• 12/12/2019 8:31 38

Kamonyi: Muri Jenoside Nsengiyumva yatawe mu cyobo avamo ari muzima

Ubwo bibukaga ku nshuro ya 25 Jenoside yakorewe Abatutsi mu Rwanda, Nsengiyumva Emmanuel mu buhamya bwe yavuze ko Interahamwe zamujugunye mu cyobo cya m 56 avamo ari muzima.

Nsengiyumva Emmanuel watanze ubuhamya avuga ko yatawe mu cyobo cya metero 56 avamo ari muzima

Umuhango wo kwibuka ku Nshuro ya 25 Jenoside yakorewe Abatutsi mu 1994 wabereye mu Murenge wa Rukoma mu Karere ka Kamonyi, Nsengiyumva Emmanuel wabashije kurokoka avuga ko atari azi ko azabaho kuko yatawe mu cyobo bacukuragamo amabuye y’agaciro.

Avuga ko taliki ya 19 Mata 1994 aribwo yafatanywe n’abandi Batutsi benshi, bamwe batangira kubica abandi babajugunya muri icyo cyobo kirekire babatera amabuye.

Yagize ati: “Nagezemo nsanga bagenzi bange bapfuye. Mu cyobo harimo Gaz yatumaga ntabasha kuzamuka ngo ngere imusozi.”

Avuga ko umwe mu bari basigaye yashoboye kurira ava mu cyobo amwoherereza umugozi ari na wo yazamukiyeho agera imusozi.

Gusa avuga ko baje kwerekeza i Kabgayi mugenzi we baramwica aho bari bihishe abona Inkotanyi ziraje zirabarokora.

Mayor Kayitesi Alice Umuyobozi w’Akarere ka Kamonyi yahumurije Abarokotse Jenoside by’Umwihariko n’abaturage muri rusange ko nta we uzongera kubavutsa ubuzima abaziza uko bavutse.

Kayitesi ati: “Dufite igihugu kimwe kidukunda turi bamwe muhumure nta uzongera kubaziza uko mwavutse twese dushyigikire Ndi Umunyarwanda kuko ni wo muzi uduhuza.”

Depite Uwera Marie Alice wifatanyije n’Abaturage muri uyu muhango, avuga ko uyu ari umwanya wo kwibuka abazize Jenoside bazize uko baremwe, ariko ukaba n’umwanya wo kwita ku bayirokotse bazirikana n’ubutwari bw’Ingabo zahoze ari iza APR Inkotanyi zahagaritse Jenoside amahanga acecetse.

Muri uyu muhango kandi abafashe amagambo bagarutse ku ruhare rwa Akayezu Jean Paul wategekaga Komini Taba washishikarije akanashyira mu bikorwa Jenoside yakorewe Abatutsi mu Rwanda akica abo yari ashinzwe kurinda.

Depite Uwera Alice wifatanyije n’abaturage kwibuka ku nshuro ya 25 Jenoside yakorewe Abatutsi
Abayobozi batandukanye bitabiriye Umuhango wo Kwibuka ku nshuro ya 25 jenoside yakorewe Abatutsi.
Kayitesi Alice Umuyobozi w’Akarere ka Kamonyi

MUHIZI ELISEE
UM– USEKE.RW/Kamonyi.

Subiza

Your email address will not be published. Required fields are marked *