• 08/12/2019 12:07 32

Ifuru itwika imyanda yo kwa muganga yatanzweho miliyoni 700 muri 2010 ntiyakoreshwa

Hashize imyaka 9 Leta y’u Rwanda itanze akayabo ka miliyoni 700 zirenga igura ifuru yari igenewe gutwika imyanda ituruka mu mavuriro atandukanye mu Mujyi wa Kigali ariko kuva yagurwa ntirakoreshwa na rimwe.

Abadepite mu nteko rusange

Ni ifuru izwi nka ‘incinerator’ yashyizwe mu Murenge wa Mageragere mu Karere ka Nyarugenge. Abadepite bakaba batiyumvisha ugomba kubazwa icyo gihombo Igihugu cyagize.

Ikibazo k’iyi furu kiri muri 12 byabajijwe Guverinoma nyuma y’aho Umutwe w’Abadepite ugiriye ingendo mu mirenge yose mu Gihugu mu ntangiriro z’uyu mwaka, ibibazo basanze mu baturage birebana n’ubuzima bagasaba Guverinoma kubitangaho ibisobanuro. Kuri uyu wa Kabiri  Minisitiri w’Ubuzima, Dr Gashumba Diane akaba ari we watanze ibisubizo ku nteko rusange.

Dr Gashumba yavuze ko impamvu iyo furu idakora byatewe n’uko habayeho iteganyabikorwa ritanoze, aho ijya kugurwa hatari hatekerejwe ingano y’amazi izakoresha ndetse n’aho yagombaga kubakwa.

Yemeye amakosa yabayeho, ashimangira ko ikibazo bamaze kukigeza ku Rwego rw’Igihugu rw’Ubugenzacyaha kugira rusuzume niba hari ibyaha byaba byarakozwemo.

Imyaka yose iyi furu yamaze idakora byatumye hari ibyuma byayo byangirika, aho Minisitiri Gashumba yavuze ko kuri ubu bamaze kubikora.

Yanavuze hari itsinda ryashyizweho risuzuma iki kibazo ndetse bakaba bari mu nzira yo kuyiha rwiyemezamirimo ngo abe ari we uyikoresha. Umwanzuro avuga ko Inama y’Abaminisitiri ari yo izawufata, aho mu mezi atatu bizaba byarangiye.

Iyi furu yari ifite ubushobozi bwo gutwika toni 2 z’imyanda buri munsi , bamwe mu badepite bagaragaje ko batumva impamvu yegurirwa rwiyemezamirimo, aho kuba Leta ari yo yagakwiye kuba iyikoresha.

Depite Bakundufite Christine yagize ati “Rwiyemezamirimo  azayiherwa ubuntu? Ni ikihe kibazo  cyatuma itakoreshwa na Leta,  na cyane ko ikoreshejwe na rwiyemezamirimo yashyiraho ibiciro  birebire byatuma biremerera ibitaro.”

Minisitiri Gashumba yavuze ko impamvu bahisemo rwiyemezamirimo ari uburyo bwo korohereza abashoramari, aho azaha Leta asaba miliyoni 500.

Yanavuze ko ku kirebana n’ibiciro byo gutwika imyanda, hazagenderwa ku bisanzwe bihari, aho nta mpungenge zihari zo kuzahendwa. Anavuga ko bitewe n’ingano y’iyo furu, ngo izanafasha n’indi nzego zinyuranye mu gutwika imyanda.

Minisitiri w’Ubuzima, Dr Gashumba Diane

Jean-Claude NDAYISHIMYE

UMUSEKE.RW

4 Ibitekerezo

  • Mujye mubanza mugenzure ko izo miliyoni zose ziba zatanzwe kuri ibyo bidakora byatashywe mwa bajyama mwe!! Abakoze uwo mushinga bibagirwamo ibizakenerwa ngo ukore ugaterwa inkunga gute? Abatanga cash yabo nta ba experts ba projects feasibility studies bagira se? Ariko yee!! Budget re-allocation niyo iba ikora!! Iyi miturirwa izamuka muri Kigali umunsi ku wundi n’izindi projets de prestige n’ibihombo bya za Rwandair n’amahoteri atagira abakiriya bahagije iyo nta nama mpuzamaganga zihari, mutekereza ko amafranga ajyaho mu kubyubaka cyangwa kuziba ibyuho by’ibihombo byazo atangwa n’umwuka wera?

  • Reka nitumire Depite BAKUNDUFITE Christine azambarize MINISTRI IKI KIBAZO: Ese ko MAGERAGERE bayishyize, mbere hari haragenewe INGANDA, none ubu akaba ari mu miturire (zone résidentielle) kandi ikaba igomba gutwika imyanda iva mu BITARO, mukaba muzi uburyo iyi myanda ihumanya cyane, nta mpungenge ko iyi INCINERATEUR ( IFURU) IMIRIMO YAYO YAZABANGAMIRA UBUZIMA BWATUYE MAGERAGERE ? MURAKOZE

  • ikibazo kimaze imyaka 9 none ngo kirakemuka mu mezi 3 ngo bagihaye RIB kandi igitangaje ushobora gusanga nta nibyo RIB izi ubundi se RIB ije ejobundi niyo bari bategereje, ngo ikeneye Amazi ubundi se hari ahatemerewe kugera Amazi kuki biba ikibazo abatuyeyo bo nta mazi bagira?!!!

  • Hari incinerateurs zubakiwe ibitaro zihenze cyane bits monfor.Kugirango itwike imyanda niba ntibeshye ngo inywa 180l, ejo no uko.Nta bitaro na bimwe birayikoresha Nazi zubatswe muri 2011.Ibi biri mu bitaro byose.Hari na morgue zubakiwe ibitaro zishyirwamo frigo zibika imibiri imwe irya 150w ku munsi.Ibitaro byaraziretse ziraho, hari na generators Nazi nyinshi zahawe amahopital n’ibigonderabuzima Nazi zaje ari ibipfu.Inama nagira buried wese wifuza gukurikirana ibi bintu azabireke kuko uwabikoze ntashobora gukurikiranwa ibi Niko bimeze kandi arazwi.

Subiza

Your email address will not be published. Required fields are marked *