• 29/01/2020 1:37 55

Intego za SDGs zikeneye ishoramari ku Banyafurika n’isi yose – Kagame

Mu nama yiga ibyakozwe n’inzitizi zicyugarije ishyira mu bikorwa ry’Intego z’Iterambere rirambye, Perezida Kagame yavuze ko hakenewe ko abatuye Africa bashyiraho akabo mu gushakisha imari yashorwa mu mishinga ijyanye na ziraya ntego zizamara imyaka 15 zishyirwa mu bikorwa.

Perezida Paul Kagame avuga ko Africa igomba kumva ko ari yo ya mbere mu gutera inkunga imishinga ya SDGs

Perezida Kagame ni Umuyobozi Mukuru w’inama yashyizeho Ikigo kigenzura ishyirwa mu bikorwa ry’Intego z’Iterambere rirambye (Sustainable Development Goals Center for Africa, SDGC/A).

Mu nama ibera i Kigali igamije gusuzuma ibyo iki kigo kimaze kugera mu gushyira mu bikorwa ziriya ntego mu myaka itatu, Perezida Kagame yavuze ko ziriya ntego ari iz’abatuye isi bose kandi zifite intego nini zigamije kugeraho mu kuzamura ubukungu bw’ibihugu byose biri ku isi hatabayeho kurobanura.

Ati “Kugera ku ntego za SDGs bivuze kugera ku kintu gifatika mu iterambere n’imibereho myiza, hatibagiwe no kurandura burundu ubukene bukabije.”

Kubera iyo mpamvu, Kagame avuga ko asanga umugabane wa Africa ukwiye kwiha intego yo hejuru nubwo bimara igihe kirekire ngo abantu bazigereho, aho guhigira gukora bike, akaba ashima n’ibimaze gukorwa.

Avuga ko igihe Africa izaba yiyumvamo ubushobozi bwo kugera kuri ziriya ntego, abantu bakwiye kumva ko batekanye, ariko ngo ntabwo bizaba ibintu bibaguyeho.

Ati “Tugomba gukora ibikenewe, dugashaka amafaranga yo kubikora, harimo no gushora amafaranga yubaka ibigo bikomeye bikora ibarurishamibare.”

Perezida Paul Kagame raporo yagaragaje ko kugira ngo Intego z’Iterambere Rirambye zigerweho, hari icyuho kibarirwa hagati ya miliyari 500$ na miliyari 1200$ akenewe buri mwaka.

Ati “Iki kibazo ni icya nde? Ku ruhande rumwe, SDGs ni intego z’Isi yose kandi bifite igisobanuro cyabyo gikomeye. Ariko inkunga ntabwo yiyongera, kandi tugomba kwitegura ko bizakomeza kumera gutyo.

Ishoramari riva hanze ya Africa na ryo ntirikura.

Ku rundi ruhande kwihutisha ko intego za SDGs ni ngombwa cyane kandi abo bireba cyane bafite ikibazo mu maboko yabo ni inshingano z’Abanyafurika.”

Perezida wa Zambia Edgar Lungu na Visi Perezida wa Liberia, Dr. Jewel C. Howard-Taylor, ndetse na Perezida wa Komisiyo ya Africa yunze Ubumwe, Dr. Moussa Faki Mahamat bitabiriye iyi nama y’i Kigali

Kubera iyo mpamvu nubwo isi ibana mu bufatanye, Kagame asaba ko ubushake bwa politiki kuri iyi ngingo bugaragara kandi bivuye mu majwi y’Abanyafurika, ari nay o mpamvu abafatanyabikorwa n’abandi bose SDGs zireba bahura bakaganira kuri icyo kerekezo.

Kagame avuga ko Africa igerageza ibishoboka igashyiramo ubushobozi n’iyo bwaba buke mu bwo ifite, agasaba abakomoka muri Africa batuye hanze yayo gukora ibishoboka bakongera ingano y’ayo bashora iwabo kugira ngo izi ntego zigerweho.

Yavuze ko muri Africa nta kibuze uretse ubushake bwo kumva ko ibintu byihutirwa.

Kuba hashyirwaho ikigega kita ku burezi, amazi n’ubuzima ari ibintu byiza, ngo ni uburyo bwaba bwiza bwo gukorana n’abafatanyabikorwa neza kandi hakabaho imishinga myiza igamije kuzamura ubuzima bw’abahinzi, imiryango ikinnye no gufasha amashuri.

Kagame asanga ari cyo gihe mu myaka ine ishize SDGs zitangiye ngo abantu bashyiremo imbaraga nyinshi bijyanye n’igihe cyatakaye kugira ngo bizagere mu 2030 hari ibyagezweho.

Hateganyijwe indi nama izabera i New York muri uyu mwaka izasuzuma inozwa ry’izi ntego z’iterambere rirambye, Perezida Kagame akifuza ko Africa yazajyana imbaraga nshya n’ibitekerezo kugira ngo igume mu murongo w’ibyatangiwe, bityo ngo ikigo SDG Centre for Africa kiri i Kigali gifite umwanya munini muri ibyo.

