• 13/12/2019 7:54 36

INTERVIEW: Mayor wa Nyamagabe gukina ‘biye’ byari bimukuye mu ishuri- Byinshi kuri we mu kazi no hanze

Umuseke wasuye Umuyobozi w’Akarere ka Nyamagabe, Uwamahoro Boneventure umuganiriza byinshi ku buzima bwe bwite no hanze y’akazi, ibibazo bimwe yarabisubije ibindi aravuga ngo ‘Oya’.

Mayor ngo iyo avuye mu biro bye hari ubwo akomereza akazi mu baturage, cyangwa mu nama akanya ko kuruhuka kaba ari gato

Nyamagabe ni kamwe mu Turere 8 tugize Intara y’Amajyepfo, gafite imirenge 17 n’abaturage barenga ibihumbi 360 aba bose bari mu nshungano za Mayor Uwamahoro Bonaventure ufite imyaka 41 gusa y’amavuko.  Uyu muyobozi ayoboye Akarere kuva tariki 08/02/2018.

Muri iki kiganiro kirambuye menya ubuzima bw’uyu muyobozi wanyuze mu nshingano nyinshi nubwo ari muto, kugera abaye Mayor.

Ikosa yakoze yibuka ni ugukina amabiye (billes) agahugira mu kurasa amagorori, Mwarimu akaza kumuhwitura agakabya, Mayor agatekereza no kuba yava mu ishuri.

Mayor akunda uwuhe muziki? Mayor afite abana bangahe? Byagenze gute ngo amenyane n’umugore we? Mayor atekereza iki ku Karere ayobora….

 

Ikiganiro kirambuye na Mayor wa Nyamagabe…

Umuseke: Umuseke urakwakiriye

Mayor Nyamagabe: Murakoze cyaneee

Umuseke: Uri umuyobozi w’Akarere ka Nyamagabe kuva ryari?

Mayor Nyamagabe: Kuva tariki 08/02/2018

Umuseke: Ufite imyaka ingahe?

Mayor Nyamagabe: Mfite imyaka 41 birumvikana ko navutse mu 1978.

Umuseke: Kuyobora Akarere ukiri muto ubifata ute?

Mayor Nyamagabe: Ni inshingano zikomeye, impamvu zikomeye ni uko uba ufite abaturage benshi uyoboye bakwitegereza bagutezeho byinshi mu guhindura imibereho yabo.

Umuseke: Wavukiye he? Ibwire abasomyi ba Umuseke mu buryo burambuye niba waranize ikiburamwaka na byo ubivuge!

Mayor Nyamagabe: Ntabwo nigeze niga ikiburamwaka! Nkomoka mu muryango uciriritse ayo mahirwe nge ntayo nigeze ngira.

Navukiye muri aka Karere ka Nyamagabe, ubu ni mu Murenge wa Mugano, niga amashuri abanza ku kigo cy’amashuri cya Karambi naho ni mu Murenge wa Mugano birumvikana amashuri yisumbuye nayize mu bice bibiri kuko mbere ya Jenoside yakorewe Abatutsi muri mata 1994 nigaga muri Ecole de Letre de Kibeho,“hariya habera amabonerwa” nyuma ya Jenoside amashuri yange nayakomereje mu ishuri ry’aba Mariste i Save mu Karere ka Gisagara, nyuma yaho nakoze imirimo itandukanye harimo kwigisha mu mashuri abanza n’ayisumbuye, nyuma nakomereje muri Kaminuza y’u Rwanda i Butare aho nakurikiranye amasomo ajyanye no kwigisha nyuma yo kurangiza ayo masomo nakoze imirimo itandukanye mu miryango itari iya Leta, imyaka igera kuri itanu nyuma nakomeje amashuri ahanitse (Maitrise) yo nayikuye mu Busuwisi niho navanye Maitrise ijyanye n’iterambere ry’abaturage, nyuma nakoreye ikigo kitwa LODA.

Nyuma nakoze nuri Minisiteri y’abakozi ba Leta n’Umurimo nyuma naje kugirirwa ikizere gikomeye na Guverinoma impa kuba Umuyobozi Mukuru mu kigo cyari gishinzwe kubaka ubushobozi, ari naho navuye nza kuba Umuyobozi w’Akarere ka Nyamagabe.

Umuseke: Mu Miremge 17 igize Nyamagabe ni uwuhe ufite abaturage benshi?

Mayor Nyamagabe: Umurenge ufite abaturage benshi ni umurenge wa Cyanika.  Ufite abaturage barenga ibihumbi 27 ndetse n’umurenge wa Gasaka akaba ari wo uwukurikira. Umurenge ufite abaturage bake ni uwa Kibirizi, barenga gato ibihumbi 18.

