Iranzi avuga ko gukinira Rayon bihindura imitekerereze y’umukinnyi | UMUSEKE
  • 18/01/2021 12:12 28

Iranzi avuga ko gukinira Rayon bihindura imitekerereze y’umukinnyi

Umukinnyi wa Rayon Sports, Iranzi Jean Claude, avuga ko gukinira iyi kipe bitera akanyabugabo umukinnyi ku buryo igihe cyose uwambaye umwambaro w’iyi kipe ahora ashaka kuyiha ibyishimo.

Iranzi Jean Claude

Iranzi Jean Claude wari umaze iminsi ari mu misiri mu ikipe yari yatijwemo, kuri iki Cyumweru yongeye gukinira Rayon Sports mu mukino wa Gicuti yatsinze AS Muhanga 3-1.

Mu kiganiro yagiranye n’itangazamakuru nyuma y’uyu mukino, Iranzi Jean Claude yavuze agaciro umukinnyi uje gukinira Rayon Sports ayiha.

Ati “Rayon ni ikipe ikomeye, umwambora wayo ni ikintu gikomeye iyo wawambaye ntabwo uba ukitwa umwana, kuko uba ugomba guha abafana ibyishimo kuko ni abafana bakunda ibyishimo.”

Iranzi avuga ko iyi abakinnyi bafite intego imwe ntawita ku bunararibonye cyangwa ubukuru bwa bamwe ahubwo ko baba bagomba gushyira hamwe kugira ngo babone insinzi.

Asezeranya abakunzi b’iyi kipe ibyishimo kuko abakinnyi b’iyi kipe bafite intego yo kuzitwara neza bagaha ibyishimo abakunzi bayo nk’uko ari byo bahora bifuza.

Iranzi Jean Claude yatijwe Aswan FC yo mu Misiri mu mpera za Mutarama 2020. Ubwo uyu mukinnyi yajyaga mu Misiri, amakipe yombi yari yumvikanye ko niyitwara neza ashobora kugurwa n’iriya kipe agakomeza kuyikinira.

Iranzi yageze muri Rayon Sports muri Nyakanga 2019, ku masezerano y’imyaka ibiri, avuye muri APR FC yari amazemo umwaka umwe n’igice.

Yakinnye kandi i Burayi muri Slovakia, mu gihe atahiriwe muri Zesco United yo muri Zambia, yari yamwifuje mbere yo kugaruka mu Rwanda mu 2018.

Video ya Rayon Sports vs As Muhanga

Jean Paul MUGABE
UMUSEKE.RW

Subiza

Your email address will not be published. Required fields are marked *