• 15/12/2019 7:17 01

Imyaka 20 ishize rwari urugendo rukomeye – P.Kagame

Mu kiganiro kirambuye Perezida Paul Kagame yagiranye n’umunyamakuru  Methil Renuka wa Forbes Africa yamubajije uko urugendo rw’imyaka 20 ishize rwari rumeze ku Rwanda, no ku bindi bibazo cyane cyane bireba ubumwe, ubucuruzi n’ubuhahirane bwa Africa, ubushomeri no guhanga imirimo n’ibindi…

Perezida Kagame yavuze ko ashakisha umwanya agakora siporo cyane, hakaba nubwo azikora nijoro cyane abandi baryamye
Perezida Kagame yavuze ko ashakisha umwanya agakora siporo cyane, hakaba nubwo azikora nijoro cyane abandi baryamye

Ku rugendo rw’u Rwanda nawe ubwe mu myaka 20 ishize Perezida Kagame yasubije ko rwari rukomeye ndetse kubivuga mu magambo byumvikana nk’ibyoroshye.

Avuga ko rwari urugendo rwo kwigira ku bibazo bikomeye abantu banyuramo ariko ntunareke biguherana, ntube umugaragu w’ibihe bikomeye cyane waciyemo ahubwo ukaba umunyeshuri wabyo bikagufasha kureba imbere ariko unashingira ku byakubayeho.

Ati “Ibyo bikagufasha kumenya amahitamo mu gihe runaka ku biri imbere. Rero, imyaka 20 ishize rwari urugendo rw’ibikomeye ariko rwarimo n’inkuru nziza nyinshi, ibyo nibyo bidutera imberaga twese hamwe.

Twagize amakuba ariko kandi umuhate wo kunga no guhuza abantu kugira ngo dufate ikerekezo cy’ejo hacu wakiranywe imbaraga, ibyo byatanze umusaruro. Ubu turi kubona impinduka nziza. 

Ubu n’iyo urebye abantu ku maso ubona uko bakira ibintu, ubona ari nk’aho ntacyabaye hano nubwo amateka yuzuye ibintu bikomeye. Kandi uritse n’ibyo bintu biteye agahinda, twanagize ibindi bibazo biva hanze – abantu bibagirwa vuba. Rimwe na rimwe abo hanze batubwiriza uko dukwiye gukora ibyacu, ibyo dukwiye gukora n’ibyo tudakwiye gukora nk’aho ubuzima bwacu bugomba kugengwa n’abo hanze cyangwa nk’aho ubwau tudakwiye kugena ejo hacu.

Ariko twitonze twagiye tuganira n’abantu nk’abo. Twitaye cyane ku byo dukora n’ibyo twemera ndetse n’ibyemezo bikomeye twagombaga gufata, ikiza muri byose ni uko buri myaka itatu cyangwa itanuishize twisuzuma tuti ‘ twageze kuki kivuye ku mahitamo n’umuhate byacu.’ Nta kundi twari kubigenza cyangwa twarushaho? Tukanashyira ku munzani ibyo bitari ngombwa tubwirwa n’abo hanze kandi dukomeza kumva. Ntabwo tubyirengangiza, turakomeza tukabyumva ariko kandi twumva neza ko ibyacu ari twe bireba.”

Muri iki kiganiro, Perezida Kagame yasubije kandi ko abona hari ikizere ku gushyira hamwe, guhahirana no gucuruzanya kwa Africa, avuga ko mu gihe abantu miliyoni 29 baza kw’isoko ry’umurimo buri mwaka hakwiye no gushyirwa imbaraga mu guhanga imirimo aba bantu bagomba gukora, bitaba ibyo bakaba ari akaga kuri Africa.

Ku imbere hazaza h’u Rwanda yavuze ko Leta ikora ibishoboka igashora mu kubaka imibereho, ibikorwa remezo n’ubumenyi by’abanyarwanda kugira ngo ejo bagire imbaraga zo gukora ibibateza imbere, guhanga ibishya no kwibeshaho neza.

