• 29/01/2020 11:15 00

Imideri: Umunya-Ghana yashimye imyambarire y’abanyarwanda bo hambere yambara nkabo

Umunya-Ghana Georgina Akalanyabah uzwi nka Gina Akala umaze kubaka izina mu kumurika imideri no kuyihanga muri Africa y’Iburengerazuba wari umaze iminsi ari mu Rwanda avuga ko abanyarwanda bo hambere bambaraga neza, yanifotoje yambaye nkabo.

Abicishije mu mafoto Gina Akala yerekanye uko abanyarwanda bo hambere bambaraga ibyanganga mu mutwe

Georgina Akalanyabah winjiye mu by’imideri muri 2013 ayimurika, muri 2016 yatangiye ibyo kuyihanga ubu ni ikirangirire muri uru ruganda muri Ghana iwabo no muri Nigeria.

Uyu wigiye ibyo guhanga imideri, yagiranye ikiganiro n’Umuseke mu minsi ishize ubwo yari ari mu Rwanda.

Yavukiye muri Ghana ahitwa Cape Coast ari na ho yigiye amashuri ye abanza n’ayisumbuye nyuma aza kwimukira mu mugi wa Accra muri Ghana ari na bwo yaje kwisanga yinjiye mu byo kumurika imideri nyuma bikaza guhinduka akazi kasize izina rye rimenyekanye mu bihugu bitandukanye byo muri Africa birimo n’u Rwanda.

Mu 2016  Gina Akala yahawe igihembo nk’umukobwa uzi kumurika imideri neza muri Africa. Ni igihembo yakuye muri Uganda mu bihembo bihabwa abakora ibifite aho bihuriye na Fashion bizwi nka ‘Abryanz Style and Fashion Awards’

Gina Akala ubusanzwe ni umukobwa w’igikara akaba afite uburebure bwa 1,70m  avuga icyongereza neza ndetse akurikirwa n’abasanga ibihumbi 6 499 kuri Instagram.

Yakoranye n’abafotora bakomeye muri Africa barimo Image Faculty bakorera muri Nigeria, Felix Crown. Aha mu Rwanda yakoranye n’abafotora barimo NIB Studios na Gwiza Aime

Yanamamaje imyenda yakozwe n’abahanga imideri batandukanye muri Africa by’umwihariko akaba aheruka gukorana na Milly Umuhoza umwe mu basiga ibirungo abantu ‘makeup’ by’umwihariko aba bombi bafatanyije bakaba barashyize hanze amafoto yerekana uko abanyarwanda bo hambere bambaraga.

Gina usanzwe akorana n’abanyarwanda, avuga ko umuco w’Abanyarwanda wihariye by’umwihariko imyambarire y’abo hambere.

Ati “Twahisemo kwerekana uko aba kera bambaraga imirimbo itandukanye irimo nk’ibyanganga [utuntu tw’uduti twambarwaga mu mutwe] barimbaga mu mutwe, twerekanye kandi uko aba kera bambaraga inshabure n’indi myenda yabaga ikozwe mu ruhu.”

Uyu muhanzi w’imideri ubifatanya no kuyimurika, avuga ko yifuza kwambika ibyamamare bikomeye ku Isi birimo Michelle Obama , Oprah, Beyonce na Rihanna.

Gina Akala avuga ko urugendo rwe rutari rworoshye ndetse ko byamusabye gukoresha imbaraga nyinshi, akishimira ko ari mu bantu ba mbere batumye ibijyanye no kumurika imideri biciye mu mafoto bimenyekana cyane muri Ghana nk’igihugu akomokamo.

Amafoto agaragaza Gina Akala mu bihe bitandukanye

Mu mafoto yandi yashyizwe hanze harimo n’ayerekana Gina Akala yambaye Inshabure

Robert KAYIHURA
UMUSEKE.RW

Subiza

Your email address will not be published. Required fields are marked *