• 14/12/2019 7:52 42

Kamonyi: Abaganga 91 b’amaso bari kongererwa ubumenyi mu kuyavura

Abakozi 91 bakora mu bitaro bitandukanye by’amaso barahabwa ubumenyi ku bishobora gukomeretsa ijisho ndetse no ku izindi ndwara zitandukanye zikunze kwibasira ijisho.  

Abaganga basaba abaturage kujya bavuza amaso mu bitaro byemewe aho kujya muri ba magendu

Mujawamariya Donatha umwe mu bakurikiranye amahugurwa ajyanye no kuvura indwara z’amaso yabwiye Umuseke ko usibye indwara zikunze kwibasira Ijisho, usanga hari n’ibindi bikoresho bishobora kurikomeretsa nyiraryo yatinda kwivuza rikaba ryapfa cyangwa rikangirika mu gihe gito.

Avuga ko igiti, igipfunsi, umupira cyangwa impanuka biri mu bintu  bikomeretsa bikanangiza ijisho  ariko iyo nyiraryo yihutiye kujya kwa muganga w’amaso ahabwa imiti agakira vuba.

Yagize ati: “Hari imiti dutanga bitewe n’ikibazo ijisho ryahuye nacyo kandi turabavura bagakira hari n’amaso tubaga tubanje kuyakuramo. Bigorana  iyo dusanze yaratinze kwivuza bikagera ubwo imboni yangirika burundu.”

Ngo hari amaso yangirika biturutse ku ndwara zidakira zirimo Diyabete, n’indwara y’umuvuduko w’amaraso n’izindi.

Amahirwe ariko ngo ni uko ubu mu Rwanda hari abaganga benshi bavura amaso bakora mu bigo nderabuzima bitandukanye bityo abarwayi bakabona ababitaho.

Gusa ikibazo gihari kandi gikomeye n’uko hari abaturage bakomereka cyangwa bakarwara amaso mu buryo runaka bagahitamo kujya ku bavuzi ba gakondo, bikazabaviramo gupfa ijisho cyangwa amaso.

Ngo kuba ubuvuzi bw’amaso bwaregerejwe abaturage ku bigo nderabuzima ndetse ko n’abarwayi bakoresha Mitiweli bivuza amaso bikwiye korohera abafite ibibazo by’indwara z’amaso zitandukanye bakeneye kuvurwa aho kugira ngo bajye mu bavuzi ba gakondo bashobora gutuma amaso arushaho kwangirika.

Dr. Piet NOE uhagarariye ibitaro by’amaso biri mu Karere ka Kamonyi byitwa Rwanda Charity Eye Hospital (RCEH)  avuga ko muri gahunda z’ibi bitaro harimo no gutanga amahugurwa ku baganga b’amaso babyifuza kugira ngo bibafashe mu kazi kabo kandi n’abarwayi babone serivisi zinoze.

Avuga ko aya mahugurwa azajya akorwa kenshi kubera ko n’ubushakashatsi ku ndwara z’amaso buhinduka  buri munsi.

Ibitaro by’amaso mu Karere ka Kamonyi  Rwanda Charity Eye Hospital byatangiye gukorana n’ubwishingizi butandukanye burimo Uubwisungane mu kwivuza,MMI, RSSB/RAMA, SORAS, RADIANT, SAHAM, MIS/UR na Rwanda Bar Association.

Bizeye ko bazasubira mu aho bakora bafite ubumenyi bwisumbuye kurushaho
Abaganga bavuga ko hari ubwo abarwayi b’amaso bajya muri magendu bigatuma yangirika cyane
Dr. Piet NOE uhagarariye ibitaro by’amaso biri mu Karere ka Kamonyi byitwa Rwanda Charity Eye Hospital (RCEH)
Abaganga bavura amaso baturutse mu bitaro n’ibigo nderabuzima byo mu Rwanda bari guhugurwa ku byerekeye kuvura amaso bigezweho muri iki gihe

MUHIZI Elisee

UMUSEKE.RW/Kamonyi

Subiza

Your email address will not be published. Required fields are marked *