• 09/12/2019 7:42 42

Imodoka nshya ivuduka kurusha izindi zose yamuritswe. Yitwa Battista

Iyi niyo modoka y’imbaraga kurusha izindi zose ivuye mu Butaliyani. Ishobora kuba ari nayo modoka irusha kuvuduka izindi zose ku isi. Gusa kuba iya mbere sicyo cya ngombwa cyane kuko iyi modoka iri bumurikwe uyu munsi igikomeye ni uko inakoresha amashanyarazi. Ntiyangiza ibidukikije.

Pininfarina Battista ivuduka bitangaje
Pininfarina Battista ivuduka bitangaje

Ni imodoka yiswe Pininfarina ‘Battista’ uyu munsi iramurikirwa i Geneve muri Geneva Motor Show. Yakozwe n’uruganda rumenyerewe mu gukora ‘design’ z’imodoka rwa Pininfarina mu Butaliyani.

Imbaraga z’umuvuduko wayo ni igitangaza, Battista ishobora kugera ku muvuduko wa 100Km/h mu masegonda atarenze abiri gusa, ikagera ku muvuduko wa 300Km/h mu masegonda atarenze 12, umuvuduko wayo wa nyuma ukagera kuri 400Km/h kandi ikaba ishobora kugenda 450Km yacometswe inshuro imwe ku muriro.

Imbaraga zayo zo guhagarara brake horse power (bhp) ni 1,900. Zikubye kabiri cyangwa gatatu iz’imodoka zisiganwa mu marushanwa ya Formula 1

Automobili Pininfarina ifite izina rikomeye mu gukora ‘design’ y’imodoka, yafashije Ferrari na Alfa Romeo gukora ‘design’ z’imodoka basohora, ariko ubu nayo yinjiye mu gukora imodoka.

Ni nyuma y’uko Mahindra Group y’abahinde iguze imigabane minini muri Pininfarina mu 2015 ubu ikaba yarinjije uru ruganda mu gukora imodoka nk’izi zikoresha amashanyarazi.

Muri iyi modoka
Muri iyi modoka

Moteri y’iyi Battista ikoze nk’inyuguti ya T, iri inyuma y’intebe z’abo itwara, ibi ngo byahaye abayikoze umwanya wo gutunganya igice cy’imbere mu gutuma igira ubuhumekero n’imbaraga zitandukanye n’izikoresha petrol.

Paolo Pininfarina, umuyobozi w’uru ruganda akaba n’umwuzukuru wa Battista Pininfarina (ari na we bitiriye iyi modoka nshya) ati;

“Gushobora gukora imodoka y’imbaraga n’umuvuduko nk’ibi ariko itagira na gito yohereza mu mwuka ni ibintu tubona byiza cyane.”

Uru ruganda ngo rufite umugambo wo gukora n’izi modoka nk’izi.

Mu 2008 uru ruganda rwagerageje gukora imodoka nk’iyi ariko rubibuzwa n’igihombo n’ubukungu bwifashe nabi. Mahindra imaze kugura uru ruganda nibwo rwongeye guhagurukana imbaraga.

BBC

UM– USEKE.RW

1 Igitekerezo

  • KO MUTADUHAYE IGICIRO CYAYOSE?

Subiza

Your email address will not be published. Required fields are marked *