• 13/12/2019 7:38 58

Just Family yagarutsemo Croidja bahereye ku yo bise ‘Ntagikuba’

Hari hashize imyaka itanu Croidja wo muri Just Family atari muri iri tsinda, nyuma y’uko agarukiye, iri tsinda ryashyize hanze indirimbo bise ‘Ntagikuba’.

Croidaja wafatwaga nk’ishyiga ry’inyuma muri Just Family, akimara kugenda ryabaye nk’irihagaze ibikorwa bya muzika ariko riza kongera kwiyubaka ubwo ryari ryungutse undi muhanzi witwa Chris uherutse gusezera muri iri tsinda.

Just Family ivuga ko yagarutse mu muziki nk’uko yahoze mbere ubwo yari ku rwego rumwe n’amatsinda yakanyujijeho hano mu Rwanda nka Urban Boys na Dream Boys yombi yamaze kwegukana ibikompe muri PGGSS.

Uku kugaruka ngo baragukesha Croidja wari umaze igihe aba muri Africa y’Epfo ubu akaba yaragarutse muri muzika.

Croidja ati “Ubu nagarutse muri Just Family natashye iwacu mu Rwanda nk’uko undi wese uba I Mahanga yaza, ngiye gukomeza umuziki kuko ari akazi kanjye kuva na mbere.”

Mugenzi we Bahati avuga ko Croidja ari umuvandimwe wabo ngo mbere y’uko anagaruka mu Rwanda baraganiraga akabagira inama ku bihangano baba benda gusohora.

Ati “Ni umwana utashye iwabo kandi Just Family kuri we imeze nk’umubyeyi we.”

Avuga ko ubu itsinda ryabo rigiye kuba nka rimwe rya kera mu majwi abantu bari basanzwe bamenyereye.

Ubu bushake bwo kongera gukora nka mbere bwahereye ku ndirimbo iri tsinda ryakoze bise ‘Ntagikuba’ yasohokanye n’amashusho yayo.

Muri iyo ndirimbo ngo baba bashaka kwerekana ko ibyo bavugwaho nta gikuba kiba cyacitse.

Ati “Impano y’umuntu ntaho ijya ahorana nayo ngo abavuga ko Just Family itazongera kubaho nka mbere ngo baribeshya.”

Bonaventure KUBWIMANA
UM– USEKE.RW

Subiza

Your email address will not be published. Required fields are marked *