuko Zaburi 5 umurongo wa 6 havuga,Imana yanga umuntu wese “umena amaraso ya mugenzi we”.Ahantu henshi muli bible,havuga ko ku munsi wa nyuma Imana izica abantu bose bicana.Kimwe n’abajura,abasambanyi,abakora amanyanga,abarenganya abandi,etc…Izabikora kugirango isi yose ibe Paradizo,ituwe n’abantu bayumvira gusa,nubwo aribo bake.Nkuko Yesu yavuze muli Matayo igice cya 24,Imana izabikora nkuko yabigenje igihe cya Nowa.Icyo gihe harokotse abantu 8 gusa bumviraga Imana kandi bakayishaka.Statistics zerekana ko icyo gihe isi yari ituwe n’abantu hagati ya 5-10 Millions.Bose Imana yarabishe uretse Family ya Nowa,kubera ko babwirizaga abantu ngo bahinduke bakanga,bakibera muli Shuguri no kwishimisha gusa,nkuko uyu munsi bimeze.Imana iteka ihana abantu ibwira bakanga guhinduka.Soma Petero wa 2,igice cya 3,umurongo wa 9 kugirango wumve impamvu Imana itinza kuzana Imperuka.Ni ku nyungu zacu.

  • Hari igihe ibintu nk’ibi byabaga, abanyarwanda ugasanga bihutira kubaza ngo uwatemye/uwishe abo bantu ni umuki? Abo yahohoteye ni abaki? N’itangazamakuru rikabishyuhamo cyane. None buhoro buhoro turagenda twumva ko abicanyi batagira ubwoko/idini/inkomoko cyangwa batica mu izina ry’ubwoko/idini/inkomoko. Abicanyi bose basangiye ubwoko bumwe bihariye, idini rimwe n’inkomoko imwe bihariye: ni ABICANYI nyine.

Subiza

Your email address will not be published. Required fields are marked *