Avuga ko Leta kandi ishyira imbaraga mu gufungura urubuga ngo abantu bakora ibibateza imbere, ko nko kuba u Rwanda ari urwa 29 ku isi n’urwa kabiri muri Africa mu gufungura urubuga ku bushabitsi (doing business) bifite icyo bivuze muri uyu muhate. Ndetse no kongerera amahirwe urubyiruko mu bumenyi, guhanga imirimo no kwikorera.

Akazi n’imibereho  

Yasubije ko kugira ngo abeho anakore akazi kenshi agira agomba gushakisha umwanya agakora cyane siporo, hakaba nubwo biba ngombwa ko ayikora mu masaha y’ijoro cyane abandi baryamye, ariko kandi akanashaka umwanya wo gusinzira.

Ati “sinjya mbura ibitotsi, igihe cyose mbonye amasaha yo kuruhuka nshyira umutwe ku musego nkahita nsinzira.”

U Rwanda ni igihugu ubu gifatwa nk’ikiri mu mpinduka zigaragara mu by’ubukungu n’imibereho y’abaturage.

Ku buyobozi bwe bw’Umuryango w’Ubumwe bwa Africa Perezida Kagame yashyize umuhate mu mushinga w’isoko rusange rya Africa, ibihugu 49 bimaze gusinya biwemera nubwo bicye aribyo bimaze kwemeza ishyirwa mu bikorwa ryawo.

UM– USEKE.RW

0 Igitekerezo

  • Nibyo imyaka 20 ishize yari ikomeye, ariko iri imbere niyo ikomeye kurenzaho kuko ntawe uzi ikihamutegereje, gusa nk’ibisanzwe turibwira tuti ibyiza biri imbere. Umuhanzi Byumvuhore ati “buri muntu yiringira amahirwe mu buzima, amaherere akamurindira ngo bagendane….”.

  • Prezida wacu iyo avuga ukuntu u Rwanda aho rugeze hashimishije kandi hatanga icyizere nanjye numva nishimye pe! Nkagira icyizere ko nanjye bizangeraho. Ariko nasubira ku kuri kw’ibyo ndebesha amaso bikanyobera: urubuga rwo gukora business rufunguye gute na monopoles ziri muri iki gihugu? Ese koko areba abanyarwanda akabona abenshi bacyeye ku maso utamenya amakuba bahuye nayo? Cyangwa abenshi mu bo ahura nabo ni abamwereka iyo sura, kuko bamerewe neza koko yabakamiye bakaba bafite byose, abandi bakaba bazi guhisha ikibari ku mutima? Ushaka kureba ikiri ku mutima y’abenshi mu banyarwanda, ategereza icyunamo ngarukamwaka cyo muri Mata, n’imihango yo kwibuka ikomeza kugeza muri nyakanga. Amagambo avugwa muri biriya bihe, n’amasura abayavuga n’abayakira berekana, nibyo byegereye ukuri kw’ibiri mu mitima y’abanyarwanda. Inzira y’isanamitima iracyari ndende cyane.

  • Iyi interview yo kutwamamaza ikoze neza pe!! Buriya twayitanzeho cash ingana gute? Nizere ko bariya bataduhenda nka ba Francois Soudan, Maria Malargadis, Patrick de Saint Exupery cyangwa ba Rakya Omar.

  • ariko biratangaje abantu twinuba umibereho yacu mibi, noneho tugasaba ko umuti waba guhabwa uburenganzira bwo “gukora business”,kandi aribyo byateye iyi situation; tukanavuga tuti nta”opportunities ziboneka “kw’isoko ry’umurimo””(nkaho umulimo arisoko bagura bakagurisha(none kuriryo “soko ry’umurimo, ninde ugura ninde ugurishwa;nigiki kigurwa n’igiki kigurishwa?).
    kwigwizaho mubunyazi bw’umulimo(capitalism), n’ingaruka ziyo ntwara, nibyo by’ibarutse iyi situation; ariko twe, turasaba uburenganzira bwa business(more capitalism)kugirango tuve muli situation yaremwe nayo?

Subiza

Your email address will not be published. Required fields are marked *