Dr. Belay Begashaw ukuriye SDG Centre for Africa yavuze ko intego za SDGs ari ikerekezo isi yihaye kirimo imirongo 17 ikubiyemo iterambere mu mibereho kandi ko nta we ukwiye gusigara inyuma mu bukene.  Yavuze ko Africa idakwiye gutegereza akimuhana kaza imvura ihise, ahubwo abasaba gushyira mu gaciro bakiga umuco wo kwigira.

Iyi nama yitabiriwe na Perezida wa Zambia Edgar Lungu na Visi Perezida wa Liberia, Dr. Jewel C. Howard-Taylor, ndetse na Perezida wa Komisiyo ya Africa yunze Ubumwe, Dr. Moussa Faki Mahamat. Hamuritswe raporo ebyiri iyitwa Africa 2030: Sustainable Development Goals Three Year Reality Check ivuga ibyakozwe mu myaka itatu, iyitwa 2019 SDGs Index and Dashboard report izajya igaragaza amakuru y’uko buri gihugu gihagaze mu gushyira mu bikorwa intego za SDGs.

Muri iyi nama hamuritswe raporo ebyiri iyitwa Africa 2030: Sustainable Development Goals Three Year Reality Check ivuga ibyagezweho mu myaka itatu kuva muri 2015, n’iyitwa 2019 SDGs Index and Dashboard report igaragaza buri gihugu cya Africa uko gishyira mu bikorwa intego za SDGs

UMUSEKE.RW

7 Ibitekerezo

  • Ariko namwe si ukwinyuraguramo mwakabije. Mu yindi nkuru iri aha hasi, ngo Afrika ntikeneye abanyamahanga bayibwiriz’ibyo gukora ngo nibayireke yikorer’ibyayo biyiganisha ku iterambere. None aha uti isi ni idufashe duter’imbere. Ubeshya kera wageraho nawe ukibeshya cyangwa ukibeshyera.

  • Jean Pierre we! Ibyo bavuga mu madisikuru sibyo bakora. Disikuru barazisoma kandi akenshi sibo bazandika! Nturumva abavugako tugomba gufungura imipaka muri Afurika ariko bagafunga imipaka y’ibihugu byabo? Nturumva se aho batubwira kudasesagura uduke dufite ariko bakurira indege bajya muri za Amerika n’ahandi? Abategetsi bacu bati tugomba gushyira imbere abaturage ariko bo bakigurira indege n’imodoka zihenze. Mbese abategetsi ba Afurika akenshi ntibabazwa ibyo bakora. Bibatera gukora ibidakorwa ariko amadisikuru bategurirwa ugasanga arasa na bike!

  • @jeanpierre ati mire ayahe nshire ayahe. Na njye nti ntyo. Bati Africa yunzi ubumwe bati ntimukajye I Burundi cyangwa i Buganda. Iyo Afurika tuzayigeramo tunyuze he? Bati turwanya ruswa ariko wareba ruswa n’ikimenyane mu itangwa ry’akazi cyangwa amasoko bya leta ukagira ngo ibivugwa bitaka igihugu cyacu ntabwo ari ukuri. Ibyo byose ariko ntibizatubuze gukorera igihugu cyacu kuko ari twe ba mbere tubyingukiramo. Murakoze.

  • Icy’ibanze abanyafrika dukeneye uyu munsi, si ishoramari n’impuhwe by’ababyahanga. Ni ubshishozi, ubwitange, urukundo n’impuhwe by’abayoboye ibihugu bya Afrika uyu munsi.

  • Ariko se ibi ni iki ? Nyamara sinzi ibyo turimo. Izi nama zihoraho zigenewe bande ? Zidusigira iki ? Abanyarwanda muri rusange bakuramo iki ? Ni bangahe bumva ibivugirwamo ?

  • Ahubwo uwagarura abakoroni nibwo twagira agahenge kuko abayobozi nako abategetsi bo muri Afrika ni imiteguro gusa.

  • Ubanza tugera aho tukibagirwa ko uwo turatiye u Rwanda wese aba ashobora kujya kuri Wikipedia, kuri site ya US Department, iya CIA, iya RSF, iya Amnesty International cyangwa Human Rights Watch, kuri sites za IMF, World Bank cyangwa UNDP, cyangwa akikatisha kuri You tube agashiramo “search ku Rwanda”, agahita amenya ibyo yifuza byose by’ingenzi ku gihugu bariho bamuratira? Kuri smart phone ye ataranasohoka mu nama igihe za speeches zabaye nyinshi cyane. Umuyobozi wa Afrika ba Mpatsibihugu bahora bashagaye, bamukomera amashyi, bamubwira ko adasanzwe ari igitangaza, bamutumira mu nama zabo hafi ya zose, ajye arya ari menge. Baba banamupangira twa surprises tudasanze iyo bigeze igihe batakimukeneye mu mipangu yabo.

Subiza

Your email address will not be published. Required fields are marked *