• 11/12/2019 11:41 16

Imikino yakoreshejwe mu kubiba urwango ubu ikoreshwa mu guhuza abantu – Amb.Munyabagisha

Mu gihe hibukwa Jenoside yakowerewe Abatutsi mu 1994, umuyobozi wa Komite Olempike y’u Rwanda, ambasaderi Munyabagisha Valens yemeza ko imikino yakoreshejwe mu gutegura Jenoside mu buryo butaziguye ariko mu myaka 25 ishize yakoreshejwe hasanwa ibyangijwe.

Ambasaderi Munyabagisha Valens yishimiye intambwe imikino imaze gutera mu kubaka igihugu no mu kunga abanyarwanda
Ambasaderi Munyabagisha Valens yishimiye intambwe imikino imaze gutera mu kubaka igihugu no mu kunga abanyarwanda

Ubusanzwe imikino ni inzira yo guhuza no kunga abantu. Ibi bigaragara iyo ikipe runaka igeze ku ntsinzi, abakunzi bayo bishimira hamwe ntawe ubona mugenzi we mu isura y’ubwoko runaka.

Izi mbaraga z’imikino mu guhuriza hamwe abantu benshi zakoreshejwe nabi mbere y’umwaka wa 1994 ubwo bamwe mu bari abayobozi mu nzego zitandukanye z’imikino bakoresheje imyanya bafite bagacengeza mu bafana babo umugambi wo gutegura Jenoside waje no gushyirwa mu bikorwa.

Nkuko igitabo ‘Football, politique et violence milicienne au Rwanda’ cyanditswe n’Umufaransa Dr Hélène Dumas kibitangaza, bamwe mu bari abayobozi b’Interahamwe n’abishyaka MRND binjiye mu buyobozi bw’amakipe akomeye kandi akunzwe.

Ingero zihari ni; Joseph Kanyabashi uri mu bateguye Jenoside mu cyahoze ari Butare wari umuyobozi wa Mukura VS, Ferdinand Nahimana wari umwe mu bayobozi b’Interahamwe muri Gisenyi wari umuyobozi wa Etincelles FC na Joseph Karera ayobora Kiyovu Sports.

Kuba aba bari abayobozi b’aya makipe akunzwe byarorohaga gucengeza amatwara yabo mu bakunzi b’imikino nkuko Umuseke wabyemerejwe n’umuyobozi wa Komite Olempike y’u Rwanda, ambasaderi Munyabagisha Valens.

Yagize ati: “Ikigaragara ni uko Siporo by’umwihariko umupira w’amaguru mu Rwanda umuntu akoze ubushakashatsi yasanga koko yarabaye inzira yo kwinjiza urubyiruko mu bwicanyi. Amateka atwereka ko ikintu cyose gikoreshejwe neza gishobora kugira uruhare mu iterambere ry’abaturage cyakoreshwa nabi nabwo kikagira ingaruka mbi cyane.”

Uyu muyobozi yakomeje avuga ko n’uburyo abanyamakuru b’imikino bakoreshaga bogeza ibitego mu mupira w’amaguru aribwo Interahamwe zakoreshaga zitegura ibitero ku ngo z’Abatutsi.

Gusa ngo ibihe by’umwijima byararangiye, kuko Jenoside irangiye imikino yongeye gukoreshwa ihuza abari basigaye.

Abanyarwanda bari bavuye mu bihe by’agahinda bahuriye kuri stade Amahoro mu 1999 bishimira igikombe cya CECAFA y’ibihugu Rwanda ‘B’ yegukanye, barebera hamwe Amavubi y’u Rwanda akina igikombe cya Afurika mu 2004 n’ibindi bihe byiza bitandukanye byakurikiyeho.

Ibi Munyabagisha abifata nk’umusanzu ukomeye imikino yagize mu kubaka igihugu, kandi iracyanakoreshwa mu kwibuka abazize Jenoside yakorewe Abatutsi mu 1994 binyuze ijoro ryo kwibuka no mu marushanwa ategurwa n’amashyirahamwe y’imikino atandukanye aba muri Kamena buri mwaka.

Kuri iyi nshuro ya 25, Minisiteri ya Siporo n’Umuco(MINISPOC) ifatanyije na Comité National Olympique et Sportif du Rwanda (CNOSR) bazibuka abari abakozi ba MIJEUMA ariyo MINISPOC y’ubu, mu muhango uteganyijwe kuwa 10 Mata 2019 kuri Petit Stade i Remera guhera saa saba z’amanywa (13h00).

U Rwanda rwari ruvuye mu mwijima w'icuraburindi rwegukanye CECAFA 1999 ibyishimo byongera gutaha ku mitima ya benshi
U Rwanda rwari ruvuye mu mwijima w’icuraburindi rwegukanye CECAFA 1999 ibyishimo byongera gutaha ku mitima ya benshi

Yvonne IRADUKUNDA

UM– USEKE.RW

Subiza

Your email address will not be published. Required fields are marked *