Umuseke: Imyaka itanu watorewe wumva Akarere ka Nyamagabe uzagasiga he?

Mayor Nyamagabe: Hari byinshi ngenda nubakiraho bisanzwe bihari, hari icyo kizere nagiriwe nshimira cyane ariko hakabaho n’ubufatanye n’abaturage, ariko haracyari n’ibibazo mu baturage byaba ubukene n’imibereho ikiri hasi ariko hari na gahunda zo kwiteza imbere na zo zirahari kandi zigezwaho abaturage, ni ukugira imyumvire ishobora gutuma umuturage ashobora kwiteza imbere izamuke.

Icyo nzi ni uko nzarangiza manda yange abaturage bange bafite imyumvire mizima ku buryo amahirwe ahari bayabyaza umusaruro. Icyo nzaharanira ni uko ukutazasiga inkuru mbi muri aka Karere ka Nyamagabe.

Umuseke: Wigeze igihe kimwe utekereza ko ushobora kuba Mayor? Inzozi zawe zari izihe mu mashuri yawe?

Mayor Nyamagabe: Oya, Eeeehhhh! Nkiga kera, nkiri umwana ntabwo nari mfite inzozi nyinshi.

Umuseke: Iyo urangije akazi kawe usohotse mu biro ukora iki?

Mayor Nyamagabe: Umuyobozi w’Akarere ntabwo asohoka mu biro n’iyo asohotse mu biro n’ubundi ibyo aba arimo biba ari ibintu bijyanye n’akazi.

Umuseke: Umudamu wawe mufitanye abana bangahe? Mumaranye imyaka ingahe? Muhura bwa mbere mwahuriye he?

Moyor Nyamagabe: Dufitanye abana batatu. Tumaranye imyaka 13. Duhura bwambere twahuriye muri Kaminuza kuko twariganye.

Umuseke: Ni nde washotoye undi amuzanamo ibyo gukundana?

Mayor Nyamagabe: Ninge birumvikana!

Umuseke: Wamubwiye iki?

Mayor Nyamagabe: Aaaaaa! Iryo ni ibanga ryange na we!

Umuseke: Waba wibuka ahantu mwari mwicaye bwa mbere umutereta?

Mayor Nyamagabe: Yego twari twicaye mw’ishuri turi kwiga isomo ry’ikoranabuhanga.

Umuseke: Ukunda umuziki?

Mayor Nyamagabe: Yego, ariko rimwe na rimwe umuntu iyo ari kuruhuka nibwo awumva, kandi nkunda indirimbo zituje.

Umuseke: Bajya bavuga ngo inkoni y’ubutware ituruka mu muryango, kuba uyu munsi uri Mayor w’Akarere hari uwo ubikomoraho wo mu muryango wawe?

Mayor Nyamagabe: Eeee! Ntabwo ari benshi ariko barahari mfite data wacu wigeze kuba Burugumesitiri wa Komine Musange igihe kirekire, nange uyu munsi ndi Mayor ariko ntaho bihuriye.

Umuseke: Abahanzi batatu b’Abanyarwanda ubona bafite icyerekezo ni abahe?

Mayor Nyamagabe: Oya! Oya! Reka icyo no ye kugisubiza!

Umuseke: Urasenga?

Mayor Nyamagabe: Yego ndasenga cyane ndi umuyoboke wa Kiliziya Gaturika.

Umuseke: Waba wibuka amakosa wakoze mu rugo bakagukubita, kera ukuri umwana?

Mayor Nyamagabe: Nkiri umwana nigeze kujya gukina biye icyo gihe umwarimu arankubita cyane nta nubwo ari n’ababyeyi bankubise habuze gato ngo n’ishuri ndireke.

Umuseke: Waba ukiri umusore warigeze ujya gutereta bakakubenga?

Mayor Nyamagabe: Nta wambenze kuko uwo naterese bwa mbere we yahise anyemerera.

Umuseke: U Rwanda wifuza mu myaka 25 ir’imbere ni uruhe?

Mayor Nyamagabe: Ndifuza u Rwanda buri muturage mbere na mbere akaba afite imibereho y’ibanze.

Umuseke: Aba Perezida batatu ukunda ni abahe?

Mayor Nyamagabe: Perezida Paul Rwanda, John Pombe Magufuri wa Tanzania, Macky Sall wa Senegal

Umuseke: Mayor Umuseke uragushimiye ikiganiro kiza uduhaye

Mayor Nyamagabe: Namwe ndabashimiye ko mwantumiye nk’Umuseke.

Uwamahoro Bonaventure Mayor wa Nyamagabe yarahiye tariki 02/08/2018

Jean Paul NKUNDINEZA
UMUSEKE.RW

1 Igitekerezo

  • Ka

Subiza

Your email address will not be published. Required fields are marked *