• 08/12/2019 11:02 07

Iposita irashaka kujya ituma abashoferi ariko ikabasaba ubunyangamugayo

Safari Patrick uyobora ishami ry’ubucuruzi mu Iposita y’u Rwanda kuri uyu munsi yahuye na bamwe mu bashoferi bari bahagarariye abandi ababwira ko Iposita ishaka gukorana nabo ikajya ibatuma mu Ntara no mu mujyi wa Kigali. Yabasabye kuba inyangamugayo, bakubahiriza igihe kandi ntibatware  iby’abandi.

Safari Patrick avuga ko bizasaba ko abashoferi bongera urwego rw’ubunyangamugayo

Iposita y’u Rwanda ivuga ko muri iki gihe cy’ikoranabuhanga bikwiye ko abashoferi bayifasha mu kugeza ibintu by’abakiliya bayo baherereye hirya no hino mu Rwanda bakoresheje uburyo bwa GPS bwerekana ibyerekezo, ahantu n’urugendo rugerayo.

Ubusanzwe Iposita yajyanaga ubutumwa runaka ahantu ariko ntitware byinshi icyarimwe.

Safari avuga ko batekereje bagasanga uburyo bw’ubucuruzi bukoresha ikoranabuhanga bita e-commerce bwabafasha mu kunoza serivisi baha abakiriya babo.

Avuga ko gutuma abashoferi bizafasha abakiliya kutirirwa bajya ku isoko ngo bishyure n’ubwikorezi.

Ati: “Iyi ni serivisi nshya tuzaha abakiliya bacu igire icyo itwinjiriza duheho n’umushoferi wakidushyikiririje umukiliya imari ye.”

 Ngo abashoferi bongere ubunyangamugayo no gukorera ku gihe…

Safari  Patrick yasabye abashoferi kuzongera ubunyangamugayo bwabo kuko ngo hari bamwe muribo bagaragaraza imico mibi k’uburyo bashobora no kuba batageza ubutumwa bahawe kuri nyirabwo.

Ati: “ Ubunyangamugayo bwabo turabukemanga koko, ariko amahirwe ni uko tuzakorana n’abashoferi twahawe na Koperative zabo zizeye ubunyangamugayo bwabo. Tuzatoranyamo ab’inyangamugayo kurusha abandi.”

Avuga ko uzakora ikosa ryo gutwara ibyo tutamutumye cyangwa akagitwara iwe, uwo icyaha kizaba ari gatozi, ntabwo bizitirirwa Iposita.

Safari avuga ko buri mushoferi uzifuza gukorana n’Iposita muri iyi gahunda agomba kuzaba afite telefoni zikoresha ikoranabuhanga, rikazamufasha kubona urugendo rw’aho ashyiriye umukiliya w’Iposita ndetse n’aho uwo mukiliya aherereye.

Ikoranabuhanga rya GPS( Global Positioning System) rizafasha Iposita gukurikirana urugendo rw’umushoferi kugeza ajejeje icyo bamutumye ku mukiliya wayo.

Umushoferi witwa Yahunde Jean Damascene yabwiye Umuseke ko bishimiye kuzakorana n’Iposita ariko ayisaba kuzabafasha kubona telefoni zikoresha murandasi.

Ngo niyo bazibakopa bakajya bazishyura gahoro gahoro byaba byiza.

Yemeza ko batazifite ntacyo bashobora gufasha Iposita muri gahunda zayo.

Uburyo bwa e-commerce Iposita ishaka gutangiza buzafungurwa ku mugaragaro muri Kanama, 2019.

Abashoferi basobanuriwe uko ririya koranabuhanga rizakora

Jean Pierre NIZEYIMANA

UMUSEKE.RW

Subiza

Your email address will not be published. Required fields are marked *