• 14/12/2019 9:42 53

Imiti mishya ya Ebola iratanga ikizere gihanitse…Igiye gukoreshwa muri DRC

Ubushakashatsi bwakozwe ku bwoko bune bw’imiti, bugaragaza ko ibiri muri yo umwe witwa REGN-EB3 n’undi witwa mAb114 ifite ubushobozi bwo kuvura iyi ndwara ikomeje guhitana ubuzima bwa benshi barimo n’abo mu gihugu cy’abaturanyi  cya Repubulika Iharanira Demokarasi ya Congo.

Ebola yamaze kuba icyorezo gihangayikishije Isi

BBC dukesha iyi nkuru, ivuga ko iriya miti yageragerejwe ku barwayi ba Ebola 725 bo muri Repubulika Iharanira Demokarasi ya Congo.

Ibyavuye muri buriya bushakashatsi bishingiye ku barwayi 499 bahawe iriya miti, byatangajwe ku rubuga rw’Ishami rishinzwe Ubuzima muri Leta Zunze Ubumwe za America (NIH/National Institutes of Health).

Abakoze ubu bushakashatsi bavuga ko aya ari amahirwe ku bihugu bikomeje kugarizwa na kiriya cyorezo kuko iriya miti yagabanyije ikigero cyo gupfa ku barwayi ba Ebola kikagera kuri 49% mu gihe ubundi umurwayi utavuwe kiba kiri kuri 75%.

Bavuga ko amahirwe yo gukira Ebola, bisaba ko iriya miti umurwayi ayihabwa agifatwa.

Ubu bushakashatsi bwatangiye mu Ugushyingo 2018, bwakozwe ku bufatanye n’Ishami ry’Umuryango w’Abibumbye ryita ku buzima (OMS) rifatanyije n’ikigo cy’Abanyamerika gikora ubushakashatsi ku ndwara zandura kizwi nka NIAID.

Bugaragaza kandi ko indi miti nka Remdesivir na ZMapp yo idafite ingufu nk’iriya yindi bityo ko yakuwe mu yigomba kwifashishwa mu igerageza.

Umuyobozi wa NIAID, Dr Anthony Fauci avuga ko iriya miti ibiri ari yo ya mbere igaragaje ingufu mu kuvura icyorezo cya Ebola.

Amaraso y’abantu bigeze kurwara Ebola ntibahitane, ni yo yifashishijwe mu gukora iriya miti REGN-EB3 na mAb114 ubu igiye gukoreshwa mu kuvura abarwaye icyo cyorezo muri DRC.

Muri DRC Ebola imaze guhitana abakabakaba 1900, iki cyorezo kikaba cyaranagaraye i Goma, agace gahana imbibi n’u Rwanda.

Guverinoma y’u Rwanda imaze iminsi isobanurira Abaturarwanda ububi bwa Ebola, imaze iminsi inagira inama abatuye i Rubavu bakunze gukora ingendo i Goma guhina akarenge kugira ngo batandura kiriya cyorezo cyandura cyane.

Aline RANGIRA MWIHOREZE
UMUSEKE.RW

1 Igitekerezo

  • Ni imiti yo kuvura indwara cyangwa ni inkingo. Kugeza uyu munsi nta virusi n’imwe igira umuti. Habe na grippe. Havurwa ingaruka zayo (symptoms) gusa.

Subiza

Your email address will not be published. Required fields are marked *