• 20/01/2020 3:39 45

Kamonyi: Hari Abagabo bahukana bagata ingo kubera ubusinzi bw’abagore babo

Mu biganiro  Unity Club Intwararumuri  n’abaturage  bo mu Murenge wa Nyamiyaga mu Karere ka Kamonyi,  umubare munini w’abagabo washinje abagore ko basinda bakarara mu Kabari, ikibazo bavuga ko gituma hari abagabo bahukana bagata ingo.

Minisitiri w’Ubuhinzi n’Ubworozi Mukeshimana Gerardine avuga ko Iyo umuryango ufitanye amakimbirane udashobora gutera imbere.

Muri ibi biganiro abagize Unity Club Intwararumuri bavuga ko  ijambo rinini  bariharira abaturage  kugira ngo bavuge ibibazo bibangamiye imiryango.

Abagabo bavuga ko hari abagore batari bake bafite ingeso yo kunywa inzoga bagasinda bagataha mu rugo mu gitondo bukeye bagahohotera abagabo.

Rwagatare Augustin wo mu Mudugudu wa Gacumu, Akagari ka Kabashumba  muri uyu Murenge yabwiye abayobozi ko iki kibazo cy’abagore basinda kimaze gufata intera ndende kandi ko hari n’abasubiza abagabo ko  abagore bahawe ijambo muri iki gihe bitandukanye n’uko bahoze kera itegeko ry’uburinganire ngo n’ubwuzuzanye ritarabaho.

Yagize ati: “Mutubarize abagore impamvu badusuzugura tukaba tutagifite ijambo mu rugo bitwaza ubwo buringanire.”

Hon Manzi  Mukarugema Alphonsine  avuga  ko  kuba  umugabo ayoboye urugo neza bidakwiye kubangamira umugore  kuko nta gihe umugabo atigeze aba unutware w’urugo.

Ati: “Ku rundi ruhande  hari abagabo bafata abagore babo nk’abaja bakabaharira imirimo yose yo mu ngo ariko niba abagabo banyu bayoboye neza kuki bibabangamiye?”

Hari bamwe mu  bagore  banenga  iyi myitwarire  ivugwa kuri bagenzi babo. Bavuga ko  abavugwaho izo ngeso z’ubusinzi usanga n’imiryango bakomokamo  ari uko iba imeze.

Minisitiri w’Ubuhinzi n’ubworozi Dr Mukeshimana Gerardine wari umushyitsi mukuru avuga ko  imiryango ikwiye kwikosora ikagaruka ku muco kuko ngo umuryango niwo shinngiro ry’Igihugu.

Umibare itangwa n’Ubuyobozi bw’Akarere ka Kamonyi yerekana ko ingo 582 zifitanye amakimbirane.

Mu Murenge wa Nyamiyaga  ingo 57 zifitanye ibibazo by’akimbirane, mu gihe  abana  b’abakobwa 10 basambanyijwe, naho abagera ku 109 bari munsi y’imyaka 20 babyariye iwabo.

General Kabarebe James na Madame mu bagize Unity Club Intwararumuri
Rwagatare Augustin umwe mu bagabo bshinja abagore ubusinzi
Bamwe mu baturage bo mu Murenge wa Nyamiyaga bavuga ko hari bamwe mu bagore basinda bakarara mu kabari

MUHIZI ELISEE
UM– USEKE.RW/Kamonyi.

0 Igitekerezo

  • Umugabo avuze ikibazo cy’abagore babaye abasinzi, barara mu tubari, bakanasuzugura abagabo babo bitwaje uburinganire, mu kumusubiza Honirable Manzi Mukarugema Alphonsine ati: “hari abagabo bafata abagore babo nk’abaja bakabaharira imirimo yose yo mu ngo ariko niba abagabo banyu bayoboye neza kuki bibabangamiye?”. Ubu se arumva yasubije icyo yabajijwe?

Subiza

Your email address will not be published. Required fields are marked *